ភ្នំពេញ៖ អភិបាលរាជធានីភ្នំពេញបន្តណែនាំដល់កងកម្លាំងរាជអាវុធហត្ថឱ្យបន្តជួយការងារសង្គម និងទប់ស្កាត់ក្រុមជ្រុលនិយមក្បត់ជាតិដែលចង់បំផ្លាញសន្តិភាពនៅកម្ពុជា ដើម្បីធានាបានសុខសុវត្ថិភាពជូន ប្រជាពលរដ្ឋរស់នៅដោយសុខក្សេមក្សាន្តក្នុងម្លប់សន្តិភាព ។
ការណែនាំបែបនេះរបស់លោកឃួង ស្រេង បានធ្វើឡើងកាលពីព្រឹកថ្ងៃទី១២តុលានេះ ក្នុងពិធីសម្ពោធដាក់ឱ្យប្រើប្រាស់អគាររដ្ឋបាលមូលដ្ឋានកងរាជអាវុធហត្ថខណ្ឌដូនពេញ ដែលមានទីតាំងនៅមុខវត្តបទុមវតី ក្នុងសង្កាត់ចតុមុខខណ្ឌដូនពេញ។
លោកឃួង ស្រេង អភិបាលរាជធានីភ្នំពេញបានលើកឡើងថា កងរាជអាវុធហត្ថរាជធានីភ្នំពេញ ត្រូវបន្តត្រៀមលក្ខណៈជាប់ជាប្រចាំជាមួយអាជ្ញាធរមូលដ្ឋានលើការងារជួយសង្គ្រោះ ក្នុងហេតុការណ៍ណាមួយដូចជាគ្រោះមហន្តរាយ គ្រោះអគ្គិភ័យនិងការអន្តរាគមន៍ចំពោះករណីគ្រោះទឹកជំនន់ទឹកភ្លៀងដែលអាចកើតមានឡើងជាយថាហេតុ ។
លោកបានបញ្ជាក់ថា កិច្ចការងារជួយសង្គមបន្ថែមនេះ គឺបានជួយសម្រាលការលំបាករបស់ប្រជាពលរដ្ឋបានជាច្រើន ខណៈដែលកងកម្លាំងរាជអាវុធហត្ថរាជធានីភ្នំពេញបានបំពេញការងារស្នូររបស់ខ្លួនយ៉ាងសកម្ម ដូចជាការបង្ក្រាបបទល្មើសនិងបញ្ហាអសន្តិសុខសង្គមនានា ដែលធានាបានសុវត្ថិភាពជូនប្រជាពលរដ្ឋនៅមូលដ្ឋាន។
លោកអភិបាលរាជធានីភ្នំពេញក៏បានបន្តអំពាវនាវដល់កម្លាំងសមត្ថកិច្ចនេះឱ្យត្រៀមលក្ខណៈជួយអន្តរាគមន៍ ការពារសុវត្ថិភាពសង្គម និងការពារសន្តិភាពឱ្យបានគង់វង្ស ខណៈដែលក្រុមជ្រុលនិយម នៅក្រៅច្បាប់មិនទាន់លះបង់គំនិតបំផ្លាញសេចក្តីសុខ និងសុខសន្តិភាពរបស់កម្ពុជានៅឡើយទេ។
ជាក់ស្តែងមេដឹកនាំសហជីពខ្លះមួយចំនួនបានបំផុសឱ្យកម្មករកម្មការិនី ក្រុមសេដ្ឋកិច្ចក្រៅប្រព័ន្ធធ្វើកូដកម្មមិនចូលធ្វើការងារ ក្រោមហេតុផលមិនសមរម្យនិងមានចរឹកនយោបាយញុះញ៉ុង រុញឱ្យខ្លោចដុតឱ្យឆៅ ដើម្បីទាមទារអត្ថប្រយោជន៍ផ្សេងៗផ្ទុយពីច្បាប់ ។
