បន្ទាយមានជ័យ៖ នៅថ្ងៃទី១៤ ខែតុលា ឆ្នាំ២០២០នេះ ពន្ធនាគារខេត្តបន្ទាយមានជ័យ បានជន់លិចដោយទឹកជំនន់ ហើយអ្នកជាប់ឃុំទាំងអស់ ត្រូវបានបន្តដឹកជម្លៀសទៅពន្ធនាគារខេត្តផ្សេងៗ ដែលនៅក្បែរ ក្នុងនោះមាននៅពន្ធនាគារខេត្តសៀមរាប។
របាយការណ៍បានឲ្យដឹងថា ចំនួនជនជាប់ឃុំក្នុងពន្ធនាគារនេះមានជាង១.៦០០នាក់ ក្នុងនោះស្រី១០០នាក់ត្រូវបាន ជម្លៀសចេញទៅពន្ធនាគារខេត្តផ្សេងដែលនៅក្បែរ ដើម្បីកុំឲ្យមានហានិភ័យអ្វីកើតឡើង។
លោក អ៊ុង ស៊ីផាន ប្រធានពន្ធនាគារខេត្តបន្ទាយមានជ័យ បានឲ្យដឹងថា ជនជាប់ឃុំក្នុងពន្ធនាគារនេះមានចំនួនជាង១.៦០០នាក់ ក្នុងនោះស្រី១០០នាក់។ ទឹកបានហូរចូលមកក្នុងពន្ធនាគារខេត្តបន្ទាយមានជ័យ យ៉ាងគំហុកធ្វើឲ្យមានការលិចអគាររដ្ឋបាល និងបន្តហូរចូលទៅក្នុងអគារស្នាក់នៅរបស់ជនជាប់ឃុំ។
លោក នុត សាវនា អ្នកនាំពាក្យអគ្គនាយកដ្ឋានពន្ធនាគារនៃក្រសួងមហាផ្ទៃ បានប្រសាសន៍ប្រាប់កាសែតក្នុងស្រុកថា ពន្ធនាគារដែលប្រឈមនឹងគ្រោះទឹកជំនន់ រួមមាន ពន្ធនាគារខេត្តបាត់ដំបង និងពន្ធនាគារព្រៃស នៅរាជធានីភ្នំពេញ ខណៈពន្ធនាគារខេត្តបន្ទាយមានជ័យទឹកបានជន់លិចហើយ។
លោកបន្តថា កម្លាំងសមត្ថកិច្ចបានត្រៀមខ្លួនរួចជាស្រេចហើយសម្រាប់ការពារនិងជម្លៀសអ្នកជាប់ឃុំទៅកាន់ពន្ធនាគារផ្សេង ប្រសិនបើជំនន់ទឹកភ្លៀងនៅបន្តកើនឡើង។ លោកបន្តថា អ្វីដែលជាក្តីបារម្ភនោះ គឺអ្នកជាប់ឃុំនៅពន្ធនាគារទាំងពីរនេះមានចំនួនច្រើន និងភាគច្រើនជាឧក្រិដ្ឋជន។
ចំពោះអ្នកជាប់ឃុំចំនួន១.៦១០នាក់ នៅពន្ធនាគារខេត្តបន្ទាយមានជ័យ លោក នុត សាវនា បានបញ្ជាក់ថា កម្លាំងសមត្ថកិច្ចពាក់ព័ន្ធ បានជម្លៀសពួកគេទៅកាន់ពន្ធនាគារនៅខេត្តចំនួន៤ រួមមាន ខេត្តសៀមរាប ចំនួន៨១១នាក់, កំពង់ធំ ២០០នាក់, ឧត្ដរមានជ័យ ២០០នាក់ និងត្បូងឃ្មុំជាង៤០០នាក់។ លោកបន្តថា ការដែលអាជ្ញាធរយកអ្នកជាប់ឃុំទៅដាក់ទីតាំងផ្សេងៗគ្នា ដើម្បីកាត់បន្ថយភាពចង្អៀតក្នុងពន្ធនាគារ៕ដោយ៖បញ្ញាស័ក្តិ