កំពង់ស្ពឺ ៖ នាព្រឹកថ្ងៃទី ១៤ ខែតុលា ឆ្នាំ២០២០ ឯកឧត្តម ហ៊ុន ម៉ានី អ្នកតំណាងរាស្ត្រមណ្ឌលខេត្តកំពង់ស្ពឺ បានអញ្ជើញចុះពិនិត្យស្ថានភាពជំនន់ទឹកភ្លៀងនៅទំនប់ចាន់ថ្នាល ដែលស្ថិតនៅក្នុងឃុំក្រាំងចេក ស្រុកឧដុង្គ អមដំណើរដោយ ឯកឧត្តម វ៉ី សំណាង អភិបាល នៃគណៈអភិបាលខេត្តកំពង់ស្ពឺ មន្ទីរអង្គភាពជំនាញពាក់ព័ន្ធ កម្លាំងប្រដាប់អាវុធទាំងបី និង សសយក ខេត្ត ។
នាក្នុងឱកាសសំណេះសំណាលនោះដែរ ឯកឧត្តម ហ៊ុន ម៉ានី ក៏បានសម្ដែងនូវការសោកស្ដាយចំពោះប្រជាពលរដ្ឋនៅផ្នែកខាងក្រោមដែលទទួលរងផលប៉ះពាល់តិចតួចដោយសារជំនន់ទឹកភ្លៀងបានវាយបំផ្លាញដំណាំស្រូវ និងដំណាំរួមផ្សំមួយចំនួន ។ ឯកឧត្តម ក៏បានអំពាវនាវឲ្យបងប្អូនប្រជាពលរដ្ឋដែលរស់នៅតាមតំបន់នេះត្រូវតែបង្កើនការការប្រុងប្រយ័ត្នខ្ពស់ក្នុងការធ្វើដំណើរលើទំនប់បង្ហៀរទឹកនេះ ជាពិសេសមនុស្សចាស់ជរា និងក្មេងៗ ក៏ដូចជាអាជ្ញាធរមូលដ្ឋានត្រូវប្រចាំការជួយសម្រួលចរាចរណ៍ដល់បងប្អូនប្រជាពលរដ្ឋ និងសង្គ្រោះ ២៤ម៉ោងលើ ២៤ម៉ោងក្នុងករណីមានហេតុការណ៍ណាមួយកើតឡើងជាយថាហេតុ ។
បន្ទាប់ពីចុះពិនិត្យស្ថានភាពទំនប់ទឹកចាន់ថ្នាលរួចមកឯកឧត្តម ហ៊ុន ម៉ានី អ្នកតំណាងរាស្ត្រមណ្ឌលខេត្តកំពង់ស្ពឺ ក៏បានបន្តដំណើរចុះពិនិត្យស្ថានភាពកម្ពស់ទឹកនៅតាមដងស្ទឹងព្រែកត្នោត និងចូលរួមពិភាក្សាការងារអំពីបញ្ហាប្រព័ន្ធធារាសាស្ត្រជាមួយនឹងរដ្ឋបាលខេត្ត និងស្ដាប់ពីបទបង្ហាញរបស់លោកប្រធានមន្ទីរធនធានទឹក និងឧតុនិយម ដើម្បីរកវិធីសាស្ត្រកាត់បន្ថយបញ្ហាប្រឈមមួយនេះ ឲ្យស្ថិតនៅក្នុងកម្រិតទាបបំផុត ។
ឯកឧត្តមហ៊ុន ម៉ានី អ្នកតំណាងមណ្ឌលកំពង់ស្ពឺ បានថ្លែងថា ក្រៅពីបានធ្វើការណែនាំដោយផ្ទាល់ ក៏ដូចជាបានចូលរួមធ្វើការផ្សព្វផ្សាយពីការអំពាវនាវរបស់រាជរដ្ឋាភិបាល ថ្ងៃនេះក្រុមការងារ បានចុះពិនិត្យស្ថានភាពជាក់ស្តែងនៅទីតាំងដែលរងគ្រោះក្នុងមូលដ្ឋានខេត្តកំពង់ស្ពឺ ដើម្បីក្តាប់ស្ថានការណ៍ តាមដាន និងវាយតម្លៃពីភាពចាំបាច់នានា ជាពិសេសសកម្មភាពដែលត្រូវអនុវត្តជាបន្ទាន់ ដើម្បីជួយដោះស្រាយ និងសម្រាលទុក្ខលំបាកប្រជាពលរដ្ឋ។
