ភ្នំពេញ៖ នៅព្រឹកថ្ងៃទី ១៦ ខែតុលា ឆ្នាំ២០២០ ឯកឧត្ដមកិត្តិសេដ្ឋាបណ្ឌិត ចម ប្រសិទ្ធ ទេសរដ្ឋមន្ត្រី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានទទួលជួបពិភាក្សាការងារជាមួយលោកClement Yang ប្រធានក្រុមហ៊ុនរោងចក្រMEDTECS Cambodia ដែលមានមូលដ្ឋានខេត្តកំពង់ចាមនិងជាអ្នកវិនិយោគតំបន់សេដ្ឋកិច្ចពិសេសមេនហាតថេន(Manhattan ) ក្រុងបាវិត ខេត្តស្វាយរៀង ដេីម្បីពិភាក្សាការងារ នៅទីស្តីការក្រសួង ។
ក្នុងជំនួបនោះ ឯកឧត្តមកិត្តិសេដ្ឋាបណ្ឌិតទេសរដ្ឋមន្ត្រី ចម ប្រសិទ្ធ បានចាត់ទុកលោក Clement Yang គឺជាអ្នកវិនិយោគទុនមានភាពជោគជ័យមួយនៅកម្ពុជា មានរយ:ពេល២១ ឆ្នាំមកហើយ ដោយបានរួមចំណែកផងដែរក្នុងបំណែកសេដ្ឋកិច្ច ទីផ្សារការងារ និងការទទួលខុសត្រូវសង្គមនៅកម្ពុជា ។ ជាពិសេស នៅពេលពិភពលោកក៏ដូចជាកម្ពុជាកំពុងរងគ្រោះ និងផលប៉ះពាល់ពីមេរោគ Covid-19 ក្រុមហ៊ុនរោងចក្រ MEDTECS របស់លោក Yang ដែលមានមូលដ្ឋាននៅខេត្តកំពង់ចាមបានបង្កេីនការផលិតរបស់ខ្លួនដោយផ្តោតជាសំខាន់ទៅលេីសម្ភារបរិក្ខាការពារផ្ទាល់ខ្លួន(PPE) ហេីយក៏បានធ្វេីការឧបត្ថម្ភជាម៉ាស់ និងសម្លៀកបំពាក់ពេទ្យ សម្រាប់ការពាររោគឆ្លងCovid-19 ដល់តម្រូវការរបស់កម្ពុជា រួមទាំងប្រទេសមួយចំនួនទៀតផងដែរ ។
ឯកឧត្តមកិត្តិសេដ្ឋាបណ្ឌិតទេសរដ្ឋមន្ត្រី ក៏បានបានស្នេីឲ្យក្រុមហ៊ុនរោងចក្ររបស់លោកYang បង្កើនការផលិតសម្ភារៈបរិក្ខារការពារCovid-19 ឲ្យបានកាន់តែច្រេីន សម្រាប់ផ្គត់ផ្គង់ឲ្យគ្រប់តម្រូវការទីផ្សារ ពីព្រោះមេរោគនៅគំរាមកំហែងពិភពលោកនៅឡើយ ។
លោកប្រធាន Clement Yang បានបង្ហាញនូវការពេញចិត្តចំពោះការវិនិយោគវិស័យរោងចក្រនិងតំបន់សេដ្ឋកិច្ចពិសេសនៅកម្ពុជា ទោះបីមានឧបសគ្គបន្តិចបន្តួចក៏ដោយ។ ប៉ុន្តែកម្ពុជាជាទីតាំងវិនិយោគដ៏មានសក្តានុពល ដែលបច្ចុប្បន្នលោកកំពុងមានបំណងពង្រីកដេីមទុនក្នុងរោងចក្រ និងតំបន់សេដ្ឋកិច្ចរបស់លោក ពីព្រោះព្រំដែនកម្ពុជា-វៀតណាម ជាច្រករបៀងសេដ្ឋកិច្ចដ៏សំខាន់ ។ ក៏ ប៉ុន្តែការងារនេះមានការពាក់ព័ន្ធនិងច្បាប់វិនិយោគរបស់កម្ពុជា ។ ជាមួយគ្នានេះ លោកក៏បានបង្ហាញនូវជំហរចូលរួមការពារបរិស្ថានក្នុងវិស័យវិនិយោគរបស់លោក គឺការអនុវត្តគោលការណ៌ថាមពលបៃតង( Green Energy) ក៏ដូចជាឧស្សាហកម្មបៃតង(Green Industry)ដោយលោកយកចិត្តទុកដាក់ការធ្វេីអាងប្រព្រឹត្តិកម្មសម្រាប់ទឹកកខ្វក់ចេញពីរោងចក្រស្របតាមស្តង់ដារ និងធ្វេីឲ្យទឹកទន្លេដែលត្រូវបង្ហូរចូលមានភាពស្រស់ថ្លា ហេីយអភិវឌ្ឍជាតំបន់ទេសចរណ៌ធម្មជាតិជាប់ព្រំដែនតែម្តង ។ ការងារនេះលោកក៏ស្នេីឲ្យមានការសហការជាមួយស្ថាប័នពាក់ព័ន្ធផងដែរ ។
ជាមួយគ្នានេះ លោកប្រធាន Yang ក៏បានជម្រាបថាលោកនឹងឧបត្តម្ភសម្ភារ បរិក្ខារការពារមេរោគ Covid-19បន្ថែមទៀត ដល់កម្ពុជា តាមរយៈកាកបាទក្រហមកម្ពុជា និងប្រគល់ថវិកាឧបត្ថម្ភចំនួន២មុឺនដុល្លារអាមេរិកដល់រាជរដ្ឋាភិបាលសម្រាប់សម្រាលបន្ទុកការរងគ្រោះដោយជំនន់ទឹកភ្លៀងនៅកម្ពុជា តាមរយៈឯកឧត្តមកិត្តិសេដ្ឋាបណ្ឌិតទេសរដ្ឋមន្ត្រី ចម ប្រសិទ្ធ ផ្ទាល់ នៅសប្តាហ៌ក្រោយ។
ឯកឧត្តមកិត្តិសេដ្ឋាបណ្ឌិត ទេសរដ្ឋមន្ត្រី ចម ប្រសិទ្ធ បានសាទរចំពោះគម្រោងពង្រីកទុនវិនិយោគក្នុងរោងចក្រ និងតំបន់សេដ្ឋកិច្ចរបស់លោក Yang ដោយស្នេីឲ្យពិភាក្សាការងារនេះបន្ថែមជាមួយក្រុមប្រឹក្សាអភិវឌ្ឍន៍កម្ពុជា និងគាំទ្រចំពោះ ការយកចិត្តទុកដាក់ទៅលេីកិច្ចការពារបរិស្ថានដោយអនុវត្តនូវគោលការណ៌ថាមពលបៃតង និងឧស្សាហកម្មបៃតង ដែលការងារនេះ ស្របនឹងគោលការណ៌របស់ក្រសួង ដែលប្រកាន់យកការអភិវឌ្ឍតាមបែបឧស្សាហកម្មបៃតង និងបច្ចេកវិទ្យាបៃតង ។ ចំពោះការងារសម្អាតទឹកក្នុងទន្លេសម្រាប់ទាក់ទាញវិស័យទេសចរណ៌ឯកឧត្តមកិត្តិសេដ្ឋាបណ្ឌិត នឹងសម្របសម្រួលជាមួយស្ថាប័នពាក់ព័ន្ធដេីម្បីអភិវឌ្ឍការងារនេះ ដោយនុវត្តតាមលក្ខណ:បច្ចេកវិទ្យាបៃតង ។
ឯកឧត្តមកិត្តិសេដ្ឋាបណ្ឌិត ក៏បានថ្លែងអំណរគុណដល់លោក Yang ចំពោះការឧបត្ថម្ភដ៏មានសារសំខាន់សម្រាប់ទប់ទល់ការឆ្លងមេរោគCovid-19 និង ការរងគ្រោះធ្ងន់ធ្ងរដោយជំនន់ទឹកភ្លៀងនៅកម្ពុជា ៕ដោយ៖បញ្ញាស័ក្តិ
