ខេត្តកណ្តាល៖ រថយន្តឡិចស៊ីស បើកបុករថយន្តដឹកក្រុមតន្ត្រីសម័យទាំងកំរោល ដែលកំពុងឈប់លើចិញ្ចើម បណ្តាលឲ្យស្លាប់អ្នកចម្រៀង ប្រុសស្រី២នាក់ រួចបន្តទៅបុកផ្ទះប្រជាពលរដ្ឋខូចខាតអស់១ខ្នងទៀត កាលពីវេលាម៉ោង១ រំលងអធ្រាត្រឈានចូលថ្ងៃទី១១ ខែកុម្ភៈ ឆ្នាំ២០១៨ ស្ថិតនៅបណ្តោយផ្លូវលេខ២១ ភូមិថ្នល់បំបែក ឃុំទឹកវិល ស្រុកស្អាង ខេត្តកណ្តាល ។
រថយន្តបង្កម៉ាកឡិចស៊ីស RX300 ពណ៌ស ពាក់ស្លាកលេខ ភ្នំពេញ1AE-5120 អ្នកបើកបរមិនស្គាល់អត្តសញ្ញាណដោយរត់គេចបាត់ក្រោយពេលបង្កហេតុ ។ ចំណែកក្រុមតន្ត្រីសម័យនាយឆ្លាមដែលស្លាប់ឈ្មោះ ចាន់ សុភា ភេទប្រុសអាយុ២៥ឆ្នាំ មានទីលំនៅភូមិព្រែកថ្មី ឃុំព្រែកអំបិល ស្រុកស្អាង ខេត្តកណ្ដាល និងឈ្មោះ អន ស្រីអូន ភេទស្រី អាយុ១៤ឆ្នាំ រស់នៅភូមិគរ ឃុំក្រាំងយ៉ូវ ស្រុកស្អាង ខេត្តកណ្ដាល។ ចំណែកម្ចាស់ផ្ទះដែលរងការខូចខាតនោះឈ្មោះ អាំង ស្រី ភេទប្រុស អាយុ៧០ឆ្នាំ។
មុនពេលកើតហេតុ ជនរងគ្រោះទាំង២នាក់បានបើករថយន្ត មកឈប់មុខផ្ទះឈ្មោះ ហៃ ឃាង ផ្លូវលេខ២១ ដើម្បីទម្លាក់សម្ភារៈតន្ត្រីសម័យ ដោយបើកចូលផុត ពីចិញ្ចើមផ្លូវរួចលើកដែករោងអ័កកាដង់ ដាក់លើចិញ្ចើមផ្លូវ ស្របពេលនោះ រថយន្តបង្ក បើកមកយ៉ាងលឿនបុកជនរងគ្រោះទាំង២នាក់ កំពុងលើកដែករោងបណ្តាលឲ្យស្លាប់ទាំង២នាក់ នៅនឹងកន្លែង ចំណែករថយន្តបង្ក បន្តទៅមុខទៀតបុកផ្ទះប្រជាពលរដ្ឋមួយខ្នងទៀត បណ្តាលឲ្យខូចខាតយ៉ាងដំណំ រួមនិងសម្ភារៈមួយចំនួនផងដែរ តែសំណាងល្អ មិនបណ្តាលឲ្យរងរបួស ដល់ម្ចាស់ផ្ទះនោះទេ។ អ្នកបើករថយន្តបង្កបានរត់គេចខ្លួន បាត់បន្សល់ទុករថយន្តចោល នៅកន្លែងកើតហេតុ៕ ដោយ៖បញ្ញាស័ក្តិ
