ភ្នំពេញ៖ អ្នកជំនាញអចលនទ្រព្យ លោកស្រី ហ្គ្រេស រចនី ដែលជាអគ្គនាយិការក្រុមហ៊ុនអចលនទ្រព្យ Century 21 Cambodia បានលើកឡើងថា តម្រូវការលំនៅឋានបុរី ដែលមានតម្លៃមធ្យមនៅតែរក្សាបានដំណើរការល្អ ដោយសារតែម្ចាស់គម្រោងផ្តោតលើអតិថិជនក្នុងស្រុក។
លោកស្រីបានមានប្រសាសន៍ថា៖ «ម្ចាស់គម្រោងនៅតែបន្តអភិវឌ្ឍ និងបើកដំណើរការគម្រោងថ្មីៗរបស់ពួកគេពីមួយដំណាក់កាលទៅមួយដំណាក់កាល ដែលមិនឃើញជាសញ្ញាណាមួយដែលថាការផ្គត់ផ្គង់នេះលើសពីតម្រូវក្នុងទីផ្សារនោះទេ។ម្យ៉ាងវិញទៀតម្ចាស់គម្រោងប្រើប្រាស់យុទ្ធសាស្ត្រ ដែលផ្តល់លក្ខខណ្ឌក្នុងការលក់ទៅឱ្យអតិថិជនមានភាពងាយស្រួលជាងឆ្នាំមុន។»
បើយោងតាមរបាយការណ៍របស់ក្រុមហ៊ុន CBRE Cambodiaគម្រោងអភិវឌ្ឍន៍បុរីលំនៅឋាននៅតែមានកំណើន ដែលមាន១២គម្រោងបានបើកដំណើរការដោយគិតចាប់ពីខែមេសា ដល់ខែកញ្ញាឆ្នាំ២០២០។
របាយកាណ៍ដដែលនេះ បានបង្ហាញថា គម្រោងដែលបើកដំណើរការថ្មីទាំងនេះ គ្រប់ដណ្តប់ក្នុងខណ្ឌចំនួន៦ មានដូចជា ខណ្ឌសែនសុខ កំបូល ព្រែកព្នៅ ដង្កោ ជ្រោយចង្វា និងខណ្ឌមានជ័យ។ នៅក្នុងចំណោមនោះ ខណ្ឌសែនសុខ មានចំណែក ៦០ភាគរយ នៃគម្រោងលំនៅឋានថ្មីៗ សរុបដែលបានបើកដំណើរការ។
អ្នកជំនាញបានបន្តថា ស្ថិតក្នុងស្ថានភាព ដែលបង្កផលប៉ះពាល់ដោយជំងឺរាតត្បាតកូវីដ-១៩ តម្លៃទីផ្សារលំនៅឋានបុរីនៅតែបន្តកើនឡើង ដោយទីផ្សារប្រភេទផ្ទះល្វែង (flat) ជាមធ្យមមានតម្លៃ10,7000 ដុល្លារក្នុងមួយល្វែង កើនឡើង 3.4% បើធៀបនឹងត្រីមាសទី១។ ចំណែកឯ ផ្ទះប្រភេទអាជីវកម្ម Shophouse មានតម្លៃជាមធ្យម 23,8000 ក្នុងមួយល្វែង (កើនឡើង 5.4%) និងផ្ទះប្រភេទវីឡាភ្លោះ មានតម្លៃជាមធ្យម 29,7000 ក្នុងផ្ទះមួយ (កើនឡើង9.2%)។
គូសបញ្ជាក់ថា បើយោងតាមអ្នកជំនាញអចលនទ្រព្យ បានឱ្យដឹងថា គម្រោងលំនៅឋានដែលមានតម្លៃចាប់ពី ២០ម៉ឺនទៅ៣០ម៉ឺនដុល្លារក្នុងមួយល្វែង អាចមានផលវិបាកក្នុងការលក់ ព្រោះអតិថិជនមួយចំនួនពឹងផ្អែកលើប្រាក់បៀវត្សរ៍ដើម្បីបង់រំលស់ អាចប៉ះពាល់ដោយបញ្ហាកូវីដ-១៩ ប្រសិនបើពួកគេបាត់បង់ការងារធ្វើនៅក្នុងកាលៈទេសៈនេះ៕
ដោយ៖CEN