លោកក៏បាន ណែនាំឱ្យកម្លាំងសមត្ថកិច្ចទាំងអស់មិនត្រូវធ្វេសប្រហែសបានឡើយ ដោយត្រូវគោរពតាមបទបញ្ជាឱ្យបានម៉ឺងម៉ាត់ ដើម្បីត្រៀមការពារកុំឱ្យពួកក្រុមឧទ្ទាម ពួកក្បត់ជាតិបានសម្រេចបំណងប្រាថ្នាបំផ្លាញរាជរដ្ឋាភិបាលស្របច្បាប់ដែលកើតចេញពីការបោះឆ្នោត ។ កម្លាំងប្រដាប់អាវុធយើងមិនត្រឹមតែបំពេញការងារសន្តិសុខ សណ្តាប់ធ្នាប់សាធារណៈប៉ុណ្ណោះទេ ។ ប៉ុន្តែថែមទាំងជាកម្លាំងត្រៀមអន្តរាគមន៍ដ៏មានប្រសិទ្ធភាពលើកគ្រប់ភារកិច្ចសង្គមទាំងអស់ ។ ត្រៀមរង់ចាំអនុវត្តន៍បទបញ្ជារបស់រាជរដ្ឋាភិបាលក្នុងករណីផែនការទប់ស្កាត់វិលត្រឡប់ចូលស្រុកជាលើកទី២ របស់ទណ្ឌិត សមរង្ស៊ីនិងបក្ខពួក ដើម្បីធានាប្រក្រតីភាពសង្គម រក្សាជីវភាពរស់នៅរបស់បងប្អូនប្រជាពលរដ្ឋ និងធានាបាននូវការអនុវត្តច្បាប់ឱ្យមានប្រសិទ្ធភាពខ្ពស់ ចំពោះមេខ្លោងបដិវត្តន៍ពណ៌ »។
មានមតិក្នុងពិធីនេះដែរ ឯកឧត្តម ឃួង ស្រេង បានមានប្រសាសន៍ កោតសរសើរចំពោះកងរាជអាវុធហត្ថ រាជធានីភ្នំពេញ ដែលបានរួមចំណែកយ៉ាងសកម្មក្នុងការការពាររាជរដ្ឋាភិបាលស្របច្បាប់ រក្សាស្ថេរភាពនយោបាយ ប្រឆាំងទប់ស្កាត់រាល់ឧបាយកលប៉ុនប៉ងបង្កវិទ្ធង្សនា បដិវត្តពណ៌ បង្ក្រាបបទល្មើសព្រហ្មទណ្ឌគ្រប់ប្រភេទ ការពារអាយុជីវិត ទ្រព្យសម្បត្តិ ប្រជាពលរដ្ឋ រក្សាសុវត្ថិភាពនិងសណ្តាប់ធ្នាប់ ក្នុងមូលដ្ឋានរាជធានីភ្នំពេញ និងបានខិតខំកសាងនូងសំណង់ អគាររដ្ឋបាល កន្លែងធ្វើការបានសមរម្យនិងមានស្ទង់ដាតែមួយ។
លោក ឧត្តមសេនីយ៍ឯក រ័ត្ន ស្រ៊ាង មេបញ្ជាការរង កងរាជអាវុធហត្ថលើផ្ទៃប្រទេស និងជាមេបញ្ជាការ កងរាជអាវុធហត្ថរាជធានីភ្នំពេញ បានមានប្រសាសន៍ថា មុននឹងឈានទៅដល់ការកសាងអគាររដ្ឋបាលខណ្ឌ ដូនពេញ និងខណ្ឌ ៧មករា បានផ្តើមចេញពីការជួសជុលកែលំអ កសាងថ្មី ហេដ្ឋារចនាសម្ពន្ធទីបញ្ជាការ កងរាជអាវុធហត្ថរាជធានីភ្នំពេញ ជាបន្តបន្ទាប់ក្នុងរយៈកាលកន្លងមក និងយកជាគំរូ កែលំអ កសាងថ្មី នៅតាមបណ្តាមូលដ្ឋានកងរាជអាវុធហត្ថ ខណ្ឌទាំង ១៤ ឱ្យមានការឯកភាពគ្នាតាមគំរូ និងស្ទង់ដាតែមួយ។
ក្នុងនេះដែរ លោកនាយឧត្តមសេនីយ៍ សៅ សុខា មានប្រសាសន៍ថា អគារនេះនិងដើរតួនាទី យ៉ាងសំខាន់សម្រាប់កម្លាំងកងរាជអាវុធហត្ថខណ្ឌ ក៏ដូចជាកងរាជអាវុធហត្ថរាជធានីភ្នពេញ ស្នាក់នៅ ធ្វើការ ដើម្បីរួមជាមួយនិងអាជ្ញាធរ កងកម្លាំងមានសមត្ថកិច្ច ប្រតិបត្តិនូវតួនាទី ភារកិច្ច