បាត់ដំបង ៖ កម្លាំងប៉ូលិសការិយាល័យប្រឆាំងគ្រឿងញៀនខេត្តបាត់ដំបង បានចាប់បញ្ជូនបុរស៣នាក់ ជួញដូររក្សាទុកនិងថ្នាំម៉ាទឹកកក៤ថង់ និងថ្នាំយ៉ាម៉ា១១គ្រាប់ សម្ភារពាក់ព័ន្ធមួយចំនួននៅកន្លែងផ្សេងគ្នា កសាងសំណុំរឿងបញ្ជូនទៅតុលាការ ដើម្បីចាត់ការទៅតាមផ្លូវច្បាប់នៅថ្ងៃទី១៩ ខែតុលា ឆ្នាំ២០២០។
ហេតុការណ៍ចាប់ឃាត់ខ្លួនជនសង្ស័យ៣នាក់នេះ បានធ្វើឡើងកាលពីថ្ងៃទី១៨ ខែតុលា ឆ្នាំ២០២០ នៅចំណុចផ្សេងគ្នា ក្នុងស្រុកកំរៀង និងក្រុងបាត់ដំបង ខេត្តបាត់ដំបង។
លោកសុខ និមល នាយការិយាល័យប្រឆាំងបទល្មើសគ្រឿងញៀនខេត្តបាត់ដំបង បានឲ្យដឹងថា ជនសង្ស័យ៣នាក់ដែលចាប់ឃាត់ខ្លួន ករណីទី១ ឈ្មោះយ៉ែម រ៉ាវុធ ភេទប្រុស អាយុ៣៦ឆ្នាំ រស់នៅភូមិអូរក្រូច ឃុំបឹងរាំង ស្រុកកំរៀង ខេត្តបាត់ដំបង។ ក្នុងប្រតិបត្តិការនេះ កម្លាំងដកហូតបានថ្នាំម៉ាទឹកកក៣ថង់ និងថ្នាំយ៉ាម៉ា១១គ្រាប់ សម្ភារពាក់ព័ន្ធមួយចំនួនទៀត ហើយចាប់ឃាត់ខ្លួនកាលពី ម៉ោង១០និង០០នាទី ថ្ងៃទី១៨ ខែតុលា ឆ្នាំ២០២០ នៅចំណុចក្រុមទី៥ ភូមិទួលទិល ឃុំតាក្រី ស្រុកកំរៀង ខេត្តបាត់ដំបង។ ករណីទី២ ឈ្មោះកែវ រីណា ហៅខូច ភេទប្រុស អាយុ២៧ឆ្នាំ រស់នៅភូមិរតនៈ សង្កាត់រតនៈ ក្រុងបាត់ដំបង ខេត្តបាត់ដំបង។ ក្នុងប្រតិបត្តិការនេះ កម្លាំងដកហូតបានថ្នាំម៉ាទឹកកកមួយថង់និង សម្ភារពាក់ព័ន្ធមួយចំនួនទៀតហើយចាប់ឃាត់ខ្លួនកាលពី ម៉ោង១៩និង៥០នាទី ថ្ងៃទី១៨ ខែតុលា ឆ្នាំ២០២០ នៅចំណុចភូមិរតនៈ សង្កាត់រតនៈ ក្រុងបាត់ដំបង ខេត្តបាត់ដំបង។ ក្រោយពីសាកសួរឈ្មោះកែវ រីណាហៅខូច កម្លាំងបានឈានទៅចាប់ឈ្មោះសេង តារ៉ា ហៅកណ្ដុរ ភេទប្រុស អាយុ២០ឆ្នាំ រស់នៅភូមិរតនៈ សង្កាត់រតនៈ ក្រុងបាត់ដំបង ខេត្តបាត់ដំបង ដោយមានការអនុញ្ញាតពីលោកគឺ ប៊ុណ្ណារ៉ា ព្រះរាជអាជ្ញានៃអយ្យការអមសាលាដំបូងខេត្តបាត់ដំបង ហើយចាប់ឃាត់ខ្លួនកាលពីម៉ោង២១និង១៥នាទី ថ្ងៃទី១៨ ខែតុលា ឆ្នាំ២០២០ នៅចំណុចភូមិរតនៈ សង្កាត់រតនៈ ក្រុងបាត់ដំបង ខេត្តបាត់ដំបង។
លោកសុខ និមល បានបញ្ជាក់ថា កម្លាំងបានសហការជាមួយកម្លាំងប៉ូលិសស្រុក ក្រុង ចុះបង្ក្រាបបានករណីរទាំង២នេះ ហើយចាប់ឃាត់ខ្លួនជនសង្ស័យ៣នាក់ និងវត្ថុតាងបានភ្លាមៗជាក់ស្ដែងតែម្ដង។ បច្ចុប្បន្ននេះ កម្លាំងបានកសាងសំណុំរឿងបញ្ជូនជនសង្ស័យ និងវត្ថុតាងទៅតុលាការ ដើម្បីចាត់ការទៅតាមផ្លូវច្បាប់ នៅថ្ងៃទី១៩ ខែតុលា ឆ្នាំ២០២០ហើយ៕ ដោយ៖អ៊ុងសារុំ
