បាត់ដំបង៖របាយការណ៍បឋមនៃគ្រោះមហន្តរាយខេត្តបាត់ដំបងគិតមកដល់ថ្ងៃទី១៤ខែតុលានេះ បានបង្ហាញថា យ៉ាងហោចណាស់មានប្រជាពលរដ្ឋ ដែលកំពុងតែទទួលរង នូវផលប៉ះពាល់ដោយជំនន់ទឹកភ្លៀងក្នុងខេត្តកន្លងមកនេះ វាបានកើនឡើងដល់៧.៦៦១គ្រួសារហើយ។ បងប្អូនដែលត្រូវជម្លៀសចេញនិងជួយសង្គ្រោះ ឲ្យមកកាន់ទីទួលសុវត្ថិភាពសរុបទូទាំងខេត្តមានចំនួន២.៩៥១គ្រួសារដែលត្រូវជន្លៀសចេញពីគោលដៅ ចំនួន ៦៧ គោលដៅ ដែលស្ថិតនៅក្នុងស្រុកចំនួន១០និងឃុំចំនួន ៣៣ឃុំ។ ស្រូវស្រែប្រមាណ២ម៉ឺន៧ពាន់ហិកតា ប្រជាពលរដ្ឋជិត៨ពាន់គ្រួសារនិងផ្ទះសម្បែងបឋមជិត៤ម៉ឺនគ្រួសារ ព្រមទាំងរចនាសម្ព័ន្ធរូបវន្តសង្គម ជាច្រើនទៀត រងផលប៉ះពាល់ដល់ ដោយទឹកជំនន់ទឹកភ្លៀង។
ឯកឧត្តមសឿម ប៊ុនរិទ្ធិ អភិបាលរងខេត្តបាត់ដំបងនិងជាប្រធានអ្នកនាំពាក្យនៃរដ្ឋបាលខេត្ត បានបញ្ជាក់ឲ្យដឹងនៅព្រលប់ៗ ថ្ងៃទី១៤ខែតុលាឆ្នាំ២០២០ថា ក្នុងកិច្ចអន្តរាគមន៍នៃការជួយសង្គ្រោះនិងជម្លៀសប្រជាពលរដ្ឋពីគ្រោះមហន្តរាយនៃជំនន់ទឹកភ្លៀងនេះត្រូវបានប្រើប្រាស់នូវកម្លាំងរបស់គណបញ្ជាការឯកភាពនៃរដ្ឋបាលខេត្ត រួមមាន កងកម្លាំងយោធភូមិភាគទី៥ កម្លាំងប្រតិបត្តិការសឹកបាត់ដំបង កម្លាំងស្នងការនគរបាលខេត្ត កម្លាំងកងរាជអាវុធហត្ថខេត្ត កម្លាំងចម្រុះនៃអធិការដ្ឋានស្រុក ព្រមទាំងមន្ត្រីស្ម័គ្រចិត្តនៃលេខាធិការដ្ឋានខេត្តសរុបប្រមាណ១.៥៣២នាក់ផងដែរ បានដកកម្លាំងចេញពីតំបន់មួយចំនួនដែលមានសភាពធូរស្រាលមួយកម្រិត។ កន្លងមកនេះ ដោយមានការយកចិត្តទុកដាក់ពីប្រមុខនៃរាជរដ្ឋាភិបាលកម្ពុជា សម្តេចតេជោ បានឧបត្ថម្ភថវិកាចំនួន១០ម៉ឺនដុល្លារ សម្តេចក្រឡក្រឡាហោម មានអង្ករចំនួន១០០តោន រួមនិងគ្រឿងឧបភោគបរិភោគមួយចំនួន សម្តេចកិត្តិព្រឹទ្ធបណ្ឌិតប្រធានកាកបាទក្រហម បានផ្តល់ថវិកា១០០លាន សម្រាប់កិច្ចការមនុស្សធម៌និងស្បៀងសង្គ្រោះបន្ទាន់ដល់សាខាខេត្តបាត់ដំបង ព្រមទាំងអំណោយពីថ្នាក់ដឹកនាំក្រុមការងារចុះជួយខេត្ត ស្រុក អំណោយឯកឧត្តមអភិបាលខេត្តនិងអភិបាលរងខេត្ត អំណោយសសយកនិងអំណោយសប្បុរសជននានាជាច្រើនទៀត បាននាំយកនិងចុះចែកអំណោយ ដោយផ្ទាល់ដល់គ្រួសារដែលកំពុងតែរងការប៉ះពាល់ ដោយទឹកជំនន់ សរុបចំនួន ៧.