កណ្តាល៖ ករណីឪពុកបានប្រើខ្សែភ្លើងវាយលើកូនប្រុស២នាក់ ជាច្រើនលើក នៅស្រុកកៀនស្វាយនោះ ភ្លាមលោកឧត្តមសេនីយ៍ទោ ឈឿន សុចិត្ត ស្នងការនគរបាលខេត្តកណ្តាល បានបញ្ជាឱ្យកម្លាំងចុះប្រតិបត្តិការ ស្រាវជ្រាវ ឈានដល់ឡោមព័ទ្ធ រហូតដល់យប់ថ្ងៃទី១៧ ខែតុលា ឆ្នាំ២០២០ សមត្ថកិច្ចឃាត់ខ្លួនជនបង្កបាននៅចំណុចភូមិឈើទាល២ ឃុំឈើទាល ស្រុកកៀនស្វាយ ខេត្តកណ្តាល។
បើតាមផេកហ្វេសប៊ុក Vuthy Kim បានឲ្យដឹងថា ខ្ញុំបាទសូមទទូចឲ្យច្បាប់ចាត់ការលើបរុសឈ្មោះកែវ ភា ដែលបានប្រើអំពើហឹង្សា កាលពីល្ងាចថ្ងៃទី១៦ ខែតុលា ឆ្នាំ២០២០ ហើយក៏ស្នើសុំឲ្យអង្ការកុមារជួយពួកគាត់ផង ។ ហឹង្សានេះមិនមែនតែម្តងទេ គឺច្រើនដងហើយ វាយកូនសុទ្ធតែខ្សែក្រវាត់។ ករណីកើតឡើងនៅភូមិឈើទាល ឃុំឈើទាល ស្រុកកៀនស្វាយ ខេត្តកណ្តាល។
សមត្ថកិច្ចបានឱ្យដឹងថា៖ ជនសង្ស័យដែលឃាត់ខ្លួនបាន មានឈ្មោះ កែវ ភា ភេទប្រុស អាយុ ៣៩ឆ្នាំ ជនជាតិ ខ្មែរ មុខរបរ កសិករ រស់នៅភូមិឃុំកើតហេតុ ត្រូវជាឪពុកជនរងគ្រោះ។ ចំណែកកូនប្រុសចំនួន ២នាក់ រងគ្រោះក្នុងអំពើហិង្សាដ៏ឃោរឃៅ ឈ្មោះ ភឿន សុភាព អាយុ ១៥ ឆ្នាំ មុខរបរ សិស្ស និងឈ្មោះ ភឿន សុផាន់ អាយុ ៣ឆ្នាំ រស់នៅភូមិឃុំកើតហេតុ។
នៅម៉ោង២០និង៣០នាទី ថ្ងៃទី១៦ ខែតុលា ឆ្នាំ២០២០ ឪពុកបង្កើតរបស់ជនរងគ្រោះបានមកពីផឹកស្រាស្រវឹង ពេលមកដល់ផ្ទះ មិនឃើញកូននៅផ្ទះហើយជនសង្ស័យធ្លាប់ប្រាប់កូនឈ្មោះ ភឿន សុភាព ជាច្រើនដងថាកុំឲ្យដើរចោលផ្ទះ ពេលខ្លួនមិននៅផ្ទះ ដោយសារជនសង្ស័យខឹងកូនពេកក៏បានទាញខ្សែភ្លើង វាយទៅលើឈ្មោះ ភឿន សុភាព ចំខ្នង ពេលនោះប្អូនជនរងគ្រោះ ឈ្មោះ ភឿន សុផាន់ ឃើញឪពុកវាយបងប្រុស ក៏រត់ចូលទៅឱបបងប្រុស ហើយក៏ត្រូវក្បាលទៀត បណ្តាលឲ្យបែកក្បាល។
ក្នុងពេលឃាត់ខ្លួនជនសង្ស័យ សមត្ថកិច្ចបានដកហូតវត្ថុតាងរួមមាន ខ្សែភ្លើងវិញជាពីរប្រវែង០,៧៦ម៉ែត្រ។
ក្រោយពីកើតហេតុ ម្តាយជនរងគ្រោះ បានមកប៉ុស្តិ៍នគរបាលរដ្ឋបាលឈើទាល ដើម្បីឲ្យសមត្ថកិច្ចចាប់ខ្លួនប្តីរបស់ខ្លួន មកធ្វើកិច្ចសន្យា អប់រំនៅប៉ុស្តិ៍ ៕ដោយ៖បញ្ញាស័ក្តិ
