ភ្នំពេញ ៖ អាជ្ញាធរកម្ពុជាគ្រប់គ្រងសកម្មភាពកម្ចាត់មីន និងសង្គ្រោះជនពិការដោយសារមីន (អាជ្ញាធរមីន) នៅថ្ងៃទី១០ខែតុលាឆ្នាំ២០២០ បានចេញសេចក្តីណែនាំ ស្តីពីការពង្រឹងវិធានការការពារ និងទប់ស្កាត់គ្រោះថ្នាក់ ដោយសារមីន និងសំណល់ជាតិផ្ទុះពីសង្គ្រាម ក្នុងពេល និងក្រោយពេលគ្រោះទឹកជំនន់។
បើតាមសេចក្ដីណែនាំ បានឲ្យដឹងថា អាជ្ញាធរកម្ពុជាគ្រប់គ្រងសកម្មភាពកម្ចាត់មីន និងសង្គ្រោះជនពិការដោយសារមីន (អាជ្ញាធរមីន) សូមជម្រាបជូនដល់សាធារណជនមេត្តាជ្រាបថា យោងតាមការសង្កេតតាមដាន និងព្យាករណ៍អាកាសធាតុ ដែលបានបង្ហាញ ដោយក្រសួងធនធានទឹក និងឧតុនិយម ឥទ្ធិពលរបស់ប្រព័ន្ធសម្ពាធទាបមកលើកម្ពុជា បានធ្វើឲ្យមានភ្លៀងធ្លាក់ជាបន្តបន្ទាប់ស្ទើរទូទាំងប្រទេស ដែលធ្វើឲ្យខេត្តមួយចំនួន កំពុងរងឥទ្ធិពលទឹកភ្លៀងបង្កជាទឹកជំនន់ដូចជា ខេត្តបាត់ដំបង ខេត្តពោធិ៍សាត់ និងខេត្តប៉ៃលិន។
ក្នុងពេល និងក្រោយពេលទឹកជំនន់ មីន និងគ្រាប់យុទ្ធភ័ណ្ឌមិនទាន់ផ្ទុះមួយចំនួន ត្រូវបានប្រទះឃើញ ដោយសារការហូរច្រោះដី រសាត់មកពីតំបន់ដែលមានមីន ប្រឆាំងមនុស្ស មីនប្រឆាំងរថក្រោះ និងសំណល់ជាតិផ្ទុះពីសង្គ្រាមជាច្រើនប្រភេទ ដែលអាចបង្កគ្រោះថ្នាក់ដល់អាយុជីវិតប្រជាពលរដ្ឋជាយថាហេតុ ជាពិសេសប្រជាពលរដ្ឋ ដែលកំពុងរស់នៅក្នុងតំបន់ដែលរងផល ប៉ះពាល់ដោយសារមីន និងសំណល់ ជាតិផ្ទុះពីសង្គ្រាម។
ដើម្បីទប់ស្កាត់បាននូវគ្រោះថ្នាក់ដោយសារមីន និងសំណល់ជាតិផ្ទុះពីសង្គ្រាម ក្នុងពេលនិងក្រោយ ពេលគ្រោះទឹកជំនន់ អាជ្ញាធរមីន សូមធ្វើការណែនាំ ដល់គ្រប់គណៈកម្មាធិការសកម្មភាពមីនខេត្ត គ្រប់ ប្រតិបត្តិករអប់រំកាត់បន្ថយគ្រោះថ្នាក់ដោយសារមីន និងសំណល់ជាតិផ្ទុះពីសង្គ្រាម និងអង្គការពាក់ព័ន្ធ ចូលរួមសហការអនុវត្តនូវវិធានការណ៍មួយចំនួន ដូចខាងក្រោម៖
១) បន្តតាមដានជាប្រចាំនៅតាមទីទួលសុវត្ថិភាព និងកន្លែងទំនាបនានាដែលប្រជាពលរដ្ឋស្នាក់-នៅ និងឆ្លងកាត់ ដើម្បីបញ្ជៀសគ្រោះថ្នាក់ដោយសារមីន និងសំណល់ជាតិផ្ទុះពីសង្គ្រាម។
២) ផ្សព្វផ្សាយជាប្រចាំដល់ប្រជាពលរដ្ឋ សិស្សានុសិស្ស កុមារា និងកុមារី ឲ្យមានការប្រុងប្រយ័ត្នខ្ពស់ពីគ្រោះថ្នាក់ដោយសារមីន និងសំណល់ជាតិផ្ទុះពីសង្គ្រាម និងពេលប្រទះឃើញ គ្រាប់ទាំងនោះ សូមរាយការណ៍មកអាជ្ញាធរមូលដ្ឋាន មេភូមិ មេឃុំ ឬ ប្រតិបត្តិករបោស សម្អាតមីនដែលនៅទីនោះជាបន្ទាន់ ដើម្បីយកគ្រាប់ទាំងនោះទៅកំទេចចោល។
៣) រៀបចំខ្លឹមសារផ្សព្វផ្សាយ និងផលិតជាសម្ភារអប់រំ សម្រាប់ផ្តល់ជូនភ្នាក់ងារអប់រំកាត់បន្ថយគ្រោះថ្នាក់ដោយសារមីន និងសំណល់ជាតិផ្ទុះពីសង្គ្រាម បណ្តាញមីនស្ម័គ្រចិត្តសហគមន៍ លោកគ្រូ អ្នកគ្រូ ដើម្បីជាមធ្យោបាយសម្រាប់ធ្វើការអប់រំផ្ទាល់ដល់ប្រជាពលរដ្ឋ និងសិស្សានុសិស្ស ក្នុងតំបន់រងគ្រោះ ដោយសារទឹកជំនន់។
៤) ធ្វើការឆ្លើយតបឲ្យបានទាន់ពេលវេលា ក្នុងការប្រមូលយកទៅកំទេចចោលនូវមីន និងសំណល់ ជាតិផ្ទុះពីសង្គ្រាមដែលប្រជាពលរដ្ឋបានរាយការណ៍។
៥) ដាក់ស្លាកសញ្ញាសំគាល់ជាបន្ទាន់ នៅតាមតំបន់សង្ស័យមានមីន និងគ្រោះថ្នាក់ដោយសារមីន និងសំណល់ជាតិផ្ទុះពីសង្គ្រាម ដែលអាចហូរតាមទឹក និងដីល្បាប់ ដើម្បីទប់ស្កាត់កុំ ឲ្យប្រជាពលរដ្ឋចូលទៅស្នាក់នៅ ឬ ឆ្លងកាត់។
៦) បន្តចុះអប់រំពីគ្រោះថ្នាក់ដោយសារមីន និងសំណល់ជាតិផ្ទុះពីសង្គ្រាម ឲ្យបានជាប់ជាប្រចាំ ដល់ប្រជាពលរដ្ឋដែលកំពុងស្នាក់នៅបណ្តោះអាសន្ន តាមទីទួល សុវត្ថិភាពនានា ក៏ដូចជាតំបន់ ដទៃទៀតធ្វើយ៉ាងណាកុំឲ្យប្រជាពលរដ្ឋរងគ្រោះថ្នាក់ ដោយសារមីន និងសំណល់ជាតិផ្ទុះពីសង្គ្រាម ក្នុងពេល និងក្រោយពេល គ្រោះទឹកជំនន់៕
ដោយ៖បញ្ញាស័ក្តិ