ក្នុងការការពារសន្តិសុខ សណ្តាប់ធ្នាប់ ពង្រឹងការអនុវត្តច្បាប់ កសាងនីតិរដ្ឋនៅព្រះរាជាណាចក្រកម្ពុជា។ លោក នាយឧត្តមសេនីយ៍ ក៏បានថ្លែងនូវអំណរគុណ ឯកឧត្តម ឃួន ស្រេង អភិបាលរាជធានីភ្នំពេញ សាលារាជធានីភ្នំពេញ សាលាខណ្ឌដូនពេញ ដែលបានផ្តល់ទីតាំងនិងគាំទ្រដល់ដំណើរសាងសង់ និងថ្លែងនូវការកោតសរសើរ លោក ឧត្តមសេនីយ៍ឯក រ័ត្ន ស្រ៊ាង ដែលបានដឹកនាំកៀងគរចលនាសប្បុរសជន ប្រមូលមូលិធិសម្រាប់ដំណើរការ ការសាងសង់សំណង់នេះ និងថ្លែងនូវអំណរគុណយ៉ាងជ្រាលជ្រៅចំពោះសប្បុរសជន ដែលបានបរិច្ចាកថវិកា ទ្រព្យសម្បតិ្តផ្ទាល់ខ្លួន ជួយឧបត្ថម្ភ ធ្វើអោយសំណង់មួយនេះ បានកកើតឡើងជារូបរាងពិតប្រាកដ ព្រមទាំងជូនពរដល់ឯកឧត្តម លោកជំទាវ លោកឧកញ៉ា លោក លោកស្រី ទាំងអស់សូមប្រកបដោយ សុខភាពល្អ បរិបូរ សុភមង្គល និងទទួលបានជោគជ័យគ្រប់ភារកិច្ច ព្រមទាំងចំរ៉ុងចំរើនក្នុងការប្រកបរបរអាជីវកម្ម។ លោក នាយឧត្តមសេនីយ៍ សៅ សុខា បានបន្តថា ដើម្បីអនុវត្តតួនាទី ភារកិច្ច មេបញ្ជាការកងរាជអាវុធហត្ថលើផ្ទៃប្រទេស បានដាក់ចេញនូវកិច្ចការអាទិភាព ៧ ធ្វើជាមូលដ្ឋានសម្រាប់ធ្វើសកម្មភាព ១. ការហូបចុក ២. ស្លៀកពាក់ ៣. ការសាងសង់សំណង់អគារសម្រាប់ស្នាក់នៅ ធ្វើការ រៀនសូត្រ ៤. ការថែទាំសុខភាព ៥. ការអប់ររំ ហ្វឹកហ្វឺននិងរៀនសូត្រ ៦. ការធានាមធ្យោបាយធ្វើដំណើរ ឧបករណ៍ សម្ភារ គ្រឿងបំពាក់ និង៧. កម្សាន្ត លំហែរ និងគោលនយោបាយសរសើរ លើកទឹកចិត្ត ព្រមទាំងដោះស្រាយនៅពេលជួបទុក្ខលំបាក។ ពិធីដែលកំពុងដែលប្រារព្ធនាពេលនេះ ស្ថិតនៅក្នុងការងារអាទិភាពទី៣ ដូច្នេះគ្មានការងារដែលកងរាជអាវុធហត្ថ ធ្វើហើយគ្មានផែនការ ឬគ្មានការគិតទុកជាមុននោះទេ។ ជាមួយគ្នានេះដែរ លោក នាយឧត្តមសេនីយ៍ មេបញ្ជាការ បានរំលឹកដល់កងរាជអាវុធហត្ថ ខណ្ឌដូនពេញ ក៏ដូចជា កងរាជអាវុធហត្ថទូទាំងប្រទេស ១. ទម្រាំកសាងនូវអគារមួយនេះឡើង ពិតជាលំបាក ចំណាយពេលវេលានិងថវិកា ដោយមានការចូលរួមជាច្រើនប្រភព សូមអស់លោកយកចិត្តទុកដាក់ថែទាំ និងប្រើប្រាស់បានយូរអង្វែង ២.