ភ្នំពេញ៖ លោកឧត្តមសេនីយ៍ ទី ចំរើន បានថ្លែងថា ដូចខ្ញុំព្យាករណ៍តាំងតែពីដំបូងមកគឺមនុស្សឃាតដោយចេតនា ទីបំផុតតំណាងអយ្យការសាលាដំបូងរាជធានី បានធ្វើការចោទប្រកាន់ជនសង្ស័យ ដែលបើករថយន្តដេញបុកបុរសពីរនាក់ និងបណ្តាលឲ្យស្លាប់បុរសម្នាក់កាលពីថ្ងៃទី១៥ តុលា ២០២០ ពីបទឃាតកម្មតាមមាត្រា១៩៩ នៃក្រមព្រហ្មទណ្ឌ។
ប្រភពច្បាស់ការ ពីសាលាដំបូង រាជធានីភ្នំពេញ បានឲ្យដឹងថា បន្ទាប់ពីសាកសួរលើជនសង្ស័យ យ៉ាន់ ណា លីណារួចមក លោក សឿ ឡងឌី ព្រះរាជអាជ្ញារង អមសាលាដំបូងរាជធានី ភ្នំពេញ បានសម្រេចចោទប្រកាន់ ឈ្មោះ យ៉ាន់ ណា លីណា មុខរបរ ពេទ្យធ្មេញ ពីបទឃាតកម្ម ប្រព្រឹត្តទៅនៅរាជធានី ភ្នំពេញ កាលពីថ្ងៃទី១៥ ខែតុលា ឆ្នាំ២០២០ តាមបញ្ញត្តិមាត្រា ១៩៩ នៃ ក្រមព្រហ្មទណ្ឌ រួចបញ្ជូនទៅចៅក្រមស៊ើបសួរ ចាត់ការបន្ត ។ ការចោទប្រកាន់នេះ បើតុលាការ រកឃើញថា ជនសង្ស័យ ពិតជាបានប្រព្រឹត្តបទល្មើសដូចការចោទប្រកាន់ មែនជនសង្ស័យអាចប្រឈមមុខ នឹងការជាប់ពន្ធនាគារពី ១០ ឆ្នាំ ទៅ ១៥ ឆ្នាំ ។
នេះជាអំពើមនុស្សឃាតដោយចេតនា សុំអ្នកអនុវត្តច្បាប់មេត្តាកុំកសាងសំណុំរឿងមួយនេះ ទៅជាមនុស្សឃាតដោយធ្វេសប្រហែសអោយសោះ។ ឧត្តមសេនីយ៍ ទី ចំរើនកុសល នឹងតាមដានរឿងមួយនេះ។
សូមរំលឹកថា វេលាម៉ោង ២៣និង៣០ នាទី ថ្ងៃទី ១៥ ខែតុលា ឆ្នាំ២០២០ នៅ ចំណុចផ្លូវលេខ១៧៣ កែងផ្លូវ លេខ៣២៨ សង្កាត់ទួលស្វាយព្រៃ១ ខណ្ឌ បឹងកេងកង មានជនសង្ស័យម្នាក់បានបើករថយន្តម៉ាក NX200t បុកពីក្រោយ និងថយមកកិនសម្លាប់បុរសម្នាក់ ៕ដោយ៖បញ្ញាស័ក្តិ