៦៦១គ្រួសារ ស្ថិតនៅក្នុងស្រុកចំនួន ១០ រួមមាន ៖ក្រុងបាត់ដំបង,ស្រុកបាណន់,ស្រុកថ្មគោល,ស្រុក រុក្ខគិរី, ស្រុកសង្កែ,ស្រុក គាស់ក្រឡ, ស្រុកសំពៅលូន,ស្រុកសំឡូត, ស្រុករតនមណ្ឌលនិង ស្រុកបវេលក្នុងមួយគ្រួសារៗ ទទួលបាន អង្ករ មីនិងត្រីខ។
ឯកឧត្តម ងួន រតនៈអភិបាលខេត្តបាត់ដំបង បានអញ្ជើញចុះសួរសុខទុក្ខជួបសំណេះសំណាល ជាមួយបងប្អូនប្រជាពលរដ្ឋដែលរងគ្រោះ ដោយជំនន់ទឹកភ្លៀងដ៏អាក្រក់កើតឡើងនេះ និងចុះទៅពិនិត្យមើលពីស្ថានភាពនៃផលដំណាំស្រូវដែលរងការលិចលង់ដោយទឹកជំនន់និងដំណាំផ្សេងៗទៀត។ ឯកឧត្តមអភិបាលខេត្តបាត់ដំបង បានធ្វើការកត់សម្គាល់ ដោយលើកឡើងថា បើទោះបីជាស្ថានភាពទឹកជំនន់ទឹកភ្លៀងបានធូរស្រាលមួយចំនួនធំហើយក្តី ប៉ុន្តែនៅចំណុចខាងក្រោមនៃអាងកំពីងពួយ កំពុងតែបង្កការប៉ះពាល់ដល់ឃុំចំនួន២ក្នុងស្រុកបាណន់ ហើយនៅស្រុកមោងឫស្សី ក៏មានការប៉ះពាល់ចំនួន១ឃុំផងដែរ។ វាក៏អាចបង្កប៉ះពាល់ដល់បណ្តាឃុំមួយចំនួនក្នុងស្រុកថ្មគោលទៀតផងដែរ។
បើយោងតាមរបាយការណ៍របស់អ្នកនាំពាក្យនៃរដ្ឋបាលខេត្តបាត់ដំបង បានបញ្ជាក់ជាបឋមឲ្យដឹងថា មកដល់ពេលនេះប៉ះពាល់បឋមដល់ផ្ទះប្រជាពលរដ្ឋមានចំនួន៣៨.៨៩០គ្រួសារ ស្មើនឹង១៤ក្រុង-ស្រុកនិង៨៩ឃុំ-សង្កាត់។ ដោយឡែក ទាក់ទិននិងផលប៉ះពាល់ដំណាំស្រូវ គិតត្រឹមថ្ងៃទី១៤ខែតុលានេះ ផលប៉ះពាល់សរុបចំនួន៨២.៤៧៦ហិកតា ដែលស្ថិតក្នុងស្រុកចំនួន១០ និងបានបង្កផលប៉ះពាល់ដល់ដំណាំសាកវប្បកម្មនិងដំណាំឧស្សហកម្ម សរុប៤៩.៦១៦ ហិកតាស្ថិតក្នុងស្រុកចំនួន១០ និងខូចខាតដោយទឹកជំនន់សរុប ២៦.៩០៧ ហិកតា ក្នុងចំណោមស្រុកចំនួន៥ រួមមាន ស្រុកថ្មគោល,ស្រុកបវេល, ស្រុករតនមណ្ឌល, ស្រុកសំពៅលូន និងស្រុកកំរៀង នៃខេត្តបាត់ដំបង៕ ដោយ៖អ៊ុងសារុំ
