កោះកុង៖ ក្នុងអំឡុងពេលនៃចន្លោះសម័យប្រជុំព្រឹទ្ធសភា គណៈកម្មការនីតិកម្ម និងយុត្តិធម៌ព្រឹទ្ធសភា (គណៈកម្មការទី៦ព្រឹទ្ធសភា) ដឹកនាំដោយឯកឧត្តម អ៊ុក ប៊ុនឈឿន ប្រធានគណៈកម្មការ បានអញ្ជើញជួបប្រជុំពិភាក្សាជាមួយនឹងអាជ្ញាធរខេត្តកោះកុង ដឹកនាំដោយឯកឧត្តម ទូ សាវុធ អភិបាលរង នៃគណៈអភិបាលខេត្តកោះកុង ដើម្បីឈេ្វងយល់អំពីវិធានទាំងឡាយនៃការអនុវត្តច្បាប់ និងការដោះស្រាយវិវាទក្នុងប្រព័ន្ធ និងក្រៅប្រព័ន្ធតុលាការ នៅសាលាខេត្តកោះកុង នាថ្ងៃទី៩ ខែតុលា ឆ្នាំ២០២០។
ឯកឧត្តម អ៊ុក ប៊ុនឈឿន ប្រធានគណៈកម្មការទី៦ព្រឹទ្ធសភា បានជម្រាបអំពីគោលបំណងរបស់គណៈកម្មការនាពេលនេះ គឺដើម្បីឈ្វេងយល់អំពីការអនុវត្តច្បាប់ ការដោះស្រាយវិវាទរបស់ក្រុមប្រឹក្សាខេត្ត ការដោះស្រាយទំនាស់របស់ការិយាល័យប្រជាពលរដ្ឋខេត្ត ការដោះស្រាយទំនាស់ដីធ្លីរបស់គណៈកម្មការសុរិយោដីខេត្ត ការផ្សព្វផ្សាយច្បាប់និងការអនុវត្តក្រមព្រហ្មទណ្ឌ ក្រមនីតិវិធីព្រហ្មទណ្ឌរបស់នគរបាល កងរាជអាវុធហត្ថ មន្ត្រីរាជការ និងភ្នាក់ងារសាធារណៈដទៃទៀតដែលច្បាប់ដោយឡែកប្រគល់អំណាចឲ្យធ្វើការពិនិត្យបទល្មើសទាក់ទងនឹងវិស័យជំនាញរបស់ខ្លួន និងសំណូមពរអំពីច្បាប់ និងលិខិតបទដ្ឋានគតិយុត្តនានា នៅខេត្តកោះកុង។
ឯកឧត្តម អ៊ុក ប៊ុនឈឿន ប្រធានគណៈកម្មការទី៦ព្រឹទ្ធសភា បានជម្រាបផងដែរថា កាលពីថ្ងៃទី៨ ខែតុលា ឆ្នាំ២០២០ គណៈកម្មការទី៦ព្រឹទ្ធសភា បានជួបពិភាក្សាការងារជាមួយនឹងអាជ្ញាធរឃុំតាតៃក្រោម និងអាជ្ញាធរស្រុកកោះកុង ដើម្បីឈ្វេងយល់អំពី ដំណើរការដោះស្រាយវិវាទក្រៅប្រព័ន្ធតុលាការ ដោយផ្តោតលើ៖ គណៈកម្មាធិការដោះស្រាយទំនាស់ និងដំណើរការដោះស្រាយវិវាទក្រៅប្រព័ន្ធតុលាការនៅការិយាល័យប្រជាពលរដ្ឋស្រុក ការិយាល័យនីតិកម្ម និងសម្រុះសម្រួលវិវាទមូលដ្ឋាន ការដោះស្រាយទំនាស់ដីធ្លីរបស់គណៈកម្មការសុរិយោដីនិងការអនុវត្តក្រមព្រហ្មទណ្ឌ និងក្រមនីតិវិធីព្រហ្មទណ្ឌរបស់នគរបាល កងរាជអាវុធហត្ថ មន្ត្រីរាជការ និងភ្នាក់ងារសាធារណៈដទៃទៀតដែលច្បាប់ដោយឡែកប្រគល់អំណាច ឱ្យធ្វើការពិនិត្យបទល្មើសទាក់ទងនឹងវិស័យជំនាញរបស់ខ្លួន ព្រមទាំងសំណូមពរអំពីច្បាប់ និងលិខិតបទដ្ឋានគតិយុត្តនានា។
ក្នុងឱកាសនោះ ឯកឧត្តម ទូ សាវុធ អភិបាលរង នៃគណៈអភិបាលខេត្តកោះកុង បានសម្តែងនូវការ ស្វាគមន៍ និងថ្លែងអំណរគុណដល់គណៈកម្មការទី៦ព្រឹទ្ធសភា ដែលបានចំណាយពេលវេលាដ៏មមាញឹកឆ្លៀតពេលអញ្ជើញមកជួបពិភាក្សាការងារឈ្វេងយល់អំពី ដំណើរការដោះស្រាយវិវាទនានាក្នុងខេត្តកោះកុងនាពេលនេះ ដែលពាក់ព័ន្ធនឹងវិស័យជាសមត្ថកិច្ចរបស់គណៈកម្មការ។ ឯកឧត្តមអភិបាលខេត្ត ក៏បានជម្រាបជូនគណៈកម្មការទី៦ព្រឹទ្ធសភា អំពីសភាពការណ៍រួមទូទៅ និងវឌ្ឍនភាពរីកចម្រើន