ភ្នំពេញ៖ក្រោយត្រូវតុលាការកាត់ទោសឱ្យជាប់ពន្ធនាគារយៈពេល១៨ខែ និងអនុវត្តទោសត្រឹម៥ខែ២៨ថ្ងៃ ពេលនេះលោក សុវណ្ណ រិទ្ធី បានចេញពីពន្ធនាគារវិញហើយ ហើយបានបួសដើម្បីសងគុណឪពុកម្តាយរបស់លោក នេះបើតាមទំព័រហ្វេសបុកផ្លូវការរបស់លោកបានបង្ហោះនៅមុននេះបន្តិច។
ដូចពាក្យចាស់លោកពោលថា ក្រោយភ្លៀងមេឃនឹងប្រែជាស្រឡះ លោក សុវណ្ណ រិទ្ធី អគ្គនាយក Tv FB ក៏មិនខុសគ្នានោះដែរ ក្រោយពីទទួលរងនូវព្យុះព្យោមារហូតត្រូវបាត់បង់ក្រុមហ៊ុន ដែលជាវេបសាយព័ត៌មានដ៏ពេញនិយម និងទទួលបានការគាំទ្រយ៉ាងខ្លាំងក្លាពីអ្នកលេងបណ្តាញសង្គម ឯខ្លួនក៏ត្រូវជាប់ពន្ធនាគា ពេលនេះបានមានសេរីភាពវិញហើយ ក្រោយតុលាការសម្រេចកាត់ទោស១៨ខែ តែអនុវត្តទោសត្រឹម៥ខែ២៨ថ្ងៃ ចំណែកទោសនៅសល់ត្រូវព្យួរនោះ។
ក្រោយពីចេញពីពន្ធនាគារបានប្រមាណ៥ថ្ងៃ នារសៀលថ្ងៃទី១០តុលានេះ លោកបានបង្ហោះរូបភាពមួយចំនួនក្នុងគណនីហ្វេសប៊ុករបស់ខ្លួន ដែលបង្ហាញពីសកម្មភាពលោកកំពុងកោរសក់សាងផ្នួស ដើម្បីសងគុណឪពុកម្តាយរបស់លោក ជាមួយនិង Caption ក្តីប្រាថ្នាទី១របស់ខ្ញុំ សូមបួសសងគុណលោកឪពុកអ្នកម្តាយ។
គួររំលឹកផងដែរថា លោក សុវណ្ណ រិទ្ធី ត្រូវបានសមត្ថកិច្ចចាប់ខ្លួនកាលពីយប់ថ្ងៃទី៧មេសា ឆ្នាំ២០២០ នៅក្នុងបុរីពិភពថ្មី ខណ្ឌសែនសុខ រាជធានីភ្នំពេញ ដោយលោកត្រូវបានតុលាការចោទប្រកាន់ និងឃុំខ្លួនពីបទញុះញង់ឲ្យមានចលាចលក្នុងសង្គម និងឃុំខ្លួននៅពន្ធនាគារព្រៃសជាបណ្តោះអាសន្ន ក្រោយពីបានបង្ហោះវីដេអូកាត់តមួយដែលធ្វើឲ្យប៉ះពាល់កិត្តិយសថ្នាក់ដឹកនាំរាជរដ្ឋាភិបាល៕ ដោយ៖ កូលាប ក្រហម
