បាងកក៖ ស្ថានទូតកម្ពុជាប្រចាំប្រទេសថៃ ប្រកាសដាក់ឱ្យដំណើរការជាផ្លូវការ នូវសេវាប្រឹក្សាយោបល់ និងគាំពារផ្នែកច្បាប់ជូនធុរជន និងពាណិជ្ជករកម្ពុជា-ថៃ និងបងប្អូនពលករខ្មែរ ដែលកំពុងបម្រើការងារនៅក្នុងប្រទេសថៃ។
នេះបើតាមសេចក្តីប្រកាសព័ត៌មានស្ថានទូតព្រះរាជាណាចក្រកម្ពុជា ប្រចាំព្រះរាជាណាចក្រថៃឡង់ដ៏ ស្តីពីការដាក់ឱ្យដំណើរការជាផ្លូវការ សេវាប្រឹក្សាយោបល់ និងគាំពារផ្លូវច្បាប់ ទាក់ទងការធ្វើធុរកិច្ច -ពាណិជ្ជកម្ម និងពលករ។
នាព្រឹកថ្ងៃសុក្រ ទី១៦ ខែតុលា ឆ្នាំ២០២០ មានរៀបចំពិធីចុះអនុស្សរណៈយោគយល់គ្នា (MoU) រវាងស្ថានទូតកម្ពុជា និងក្រុមហ៊ុន LAWASIA Co., Ltd ស្តីពីការដាក់ឱ្យដំណើរការជាផ្លូវការសេវាប្រឹក្សាយោបល់ និង គាំពារផ្លូវច្បាប់ទាក់ទងការធ្វើធុរកិច្ច-ពាណិជ្ជកម្ម និងពលករ ក្រោមអធិបតីភាព ឯកឧត្តម អ៊ុក សោភ័ណ ឯកអគ្គរាជទូតកម្ពុជាប្រចាំប្រទេសថៃ។
គោលបំណងសំខាន់នៃពិធីចុះអនុស្សរណៈនេះ គឺដើម្បីចូលរួមជំរុញការអនុវត្តការទូតសេដ្ឋកិច្ច ដែលផ្តោតសំខាន់ លើពាណិជ្ជកម្ម ទេសចរណ៍ និងវប្បធម៌ តាមរយៈការពង្រីកលទ្ធភាពជូនវិស័យឯកជនកម្ពុជា និងថៃ ទទួលបានសេវាប្រឹក្សា យោបល់ និងគាំពារផ្នែកច្បាប់នៅក្នុងជម្លោះធុរកិច្ច-ពាណិជ្ជកម្ម និងពលករកម្ពុជា ដែលកំពុងបម្រើការងារក្នុងប្រទេសថៃ។
នៅក្នុងឱកាសនោះ ឯកឧត្តម អ៊ុក សោភ័ណ បានគូសបញ្ជាក់ថា ពិធីចុះអនុស្សរណៈថ្ងៃនេះ គឺជាការបើកទំព័រថ្មី មួយទៀត សម្រាប់ការពង្រឹងកិច្ចសហប្រតិបត្តិការលើវិស័យពាណិជ្ជកម្ម និងវិស័យការងារទ្វេភាគីកម្ពុជា និងថៃ ព្រមទាំង បង្កើនទំនុកចិត្តរវាងសហគមន៍ធុរកិច្ចនៃប្រទេសទាំងពីរ ស្របតាមគោលនយោបាយរបស់រាជរដ្ឋាភិបាលកម្ពុជា។ ឯកឧត្តម ឯកអគ្គរាជទូត ក៏បានលើកទឹកចិត្តដល់ធុរជន ពាណិជ្ជករ និងវិនិយោគិនកម្ពុជា-ថៃ ដែលមានបំណង ចាប់ដៃគូធ្វើធុរកិច្ច និងពាណិជ្ជកម្មជាមួយគ្នា សូមអញ្ជើញមកពិគ្រោះយោបល់ នៅការិយាល័យអនុព័ន្ធពាណិជ្ជកម្មនៃ
ស្ថានទូតកម្ពុជានៅទីក្រុងបាងកក ដើម្បីចៀសវាងកើតមានវិវាទនឹងគ្នានៅថ្ងៃក្រោយ ដែលនាំឱ្យប៉ះពាល់ដល់ទំនាក់ទំនង
ពាណិជ្ជកម្មទ្វេភាគីកម្ពុជា-ថៃ៕ដោយ៖បញ្ញាស័ក្តិ