ភ្នំពេញ៖ដោយសារមួយរយៈនេះ កម្មករកម្មការិនីប្រមូលសំរាមរបស់ក្រុមហ៊ុន ស៊ីន ទ្រី បានធ្វើកូដកម្មមិនព្រមប្រមូលសំរាមតាមពេលវេលាបានធ្វើបង្កឱ្យមានសំរាម គរ ចាល់ ស្អុយ ពេញទីប្រជុំជន។
ដើម្បីជួយសម្រួលដល់បញ្ហានេះនារសៀលថ្ងៃទី៩ តុលា នេះ លោក ឡេង ណាវ៉ាត់ត្រា បានសហការជាមួយសាលាក្រុងភ្នំពេញ បញ្ចេញឡានបែនដឹកដីជាង១០០គ្រឿង ប្រមូលសំរាមតាមទីតាំងសំខាន់ៗជូនប្រជាពលរដ្ឋ។ ហើយសន្យាថា នឹងជួយស្វែងរកដំណោះស្រាយក្នុងការប្រមូលសំរាមឱ្យបានល្អបំផុតតាមដែលអាចធ្វើបាន។
យោងតាមគណនីហ្វេសបុកផ្លូវការបស់លោក ឡេង ណាវ៉ាត់ត្រា បានឱ្យដឹងថា “បញ្ហាកកស្ទះសំរាម ដែលកម្មករកម្មការិនីរបស់ក្រុមហ៊ុនស៊ីនទ្រី កំពុងធ្វើកូដកម្ម ដែលក្រុមហ៊ុនស៊ីនទ្រីខកខានមិនបានប្រមូលសំរាមនោះ សាលាក្រុងរាជធានីភ្នំពេញសហការជាមួយ បុរីឡេងណាវ៉ាត់ត្រា កំពុងនឹងបញ្ចេញឡានបែនដឹកដី ជាង ១០០ គ្រឿង ដើម្បីដោះស្រាយបញ្ហាចំពោះមុខ ។ ក្នុងឱកាសនេះដែរសូមផ្ដាំផ្ញើទៅបងប្អូនទាំងអស់នៅទីក្រុងភ្នំពេញ សូមមេត្តាយោគយល់និងអធ្យាស្រ័យផង។ សាលាក្រុងកំពុងប្រឹងប្រែងណាស់ ហើយក្រុមហ៊ុនឡេងណាវ៉ាត់ត្រាគ្រុប និងជួយស្វែងរកដំណោះស្រាយក្នុងការប្រមូលឲ្យបានល្អបំផុតទៅតាមដែលអាចធ្វើបាន។”
គួរបញ្ជាក់ផងដែរថា ការធ្វើកូដកម្មរបស់កម្មកកម្មការិនីប្រមូលសំរាមរបស់ក្រុមហ៊ុន ស៊ីនទ្រី នេះ គឺដើម្បីទាមទារប្រាក់អត្ថប្រយោជន៍ផ្សេងៗ ពីក្រុមហ៊ុនតាមកិច្ចសន្យាដែលបានព្រមព្រៀងគ្នា រវាងបុគ្គលិកនិងក្រុមហ៊ុនកាលពីពេលកន្លងទៅ។
យ៉ាងណាក៏ដោយកម្មករទាំងអស់ក៏បានយល់ព្រមចូលធ្វើការវិញ ក្រោយការសម្របសម្រួលពីលោក ឃួង ស្រេង អភិបាលរាជធានីភ្នំពេញ ហើយលោកក៏បានសន្យាថា បើទោះថ្ងៃក្រោយក្រុមហ៊ុន ស៊ីនទ្រី លែងបានទទួលសិទ្ធិប្រមូលសំរាមទៀត តែកម្មកទាំងអស់នៅតែអាចធ្វើការបានដដែល៕ ដោយ៖ កូលាប ក្រហម