ក្នុងដំណើរចុះពិនិត្យនេះដែរ ក្រុមការងារ បានកត់សម្គាល់ឃើញថាសកម្មភាពការចុះជួយរបស់អាជ្ញាធរមូលដ្ឋានក្នុងការរក្សាសុខសុវត្ថិភាពរបស់ប្រជាជនកន្លងមក គឺមានភាពហ្មត់ចត់ល្អប្រសើរ ស្របតាមចំណាត់ការ និងការណែនាំរបស់សម្តេចតេជោ ហ៊ុន សែន ដោយគិតមកទល់ពេលនេះ មិនទាន់មានករណីរប៉ះពាល់ធ្ងន់ធ្ងរខ្លាំងណាមួយគួរឱ្យកត់សម្គាល់នៅឡើយ ខណៈដែរប្រជាពលរដ្ឋរងការប្រឈមត្រូវបានជម្លៀសមកកាន់ទីទួលសុវត្ថិភាពទាន់ពេលវេលា ហើយផលប៉ះពាល់លើទ្រព្យសម្បត្តិវិញនៅមានការវាយតម្លៃជាបន្តបន្ទាប់។ តែទោះជាយ៉ាងណា អ្វីដែលជាការឆ្លើយតបរបស់អាជ្ញាធរចំពោះស្ថានភាពបច្ចុប្បន្ន គឺមានលក្ខណៈប្រសើរប្រកបដោយប្រសិទ្ធភាព។
ទន្ទឹមនឹងលទ្ធផលដ៏ប្រសើរនេះ យើងខ្ញុំពិតជាមានការសោកស្តាយ ចំពោះការខូចខាត និងប៉ះពាល់លើជីវភាពប្រចាំថ្ងៃរបស់បងប្អូនប្រជាពលរដ្ឋ មិនថាតែនៅខេត្តកំពង់ស្ពឺផ្ទាល់ ឬតាមបណ្តាខេត្តនានា។ប៉ុន្តែនៅក្នុងស្ថានភាពដែលទឹកជំនន់មិនទាន់មានការស្រាកស្រាន្ត សូមបងប្អូនប្រជាពលរដ្ឋទាំងអស់ បន្តការតាមដាន និងបង្កើនការប្រុងប្រយ័ត្នខ្ពស់ជាប់ជានិច្ច ដើម្បីរក្សាសុវត្ថិភាព និងអាយុជីវិតខ្លួនឯងផ្ទាល់ ក៏ដូចជាក្រុមគ្រួសារ ព្រោះថាក្នុងដំណាក់កាលនេះ កត្តាអាយុជីវិត គឺជារឿងសំខាន់បំផុត រីឯបញ្ហាផ្សេងៗទៀត យើងនឹងរួមគ្នាដោះស្រាយនៅពេលក្រោយ។
ឆ្លៀតក្នុងឱកាសនេះដែរ សូមស្ថាប័ន និងវិស័យពាក់ព័ន្ធ រួមមាន វិស័យសុខាភិបាល ធនធានទឹក និងឧតុនិយម និងវិស័យផ្សេងៗទៀត មានការសហការជាពិសេសជាមួយអាជ្ញាធរមូលដ្ឋានដែលបានអនុវត្តចុះជួយកន្លងមក ដោយបន្ថែមការយកចិត្តទុកដាក់ខ្ពស់ចំពោះស្ថានភាពជាក់ស្ដែង និងត្រៀមខ្លួនគ្រប់គ្រង ក៏ដូចជាបញ្ជៀសហានិភ័យនានាដែលអាចបង្កនូវផលលំបាក ដល់បងប្អូនប្រជាពលរដ្ឋ ដោយប្រើប្រាស់គ្រប់មធ្យោបាយឱ្យអស់ពីលទ្ធភាព និងសមត្ថភាពទាំងអស់គ្នា៕ដោយ៖បញ្ញាស័ក្តិ
