ភ្នំពេញ៖នាយឧត្តមសេនីយ៍ មៀច សុផាន់ណា បានថ្លែងថា ការងារប្រយុទ្ធប្រឆាំងបទល្មើសផលិតផលក្លែងក្លាយ ទទួលបានជោគជ័យយ៉ាងណាក៏ដោយ ក៏បទល្មើសនេះ កំពុងរីករាលដាលពីមួយថ្ងៃទៅមួយថ្ងៃ និងស្ទើរតែគ្រប់ទីកន្លែង ហើយត្រូវបានសកលលោក ចាត់ទុកជាបទល្មើសឧក្រិដ្ឋឆ្លងដែន ដែលមានលក្ខណៈជាអង្គការចាត់តាំង ខណៈ៩ខែឆ្នាំនេះ គណៈកម្មាធិការប្រយុទ្ធប្រឆាំងផលិតផលក្លែងក្លាយ បង្ក្រាបឱសថខុសច្បាប់ ផលិតផលវេជ្ជសាស្ត្រ និងផលិតផលក្លែងក្លាយខុសច្បាប់ បានជិត៦០០តោន។
គណៈកម្មាធិការប្រយុទ្ធប្រឆាំងផលិតផលក្លែងក្លាយ(គ.ប.ផ.ក) បើកកិច្ចប្រជុំស្តីពី “យន្តការអនុវត្តន៍ការប្រយុទ្ធប្រឆាំងផលិតផលក្លែងក្លាយ និងទិសដៅអនុវត្តបន្ត ”
នៅទីស្តីការក្រសួងមហាផ្ទៃ នាព្រឹកថ្ងៃទី២០ ខែតុលា ឆ្នាំ២០២០ គ.ប.ផ.ក បានរៀបចំកិច្ចប្រជុំស្តីពី “យន្តការអនុវត្តន៍ការប្រយុទ្ធប្រឆាំងផលិតផលក្លែងក្លាយ និងទិសដៅអនុវត្តបន្ត” ក្រោមអធិបតីភាព ឯកឧត្តម នាយឧត្តមសេនីយ៍ មៀច សុផាន់ណា រដ្ឋលេខាធិការក្រសួងមហាផ្ទៃ និងជាប្រធាន គ.ប.ផ.ក។
ជាកិច្ចចាប់ផ្តើម ឯកឧត្តម ឧត្តមសេនីយ៍ឯក តាន់ សុខវិជ្ជា ប្រធានលេខាធិការដ្ឋាន នៃ គ.ប.ផ.ក បានអានរបាយការណ៍សកម្មភាព និងទិសដៅអនុវត្តបន្ត ដោយសង្ខេប រយៈពេល ៩ខែ ឆ្នាំ២០២០ របស់ គ.ប.ផ.ក ដែលបានអនុវត្តកន្លងមក គឺបានចុះបង្ក្រាបឱសថខុសច្បាប់ ផលិតផលវេជ្ជសាស្ត្រ និងផលិតផល ដែលក្លែងក្លាយខុសច្បាប់ទូទៅ សរុបចំនួន ១៣៤ករណី ស្មើនឹងចំនួន ៥៩៤.៦៥តោន។
ឧត្តមសេនីយ៍ឯក តាន់ សុខវិជ្ជា បានឲ្យដឹងទៀតថា ក្នុងចំណោមការបង្ក្រាបនោះ រួមមាន៖
១) ស្ថិតិតាមប្រភេទផលិតផល៖ ឱសថ ១៩ករណី ផលិតផលវេជ្ជសាស្ត្រប្រឆាំងនឹងមេរោគកូវីដ១៩ ចំនួន១២ករណី ផលិតផលឧបភោគ និងបរិភោប ៣៥ករណី ផលិតផលគ្រឿងសម្អាង ២៩ករណី ផលិតផលប្រើប្រាស់ ២០ករណី និងផលិតផលថ្នាំជក់ ១៩ករណី។
២) ស្ថិតិតាមបណ្តាខេត្ត៖ ភ្នំពេញ ១១១ករណី កណ្តាល១១ករណី កំពង់ស្ពឺ ២ករណី តាកែវ ១ករណី ព្រះសីហនុ ២ករណី បាត់ដំបង ១ករណី កំពង់ចាម ១ករណី ត្បូងឃ្មុំ ៤ករណី និងស្វាយរៀង ១ករណី។
៣) ស្ថិតិតាមខែ៖ មករា ៣ករណី កុម្ភៈ ៣ករណី មីនា ១៣ករណី មេសា ៣២ករណី ឧសភា ២០ករណី មិថុនា ២២ករណី កក្កដា ២០ករណី សីហា ១១ករណី និងកញ្ញា ១០ករណី។
