បាត់ដំបង៖ ឯកឧត្តម ហេង រតនា អគ្គនាយកមជ្ឈមណ្ឌលកម្ចាត់មីនកម្ពុជា (CMAC) បានមានប្រសាសន៍ជំរុញឲ្យមានការផ្សព្វផ្សាយឲ្យបានទូលំទូលាយបន្ថែមទៀត ពីបញ្ហាគ្រាប់មីននិងគ្រាប់យុទ្ធភណ្ឌមិនទាន់ផ្ទុះ ពិសេសនៅតាមខេត្តជួបគ្រោះទឹកជំនន់បែកវាល ដោយកាកសំណល់ពីសង្គ្រាមទាំងនោះ អាចនឹងផុសចេញពីដីកាន់តែបង្កគ្រោះថ្នាក់។
ការលើកឡើងបែបនេះ ក្នុងពិធីចែកអំណោយដល់ប្រជាពលរដ្ឋជួបគ្រោះទឹកជំនន់និងជនពិការសរុបចំនួន ៨៣គ្រួសារនិងសំណេះសំណាលកងកម្លាំងស៊ីម៉ាក់នៅស្រុកគាស់ក្រឡ កាលពីថ្ងៃទី១៩ខែតុលា ឆ្នាំ២០២០។
ឯកឧត្តម ហេង រតនា បានមានប្រសាសន៍ថា បញ្ហាគ្រាប់មីននៅតែគំរាមកំហែងពលរដ្ឋកម្ពុជា ខណៈជារៀងរាល់ឆ្នាំ ក៏មានរងគ្រោះបណ្ដាលឲ្យស្លាប់និងរបួសពិការ ដែលបញ្ហានេះបានធ្វើឲ្យរាជរដ្ឋាភិបាល នៅតែមានការព្រួយបារម្ភ។នៅចុងរដូវវស្សានេះ ខេត្តមួយចំនួន ក្នុងនោះក៏មានខេត្តបាត់ដំបង បានជួបគ្រោះជំនន់ទឹកភ្លៀង បង្កឲ្យប៉ះពាល់ដល់ផ្ទះសម្បែង ផលដំណាំ និងហេដ្ឋារចនាសម្ព័ន្ធមួយចំនួននិងក៏មានការច្រុះដីធ្វើឲ្យគ្រាប់មីនបានផុសចេញពីដី ដូច្នេះហើយសូមអំពាវនាវ ដល់អាជ្ញាធរគ្រប់ខេត្ត ជួយផ្សព្វផ្សាយពីបញ្ហាគ្រាប់មីននិងយុទ្ធភ័ណ្ឌមិនទាន់ផ្ទុះនេះ ឲ្យកាន់តែទូលំទូលាយបន្ថែមទៀត ដើម្បីកុំឲ្យមានពលរដ្ឋរងគ្រោះថ្នាក់ ពិសេសពលរដ្ឋនៅតំបន់ដែលមានចម្ការមីន។
ឯកឧត្តម ហេង រតនា បានអំពាវនាវដល់ពលរដ្ឋ ដែលប្រកបរបរកសិកម្ម ហើយនឹងចាប់ផ្ដើមធ្វើស្រែចម្ការ នៅចុងរដូវវស្សា ឬពេលទឹកស្រកនេះ ត្រូវមានការប្រុងប្រយ័ត្នពីបញ្ហាគ្រាប់មីន ព្រោះដីនៅជ្រាយ ខ្លាចជួបបញ្ហាជាយថាហេតុ ។
គួរបញ្ជាក់ថា សម្រាប់ប្រជាពលរដ្ឋដែលរងគ្រោះដោយទឹកជំនន់និងជនពិការ ទទួលបានអំណោយពីឯកឧត្តមអគ្គនាយកមជ្ឈមណ្ឌលកម្ចាត់មីន មានដូចជា អង្ករ ទឹកត្រី ទឹកស៊ីអ៊ីវ ទឹកសុទ្ធ មី និងថវិកាមួយចំនួនទៀត ៕ដោយ៖អ៊ុងសារុំ
