ភ្នំពេញ៖ ព្រឹត្តិការណ៍ពិព័រណ៍អចលនទ្រព្យនៅកម្ពុជា ផ្ដល់លទ្ធភាពឱ្យអតិថិជនទាំងក្នុងនិងក្រៅប្រទេសទិញអចលនទ្រព្យក្នុងតម្លៃពិសេស។ ព្រឹត្តិការណ៍ពិព័រណ៍អចលនទ្រព្យលើកទី៦ដំណាច់ឆ្នាំ ២០២០នឹងប្រព្រឹត្តទៅនៅមជ្ឈមណ្ឌល The Premier Center Sen Sokនាថ្ងៃទី២៧ និង ២៨ ខែវិច្ឆិកា ឆ្នាំ២០២០ខាងមុខនេះដែលប្រមូលផ្ដុំដោយគម្រោងអភិវឌ្ឍន៍ចម្រុះ មានក្រុមហ៊ុនអភិវឌ្ឍន៍បុរីលំនៅដ្ឋានអាគារពាណិជ្ជកម្ម និងខុនដូ ក៏ដូចជាភ្នាក់ងារអចលនទ្រព្យ បណ្ដាធនាគារធំៗ អ្នកជំនាញផ្នែកច្បាប់ ព្រមទាំងក្រុមហ៊ុនពាណិជ្ជកម្មជាច្រើនទៀតក្នុងវិស័យអចលនទ្រព្យចូលរួមដាក់តាំងបង្ហាញ ដែលអតិថិជនអាចស្វែងយល់ដោយផ្ទាល់។
ក្រុមហ៊ុន Realestate.com.kh ដែលជាអ្នករៀបចំពិព័រណ៍នេះ បានប្រកាសជាផ្លូវការនូវព្រឹត្តិការណ៍ពិព័រណ៍អចលនទ្រព្យលើកទី៦ ដោយរំពឹងថា ព្រឹត្តិការណ៍ដែលមានឈ្មោះថា «ពិព័រណ៍អចលនទ្រព្យដំណាច់ឆ្នាំ ២០២០» នឹងដើរតួយ៉ាងសំខាន់ក្នុងការជំរុញវឌ្ឍនភាពនៃវិស័យអចលនទ្រព្យកម្ពុជា។ដោយមើលឃើញពីវិបត្តិនៃជំងឺកូវីដ-១៩ ក្រុមហ៊ុន បានសម្រេចចិត្តក្នុងរៀបចំពិព័រណ៍អចលនទ្រព្យជាថ្មីម្តងទៀត ដោយព្រឹត្តិការណ៍បន្ទាប់នឹងត្រូវរៀបចំនៅមជ្ឈមណ្ឌល The Premier Center Sen Sokផ្ទាល់ និងតាមបណ្ដាញអនឡាញ ពោលគឺផ្ដល់លទ្ធភាពដល់អតិថិជនទាំងនៅក្នុងស្រុក និងក្រៅប្រទេសក្នុងការទិញអចលនទ្រព្យក្នុងតម្លៃពិសេសបំផុត។
ក្រុមហ៊ុនរំពឹងថា ក្នុងព្រឹត្តិការណ៍នេះ អ្នកចូលរួមនឹងមានឱកាសស្វែងយល់ពីសិក្ខាសាលាស្តីពីបច្ចុប្បន្នភាពក្នុងវិស័យអចលនទ្រព្យកម្ពុជា ដែលនឹងត្រូវផ្សាយផ្ទាល់ទៅកាន់ទស្សនិកជនរាប់ពាន់នាក់ ទាំងក្នុងស្រុក និងជុំវិញពិភពលោក ដែលបានចូលរួមនៅទីតាំងផ្ទាល់ និងទស្សនាតាមអនឡាញ។
ព្រឹត្តិការណ៍នេះ និងជួយអ្នកកំពុងស្វែងរកទិញអចលនទ្រព្យ ទិញផ្ទះដំបូង ឬ វិនិយោគផ្នែកអចលនទ្រព្យ នឹងទទួលបានការផ្ដល់ជូនពិសេសបំផុតពីសំណាក់ក្រុមហ៊ុនអភិវឌ្ឍន៍ ក៏ដូចជាមានឱកាសធ្វើការប្រឹក្សាយោបល់ដោយផ្ទាល់ជាមួយនឹងអ្នកតំណាងមកពីបណ្ដាធនាគារក្នុងប្រទេសកម្ពុជា ក៏ដូចជាអ្នកជំនាញផ្នែកឥណទាន ដែលនិងជួយសម្រួលដល់ដំណើរការទិញផ្ទះឬអចលនទ្រព្យក្នុងក្តីសុបិន្ត។
ពិព័រណ៍អចលនទ្រព្យដំណាច់ឆ្នាំ ២០២០ខាងមុខនេះ ត្រូវបានរំពឹងថានឹងក្លាយជាព្រឹត្តិការណ៍អចលនទ្រព្យលេចធ្លោបំផុតក្នុងវិស័យអចលនទ្រព្យកម្ពុជា នៅក្នុងតំបន់អាស៊ាន និងទូទាំងពិភពលោក។ក្រុមហ៊ុន ក៏រំពឹងផងដែរថានឹងអាចទាក់ទាញក្រុមហ៊ុនចូលរួមតាំងពិព័រណ៍ច្រើនជាង ៥០ ក្រុមហ៊ុន ព្រមទាំងទទួលស្វាគមន៍អ្នកចូលរួមទស្សនាជាង ១ម៉ឺននាក់ ទាំងនៅទីតាំងផ្ទាល់ និងតាមបណ្ដាញអនឡាញ។
បើយោងតាមក្រុមហ៊ុន អចលនទ្រព្យក្នុងតម្លៃជាង ១១៥លានដុល្លារបានលក់ដាច់ក្នុងអំឡុងពិព័រណ៍កន្លងមក។កាលពីដើមឆ្នាំ២០២០ ក្រុមហ៊ុន ទទួលបានភាពជោគជ័យយ៉ាងខ្លាំងក្នុងការរៀបចំព្រឹត្តិការណ៍លក់អចលនទ្រព្យអនឡាញដំបូងបំផុតក្នុងប្រទេសកម្ពុជា ដែលបានលក់ដាច់អចលនទ្រព្យសរុបជាង ១៥ លានដុល្លារ។ ក្នុងអំឡុងពិព័រណ៍អចលនទ្រព្យចំនួន ៤លើក ដែលត្រូវបានរៀបចំនៅទីតាំងផ្ទាល់ អចលនទ្រព្យសរុបប្រហែល ១០០ លានដុល្លារត្រូវបានលក់ដាច់ដោយបណ្ដាក្រុមហ៊ុនចូលរួម។ ជារួម ពិព័រណ៍ទាំង៥លើកបូករួមទាំងការតាំងពិព័រណ៍តាមអនឡាញ កាលពីដើមឆ្នាំ២០២០ បានទាក់ទាញអ្នកចូលរួមទស្សនាប្រមាណជាង ៣៥,០០០នាក់៕ ដោយ ៖ CEN