៤) ស្ថិតិតាមនីតិវិធី៖ អាជីវកម្មអនុលោមតាមច្បាប់ ៩ករណី កិច្ចសន្យាអប់រំណែនាំ ១០៥ករណី ផាកពិន័យតាមវិធានក្រសួងពាក់ព័ន្ធ ១ករណី។ កំពុងបន្តនីតិវិធី គបផក ៦ករណី។ បញ្ជូនសំណុំរឿងអយ្យការ/តុលាការ ១៣ករណី (ឃាត់ខ្លួនមនុស្ស ២០នាក់) ដោយក្នុងនោះកំពុងបន្តនីតិវិធី ១១ករណី (មនុស្ស ១៨នាក់) និងតុលាការសម្រេច ២ករណី (មនុស្ស២នាក់ ដាក់ពន្ធនាគារ)។
ជាកិច្ចបន្ត ឯកឧត្តម នាយឧត្តមសេនីយ៍ មៀច សុផាន់ណា បានមានប្រសាសន៍ស្វាគមន៍បើកកិច្ចប្រជុំ និងដឹកនាំពិភាក្សាលើប្រធានបទ ៖
១. យន្តការប្រយុទ្ធប្រឆាំងផលិតផលក្លែងក្លាយ ឲ្យបានជោគជ័យ មានប្រសិទ្ធិភាព និងទិសដៅអនុវត្តបន្ត
២. ការងារផ្នែកច្បាប់ លិខិតបទដ្ឋានគតិយុត្តិដើម្បីធានាដល់ការអនុវត្ត និងបញ្ហាផ្សេងៗ ។
ក្នុងកិច្ចប្រជុំពិភាក្សានេះ ឯកឧត្តម នាយឧត្តមសេនីយ៍ បានបញ្ជាក់ពីជំហរ របស់ គ.ប.ផ.ក គឺធ្វើដើម្បីការធានា និងការពារសុខុមាលភាពប្រជាពលរដ្ឋ ជាចម្បង ដោយជំរុញការងារផ្សព្វផ្សាយអប់រំបង្កា និងទប់ស្កាត់ ការអនុវត្តកិច្ចប្រតិបត្តិការបង្ក្រាប និងកិច្ចសហប្រតិបត្តិការ សម្របសម្រួលជាមួយ បណ្តាអន្តរក្រសួង ស្ថាប័នពាក់ព័ន្ធនានា ដើម្បីរួមគ្នាប្រយុទ្ធប្រឆាំងផលិតផលក្លែងក្លាយ ដែលករណីនេះមិនមែនជាសមត្ថកិច្ចផ្តាច់មុខ របស់ក្រសួង ឬស្ថាប័នណាមួយតែឯកឯងនោះទ្បើយ ។ ឯកឧត្តម នាយឧត្តមសេនីយ៍ បានបន្តលើកទ្បើងថា ទោះបីជាបច្ចុប្បន្ននេះ ការងារប្រយុទ្ធប្រឆាំងបទល្មើសផលិតផលក្លែងក្លាយ ទទួលបានជោគជ័យយ៉ាងណាក៏ដោយ ក៏បទល្មើសនេះកំពុងរីករាលដាលពីមួយថ្ងៃទៅមួយថ្ងៃ និងស្ទើតែគ្រប់ទីកន្លែង ហើយត្រូវបានសកលលោកចាត់ទុកជាបទល្មើសឧក្រិដ្ឋឆ្លងដែនដែលមានលក្ខណៈជាអង្គការចាត់តាំង ។
ក្នុងកិច្ចប្រជុំនេះដែរ ឯកឧត្តម នាយឧត្តមសេនីយ៍ បានដឹកនាំអង្គប្រជុំពិភាក្សា ដើម្បីប្រមូលធាតុចូលផ្សេងៗ ដែលតំណាងអន្តរក្រសួង ស្ថាប័ននានា និងមន្ត្រីជំនាញចួលរួមជាមតិយោបល់ ដើម្បីបញ្ចូលក្នុងយន្តការអនុវត្ត ទិសដៅបន្ត និងបញ្ចូលក្នុងការងារផែនការសកម្មភាព ៥ ឆ្នាំ គឺផែនការ ២០២០ ដល់ ២០២៥ របស់ គ.ប.ផ.ក ។
នាយឧត្តមសេនីយ៍ មៀច សុផាន់ណា បានលើកឡើងថា ការងារទទួលបានជោគជ័យទាំងនេះ មិនមែនកើតឡើងដោយសារ មន្ត្រីរបស់គណៈកម្មាធិការមួយមុខទេ តែជាលទ្ធផលល្អ ដែលកើតឡើងពីគ្រប់ភាគីពាក់ព័ន្ធ មកពីក្រសួងស្ថាប័ននានាទាំងអស់។ ឯកឧត្តមបានរំលឹក ដល់ភាគីពាក់ព័ន្ធដែលជាសមាជិកគណៈកម្មាធិការ ត្រូវរួបរួមគ្នាបន្ថែមទៀត ដើម្បីប្រយុទ្ធប្រឆាំងនឹងផលិតផលក្លែងក្លាយ ក្នុងការលើកកម្ពស់សុខភាព និងសុវត្ថិភាពអ្នកប្រើប្រាស់៕
ដោយ៖បញ្ញាស័ក្តិ