ត្រូវបន្តខិតខំប្រឹងប្រែងថែមទៀត ក្នុងការអនុវត្តតួនាទី ភារកិច្ច ពិសេសត្រូវតាមដាននិងក្តាប់ជាប់នូវព័ត៌មានប្រែប្រួល ការងារអប់រំ ពង្រឹងការងារនីតិវិធី ធ្វើជាគំរូល្អក្នុងការគោរពវិន័យកងទ័ព គំរូក្នុងការប្រតិបត្តិច្បាប់ ប្រកាន់ខ្ជាប់ក្រមសីលធម៌វិជ្ជាជីវៈ និងប្តេជ្ញាការពារដាច់ខាត ច្បាប់រដ្ឋធម្មនុញ្ញ ៣.ទោះបីកម្ពុជា ការពារបាននូវការរាលដាលជំងឺកូវីដ១៩ ក៏ដោយ ត្រូវបន្តគោរពនូវវិធានប្រយុទ្ធប្រឆាំងកូវីដ១៩ តបតាមការក្រើនរំលឹករបស់ សម្តេចតេជោ ប្រមុខរាជរដ្ឋាភិបាល និងក្រសួងសុខាភិបាល បន្តអនុវត្តអាវុធហត្ថម្នាក់ៗ សុវត្ថិភាព បន្ទាយសុវត្ថិភាព គ្រួសារសុវត្ថិភាព សង្គមទាំងមូលសុវត្ថិភាព ៤.យកចិត្តទុកដាក់ចុះបញ្ជីដីធ្លីនិងធ្វើបណ្ណសំគាល់អចលនទ្រព្យ តាមការណែនាំរបស់ក្រសួងការពារជាតិ និង៥.
បន្តអនុវត្តនូវពាក្យស្លោក ជួយគិត ជួយធ្វើ និងរួមគ្នាទទួលខុសត្រូវ និងទិសស្លោក ចំពោះប្រទេសជាតិ ត្រូវតែការពារ ប្រជាត្រូវតែបម្រើ ច្បាប់ត្រូវតែគោរព បទល្មើសត្រូវតែបង្ក្រាប។ ដើម្បីរួមចំណែកក្នុងការចំណាយសាងសង់នេះ លោក នាយឧត្តមសេនីយ៍ សៅ សុខា និងចលនារកការគាំទ្រថវិកាចំនួន ដប់ម៉ឺនដុល្លារ ដើម្បីរួមចំណែកក្នុងការកសាងនៅថ្ងៃនេះ។
លោកនាយឧត្តមសេនីយ៍ សៅ សុខា អគ្គមេបញ្ជាការរងនៃកងយោធពលខេមរភូមិន្ទ និង ជាមេបញ្ជាការកងរាជអាវុធហត្ថលើផ្ទៃប្រទេស បានមានប្រសាសន៍ផងដែរថា កងរាជអាវុធហត្ថទាំងអស់ត្រូវបន្តខិតខំប្រឹងប្រែងបន្ថែមទៀត ព្រោះថានាពេលខាងមុខសភាពការណ៍ពិបាកនឹងសន្និដ្ឋាន ដោយសារជំងឺកូវីដ១៩និងឧបាយកលបំផ្លាញសន្តិភាពមិនដឹងថាបទល្មើសអ្វីខ្លះវានឹងអាចកើតមានឡើង ពិសេសត្រូវយកចិត្តទុកដាក់លើវិធានការតាមដានក្តាប់ឱ្យជាប់នូវរាល់ព័ត៌មានប្រែប្រួល ការងារអប់រំពង្រឹងផ្នែកនិតិវិធី ធ្វើជាគំរូល្អសម្រាប់ការគោរពវិន័យកងទ័ព គំរូក្នុងការប្រតិបត្តិច្បាប់ ប្រកាន់ខ្ជាប់ក្រមសីលធម៌វិជ្ជាជីវៈនិងប្តេជ្ញាការពារដាច់ខាតច្បាប់រដ្ឋធមនុញ្ញ ។
ដើម្បីសម្រេចបានភារកិច្ចទាំងអស់នេះលោក សៅ សុខាបានដាក់ទិសស្លោក ជួយគិត ជួយធ្វើ រួមគ្នាទទួលខុសត្រូវ។ចំពោះប្រទេសជាតិវិញត្រូវតែការពារ បម្រើប្រជាពលរដ្ឋហើយរាល់បទល្មើសត្រូវតែបង្គ្រាប ៕ដោយ៖បញ្ញាស័ក្តិ