ភ្នំពេញ៖ ក្រោយពីប៉ុស្តលេខ៣ថៃបានបញ្ចេញ poster ផ្សព្វផ្សាយពីខ្សែភាពយន្តថ្មីមួយរបស់ខ្លួន បានបង្កការខឹងសប្បានិងរិះគន់យ៉ាងខ្លាំងពីប្រជាជនកម្ពុជា ដោយសារបានយករូបភាពប្រាសាទអង្គររបស់ខ្មែរទៅកាត់តលើភាពយន្តរបស់ខ្លួនដោយគ្មានការអនុញ្ញាតហាក់ដូចជាកម្មសិទ្ធិផ្ទាល់ខ្លួន។
យោងតាមគណនីហ្វេសបុកមួយដែលមានឈ្មោះថា Make You Mine បានបង្ហោះសាររិះគន់រួមជាមួយនិងរូបភាពដែលថៃបានកាត់ត ដោយរិះគន់ថា «ផ្ញើរទៅកាន់ Ch3Thailand ក្នុងនាមខ្ញុំ ដែលជាអ្នកគាំទ្រ Ch3Thailand ខ្ញុំសង្ឃឹមថាអ្នកនឹងទទួលខុសត្រូវខ្ពស់ចំពោះអ្វីដែលអ្នកធ្វើមកលើយើង (ប្រជាជនកម្ពុជា)។ ខ្ញុំក៏សង្ឃឹមថាអ្នកនឹងមានការសុំទោសប្រទេសកម្ពុជា ដែលបានយករូបភាពប្រាសាទអង្គរវត្ត មកកែលម្អនៅក្នុងការរចនាល្ខោនផ្ទាល់ខ្លួនរបស់អ្នក។ មើលទៅមនុស្សមួយចំនួននៅក្នុងប្រទេសថៃ មើលងាយប្រទេសរបស់ខ្ញុំនិងប្រាសាទអង្គរវត្តរបស់ខ្ញុំ។ ប្រាសាទអង្គរវត្តជាកម្មសិទ្ធិរបស់ប្រទេសកម្ពុជានិងប្រជាជនកម្ពុជា ចង់ដាក់ក៏ដាក់ចង់ដកក៏ដកម៉េច!? យកអង្គរវត្តបស់ខ្មែរ មកលេងសើចអ៊ីចឹងម៉េចកើត!? ជួយស៊ែរអ្នកទាំងអស់គ្នា»។
ចំណែកលោក អ៊ុន សុធាក៏មិននៅឱបដៃឈរមើលដែរ ដោយលោកបានរិះគន់ចំៗថា «ប្រាសាទខ្មែរ គឺមានតែមួយគ្មានពីរទេ ដូច្នេះក្នុងនាមខ្ញុំជាសិល្បៈមួយរូបដែរ សូមធ្វើការមិនយល់ស្របសំរាប់ភាពយន្តភាគថៃ ដែលយករូបប្រាសាទអង្គរវត្តទៅផ្សព្វផ្សាយជាសាធារណៈ ដូចជាប្រាសាទប្រទេសខ្លួនឯងទៅវិញ។ តែបើសំរាប់សាសន៍ដទៃដូចជាអឺរ៉ុប ឬក៏ Holywood មកថតវាមិនជាអ្វី ផ្ទុយទៅវិញគឺមានតែជួយផ្សព្វផ្សាយឲ្យប្រទេសខ្មែរ។ ភាពយន្តថៃឆ្លុះបញ្ចាំងបែបនេះធ្វើឲ្យប្រទេសដទៃគេយល់ច្រឡំកាន់តែខ្លាំងថាប្រាសាទខ្មែរជារបស់ថៃ ឬ សៀម។ ជាក់ស្តែង ការឆ្លុះបញ្ចាំងពីវប្បធម៌ អរិយធម៌ ខ្មែរមិនសូវទូលំទូលាយដូចសាសន៍ដទៃផង វាអាចផ្តល់ផលប៉ះពាល់»។
លើសពីនេះ លោក ស្រេង វុធថា ក៏បាននិយាយចំៗថា «ដើម្បីប្រទេសជាតិនិងសិល្បៈខ្មែរ ខ្ញុំសូមប្រឆាំងដាច់ខាតរបស់ផលិតកម្មផលិតកុនរបស់ប្រទេសថៃនិងប៉ុស្តលេខ៣ថៃ ដោយយករូបប្រាសាទរបស់ខ្មែរដាក់ក្នុងរឿងរបស់ខ្លួន សូមធ្វើការបកស្រាយឲ្យច្បាស់ ព្រោះការផ្សព្វផ្សាយបែបនេះធ្វើឲ្យបរទេសយល់ច្រឡំ ព្រោះវាជាប្រាសាទដែរតំណាងឲ្យប្រទេសកម្ពុជា ខ្ញុំសុខចិត្ដឲ្យអ្នកគាំទ្ររឿងថៃស្អប់ខ្ញុំនិងជេរខ្ញុំ តែខ្ញុំមិនអាចឲ្យជនបរទេសឆ្លៀតឱកាសផ្សព្វផ្សាយ របស់ដែលមិនមែនជារបស់ខ្លួនជាដាច់ខាត ប្រទេសនីមួយៗមានវប្បធម៌ សិល្បៈរៀងខ្លួន សូមកុំបំពានអ្វីដែលមិនមែនជារបស់ខ្លួន តើអាចទេឈប់គាំទ្រតាមដានរឿងហែកហួរ ស្រីប្រុស ប្តីប្រពន្ធគេ រឿងបែកស្លុយ etc… ? ងាកមកធ្វើអ្វីដែលអភិវឌ្ឍន៍ខ្លួន និងប្រទេសជាតិ ថែរក្សាមរតកដូនតាយើង។ សូមចិត្ដចុះពួកឆ្កួតនិងខ្លួនឯងមួយចំនួនទៅប្រដូចនិងអ្នកដទៃ យើងធ្វើចង់តែល្បី តែយើងដែលសួរខ្លួនឯងអត់ថាម៉ែពុកខំបង្កើតឈាមទាំងថ្លុក មិនដែរសរសើរនិងសងគុណម្ដាយពុកខ្លួនឯងទេ បែបជាយកខ្លួនទៅប្រដូចអ្នកដទៃ
ដើម្បីសិល្បៈកម្ពុជា ប្រទេសកម្ពុជានិងវប្បធម៌កម្ពុជា ស៊ូមានកំហុសក៏មិនឲ្យវប្បធម៌មួយត្រូវគេបំផ្លើសដែរ»។
ជុំវិញបញ្ហានេះប្រជាជនកម្ពុជា ពិតជាមិនសប្បាយចិត្តនិងទង្វើររបស់ថៃនោះទេ ដែលតែងតែបង្ហាញចេទនាមិនល្អបំពានម្តងជា២ដង មកលើវប្បធម៌របស់ខ្មែរយ៉ាងកគ្លើន ហើយទាមទារឲ្យមានការបកស្រាយ និងធ្វើការសូមទោសមកកាន់ប្រជាជនកម្ពុជា៕ ដោយ៖ កូលាប ក្រហម