ព្រមទាំងលទ្ធផលការងារសំខាន់ៗ ដែលរដ្ឋបាលខេត្តសម្រេចបាននាកន្លងមក ព្រមទាំងការងាយស្រួល និងការលំបាករបស់មន្ទីរជំនាញនានាជុំវិញខេត្តកោះកុង។ ទន្ទឹមនឹងនោះ អាជ្ញាធរខេត្ត និងភាគីព័ន្ធ ក៏បានរាយការណ៍លម្អិតអំពីលទ្ធផល និងសមិទ្ធផល ពាក់ព័ន្ធលើវិស័យមួយចំនួនពាក់ព័ន្ធនឹងវិស័យជាសមត្ថកិច្ចរបស់គណៈកម្មការទី៦ព្រឹទ្ធសភា ពិសេសលើការងារនីតិកម្ម និងយុត្តិធម៌ ជូនគណៈកម្មការទី៦ព្រឹទ្ធសភាបានជ្រាប។ ជាមួយគ្នានេះ ដើម្បីមានមូលដ្ឋានក្នុងការចូលរួមចំណែកជំរុញឲ្យមានការដោះស្រាយបានទាន់ពេលវេលា ហើយគ្រប់អ្នកពាក់ព័ន្ធទាំងអស់ ក៏បានលើកឡើងនូវបញ្ហាប្រឈម និងសំណូមពរជូនដល់គណៈកម្មការទី៦ព្រឹទ្ធសភា ដើម្បីធ្វើការពិនិត្យនឹងពាំនាំសំណូមពរទាំងអស់នេះ ជូនក្រសួង ស្ថាប័នពាក់ព័ន្ធ ដើម្បីរិះរកដំណោះស្រាយផងដែរ។
បន្ទាប់ពីបានស្តាប់នូវសេចក្តីការរាយការណ៍របស់ឯកឧត្តមអភិបាលខេត្ត និងភាគីពាក់ព័ន្ធរួចមក ឯកឧត្តម អ៊ុក ប៊ុនឈឿន ប្រធានគណៈកម្មការទី៦ព្រឹទ្ធសភា បានកោតសរសើរ និងវាយតម្លៃខ្ពស់ចំពោះអាជ្ញធរខេត្ត និងភាគីពាក់ព័ន្ធ ដែលបានខិតខំប្រឹងប្រែងបំពេញការងារក្នុងដំណើរការផុ្តល់សេវាផ្នែកច្បាប់ និងប្រព័ន្ធយុត្តិធម៌ឱ្យកាន់តែល្អប្រសើរ។ ឯកឧត្តមប្រធានគណៈកម្មការ បានមានសាសន៍បន្តថាអាជ្ញាធរខេត្ត និងភាគីពាក់ព័ន្ធ ត្រូវដោះស្រាយទំនាស់ដោយផ្អែកលើគោលការណ៍មួយចំនួនដូចជា៖ ១-សម្រុះសម្រួលរាល់វិវាទរដ្ឋប្បវេណី តាមគោលការណ៍ស្ម័គ្រចិត្តរបស់គូភាគី ២-សម្រុះសម្រួលបទលហុតាមគោលការណ៍ស្ម័គ្រចិត្តរបស់គូភាគី ៣-ជួយដល់ក្រុមប្រឹក្សាឃុំ សង្កាត់ក្នុងការផ្សព្វផ្សាយច្បាប់ដល់ប្រជាពលរដ្ឋ ៤-ជួយដល់ក្រុមប្រឹក្សាឃុំក្នុងការពង្រឹងសមត្ថភាព ក្នុងការដោះស្រាយទំនាស់នៅថ្នាក់ភូមិ និង៥-ជួយដល់ក្រុមប្រឹក្សាឃុំក្នុងការរៀបចំនិងបង្កើតក្រុមដោះស្រាយទំនាស់នៅភូមិ។
ឯកឧត្តម អ៊ុក ប៊ុនឈឿន ប្រធានគណៈកម្មការទី៦ព្រឹទ្ធសភា បានមានប្រសាសន៍បន្តទៀតថា ការខិតខំប្រឹងប្រែងរបស់គណៈកម្មការនីតិកម្មនិងយុត្តិធម៌ផ្សារភ្ជាប់ជាមួយនឹងអាជ្ញាធរនៅថ្នាក់ក្រោមជាតិ នាំឱ្យគណៈកម្មការកាន់តែក្តាប់បានដោយផ្ទាល់នូវបញ្ហាប្រឈមពិតប្រាកដទាំងឡាយដែលបានកើតឡើង ដើម្បីពិចារណារកគន្លឹះចូលរួមចំណែកផ្តល់នូវអនុសាសន៍ និងបណ្តាវិធានការទាំងឡាយជូនដល់មូលដ្ឋាន សម្រាប់ដោះស្រាយបញ្ហាប្រឈមទាំងនោះឲ្យទទួលបានលទ្ធផលកាន់តែល្អប្រសើរ ជាពិសេសពង្រឹង និងលើកកម្ពស់ស្មារតីថ្នាក់ក្រោមជាតិជួយផ្សព្វផ្សាយនិងអប់រំច្បាប់ដល់ប្រជាពលរដ្ឋឲ្យពួកគាត់កាន់តែយល់បានទូលំទូលាយ និងអនុវត្តន៍ច្បាប់បានត្រឹមត្រូវមានប្រសិទ្ធភាព ប្រជាពលរដ្ឋមានភាពកក់ក្តៅ និងជំនឿទុកចិត្តលើប្រព័ន្ធច្បាប់និងតុលាការ៕ ដោយ៖បញ្ញាស័ក្តិ