ខេត្តសៀមរាប ៖ អាជីវករលក់ដូរនៅមុខប្រាសាទអង្គរវត្ត បានអបអរសាទពេញចិត្តខ្លាំងចំពោះទីតាំងថ្មី ដែលផ្តល់ជូនដោយអាជ្ញាធរជាតិអប្សរា ដោយទីតាំងថ្មីនេះ មានសោភ័ណភាពស្អាត និងបរិស្ថានល្អ ដែលអាចទាក់ទាញភ្ញៀវទេសចរបន្ថែមទៀតមកទស្សនាខេត្តសៀមរាបនាពេលខាងមុខ ជាពិសេសទេសចរក្នុងស្រុក។
អាជីវករនៅមុខប្រាសាទអង្គរវត្ត បានអះអាងថា ទីតាំងលក់ដូរថ្មីនេះល្អ មានសោភ័ណភាពស្អាត បរិស្ថានល្អ ពិសេសការរៀបចំដាំដើមឈើឡើងវិញ នៅមុខប្រាសាទអង្គរ ដែលជាការទាក់ទាញអ្នកទេសចរឲ្យមកកម្សាន្តខេត្តសៀមរាបក្រោយពីបញ្ចប់កូវីដ១៩។
អាជីវកររូបនេះ បានឲ្យដឹងទៀតថា គាត់បានមកលក់ដូរនៅមុខប្រាសាទអង្គរវត្តតាំងពីឆ្នាំ១៩៧៩ ដោយកាលនោះ គាត់លក់អីវ៉ាន់គ្រឿងទេស និងគ្រឿងអនុស្សាវរីយ៍បន្តិចបន្តួច ។
គាត់ បានបន្តថា កាលនៅទីតាំចាស់ តូបមានទំហំ១០ គុណ១០ម៉ែត្រ ប៉ុន្តែសម្រាប់ទីតាំងថ្មីនេះ ទំហំតូបតូចជាងមុន។ ថ្មីត្បិតតែវាតូចជាងទីតាំងចាស់មែន ប៉ុន្តែនៅទីនេះ មានសោភ័ណភាពល្អ និងបរិស្ថានស្អាត ។
គួរបញ្ជាក់ថា ចាប់តាំងផ្តើមពីដើម ឆ្នាំ២០២០ អាជ្ញាធរជាតិអប្សរា បានរៀបចំហេដ្ឋារចនាសម្ព័ន្ធ និងសួនច្បារនៅខាងលិចប្រាសាទអង្គរវត្ត ជាមួយនឹងការរុះរើសំណង់តូបលក់ដូរចាស់ៗ ដោយសាងសង់តូបលក់ដូនៅទីតាំងថ្មី ដើម្បីសោភ័ណ្ឌភាព និងទាក់ទាញទេសចរជាតិ និងអន្តរជាតិ។ រហូតមកដល់ពេលនេះ សំណង់ភោជនីយដ្ឋាន អាគាររដ្ឋ តូបលក់ដូរម្ហូបអាហារ លក់វត្ថុអនុស្សាវរីយ៍ សម្លៀកបំពាក់ប្រមាណជាង ១៥០ខ្នង បានសាងសង់រួចរាល់អស់ទាំងស្រុង ដោយការស្ម័គ្រចិត្តពីម្ចាស់កម្មសិទ្ធិ ហើយទីធ្លាខាងលិចប្រាសាទអង្គរវត្ត ក៏ពោពេញទៅដោយការ អភិវឌ្ឍហេដ្ឋារចនាសម្ព័ន្ធ និងសួនច្បារបៃតងធម្មជាតិដ៏ស្រស់ត្រកាល៕ដោយ៖CEN
