ភ្នំពេញ៖ យោងតាមគណនីហ្វេសប៊ុកមួយដែលមានឈ្មោះថា Chan Vong Leng បានបង្ហោះនៅមុននេះបន្តិច ដោយរៀបរាប់ថា «បងប្អូនប្រហែលចង់ដឹងរឿងក៏ចង់ឃើញមុខអ្នកឌុបប្អូនខ្ញុំទៅលោតទឹកដែរ អ៊ីចឹងសូមបងប្អូនពុកម៉ែដែលអាណិតប្អូនស្រីខ្ញុំ សូម(ជួយស៊ែរទាំងអស់គ្នា) ដើម្បីរកមូលហេតុដែលប្អូនស្រីខ្ញុំស្លាប់ ៥ថ្ងៃទៀត ខ្ញុំនឹងបង្ហាញមុខអ្នកដែលឌុបប្អូនខ្ញុំទៅលោតទឹកសម្លាប់ខ្លួន បើបងប្អូនពុកម៉ែអាណិតដល់ប្អូនស្រីខ្ញុំ និងគ្រួសារខ្ញុំបាទ សូមជួយស៊ែរទាំងអស់គ្នាផង ខ្ញុំបាទសូមអរគុណជាងមុន»។
គួររលឹកផងដែរថា កាលពីវេលាម៉ោងជាង៣ទៀបភ្លឺ ថ្ងៃទី១១ ខែកញ្ញា ឆ្នាំ២០២០ ស្ថិតលើស្ពានជ្រោយចង្វា ក្នុងសង្កាត់ស្រះចក ខណ្ឌដូនពេញ រាជធានីភ្នំពេញ មានករណីនារីរូបស្រស់ម្នាក់ឈ្មោះ ចាន់ ស្រីមាន អាយុ ២២ឆ្នាំ មិនដឹងមានវិបត្តិអ្វីនោះទេ ក្រោយចេញពីកម្មវិធីខួបកំណើតបងស្រីរបស់ខ្លួន បានសម្រេចចិត្តមកលោតទឹកសម្លាប់ខ្លួន ពីលើស្ពានជ្រោយចង្វា ដោយបន្សល់ទុកផ្កាមួយបាច់ និងស្បែកជើងមួយគូ នៅលើស្ពានជ្រោយចង្វា។
ក្រោយការលោតសម្លាប់ខ្លួនរបស់នារីខាងលើ ក៏បានធ្វើឲ្យអ្នកលេងបណ្តាញសង្គមជាច្រើន មានការសោកស្តាយ និងចោទជាសំណួរថាតើនរណាជាអ្នកដឹកនាងមកទម្លាក់ចោលបែបនេះ ហាក់ដូចជាជំរុញមនុស្សកំពុងខូចចិត្តឲ្យទៅស្លាប់អ៊ីចឹងដែរ ព្រោះបើតាមសម្តីអ្នកឃើញហេតុការណ៍បានឲ្យដឹងថា គឺមានរថយន្តមួយគ្រឿង បានជូននាងមកទម្លាក់លើស្ពានកើតហេតុនោះ៕ ដោយ៖ កូលាប ក្រហម
