ភ្នំពេញ៖ ករណីបុរសម្នាក់ដែលបានបើករថយន្តបុកម៉ុតូហើយថយកិនបន្ថែមបណ្តាលឲ្យជនរងគ្រោះស្លាប់នោះ សាច់ញាតិជនបង្កកំពុងផ្ដល់ព័ត៌មានថាជាករណីចោរឆក់ ដែលជនបង្កជាអ្នកដេញចាប់ចោរក៏ជ្រុលចង្កូតបុកតែម្ដង ហើយគ្មានចេតនាសម្លាប់មនុស្សទេ។
យោងតាមគណនីហ្វេសប៊ុករបស់លោក ផែង វណ្ណៈ ទើបបានបង្ហោះនៅមុននេះបន្តិចបានរៀបរាប់ថា «ឮដំណឹងមកថាសាច់ញាតិជនបង្កកំពុងផ្ដល់ព័ត៌មានថា ជនរងគ្រោះជាចោរឆក់ ហើយឈ្មោះ យ៉ាន់ណា លីណា ពេទ្យធ្មេញ ជាអ្នកដេញចាប់ចោរក៏ជ្រុលចង្កូតបុកតែម្ដង ហើយគ្មានចេតនាសម្លាប់មនុស្សទេ។ ខ្ញុំមិនដឹងថា ជនរងគ្រោះដែលស្លាប់ជាចោរឆក់ ឬ យ៉ាងណានោះទេ តែប្រទេសកម្ពុជាគ្មានទោសប្រហារជីវិតទេ បើទោះបីអ្នកស្លាប់ជាចោរឆក់ក៏ដោយ។ ម្យ៉ាងទៀតតាមរយៈវីដេអូបង្ហាញថា រថយន្តបុកហើយមិនស្លាប់ ថយក្រោយកិនថែមទាល់តែស្លាប់។ បើមិនមានចេតនាសម្លាប់មនុស្សតើថយក្រោយកិនថែមធ្វើអ្វី?
សង្ឃឹមថាសមត្ថកិច្ចនឹងស្រាវជ្រាវករណីនេះឲ្យបានច្បាស់លាស់ ដើម្បីបញ្ជាក់ការពិត ជៀសវាងមនុស្សស្លាប់ហើយគេចោទបន្ថែមមួយករណីទៀត»។
គួររំលឹកថា កាលពីវេលាម៉ោង២៣ និង៣០នាទីយប់ ថ្ងៃទី១៥ ខែតុលា ឆ្នាំ២០២០ នៅចំណុច ផ្លូវ ១៧៣ កែងផ្លូវ៣២៨ ស្ថិតក្នុងសង្កាត់ទួលស្វាយព្រៃទី១ ខណ្ឌបឹងកេងកង មានករណីគ្រោះថ្នាក់ចរាចរណ៍មួយបានកើតឡើង បង្ករដោយរថយន្តម៉ាក Lexus NX 200T ពណ៌ខ្មៅ ពាក់ផ្លាកលេខភ្នំពេញ 2BH-8494 បុកម៉ូតូម៉ាក Honda C125 ពណ៌ខ្មៅ ពាក់ផ្លាកលេខកណ្តាល 1AI-3848 បណ្តាលឱ្យជនរងគ្រោះភាគីម៉ូតូម្នាក់បានស្លាប់និងម្នាក់ទៀតរងរបួសធ្ងន់។
ប្រភពបានឱ្យដឹងថា មុនពេលកើតហេតុគេឃើញរថយន្ត Lexus NX200T ពណ៌ខ្មៅ បើកបរតាមបណ្តោយផ្លូវ១៧៣ ទិសដៅពីជើងទៅត្បូង លុះដល់ចំណុចកើតហេតុបានបុកម៉ូតូពីក្រោយ រួចបើកថយកិនបន្ថែមទៀតបណ្តាលឲ្យអ្នកបើកម៉ូតូស្លាប់នៅកន្លែង រីឯអ្នករួមដំណើរម៉ូតូម្នាក់ទៀតរបួសធ្ងន់។
អ្នកបើកបររថយន្តបង្កមានឈ្មោះ យ៉ាន់ណា លីណា ភេទប្រុស អាយុ ៣០ឆ្នាំ ជនជាតិខ្មែរ មុខរបរពេទ្យធ្មេញ ស្នាក់នៅផ្ទះលេខ៥អឹម ក្រុមទី៤ ភូមិព្រៃព្រីងខាងត្បូងទី១ សង្កាត់ចោមចៅទី២ ខណ្ឌពោធិ៍សែនជ័យ។
ចំណែកជនរងគ្រោះដែលស្លាប់មានឈ្មោះ ខុន តុង ភេទប្រុស អាយុ ១៩ឆ្នាំ មុខរបរកម្មករសំណង់ ស្នាក់នៅផ្លូវបេតុង ភូមិ០១ សង្កាត់ស្ទឹងមានជ័យ១ ខណ្ឌមានជ័យ។ និងអ្នករួមដំណើរឈ្មោះ ពៅ ម៉ត់ ភេទប្រុស អាយុ ១៧ឆ្នាំ មុខរបររត់កង់បី ស្នាក់នៅភូមិស្រះកែវ សង្កាត់ក្រាំងស្វាយ ស្រុកព្រះស្តេច ខេត្តព្រៃវែង (របួសធ្ងន់)។
បច្ចុប្បន្នជនបង្កត្រូវសមត្ថកិច្ចការិយាល័យចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញ បញ្ជូនទៅសាលាដំបូងរាជធានីភ្នំពេញដើម្បីចាត់ការតាមច្បាប់៕ ដោយ៖ កូលាប ក្រហម
