សៀមរាប ៖ អ្នកនាំពាក្យសាលាដំបូង និងអយ្យការអមសាលាដំបូងខេត្តសៀមរាប សេចក្តីប្រកាសព័ត៌មាន ស្តីពីលទ្ធផល ១៥០ថ្ងៃ នៃការអនុវត្តយុទ្ធនាការដោះស្រាយការកកស្ទះសំណុំរឿងនៅសាលាដំបូង និងអយ្យការអមសាលាដំបូងខេត្តសៀមរាប។
បើតាមសេចក្តីប្រកាសព័ត៌មាន៖ អ្នកនាំពាក្យសាលាដំបូង និងអយ្យការអមសាលាដំបូងខេត្តសៀមរាប មានកិត្តិយសសូមគោរព ជម្រាបជូនសាធារណៈជនទាំងអស់មេត្តាជ្រាបថា៖ កាលពីថ្ងៃទី ១៦ ខែតុលា ឆ្នាំ២០២០ គណៈកម្មការ ដឹកនាំយុទ្ធនាការដោះស្រាយការកកស្ទះសំណុំរឿងនៅតាមសាលាដំបូងរាជធានី ខេត្ត (គ.យ.ក.ស)បានបើកកិច្ចប្រជុំ ដើម្បីពិនិត្យមើលវឌ្ឍនភាព និងលទ្ធផលរយៈពេល ១៥០ថ្ងៃ នៃការអនុវត្តយុទ្ធនាការដែលបាន ប្រកាសចាប់ផ្តើមកាលពីថ្ងៃទី១៨ ខែឧសភា ឆ្នាំ២០២០ កន្លងទៅ។ កិច្ចប្រជុំនេះប្រព្រឹត្តទៅក្រោមអធិបតីភាព ដ៏ខ្ពង់ខ្ពស់របស់ ឯកឧត្តម កើត រិទ្ធ រដ្ឋមន្ត្រីក្រសួងយុត្តិធម៌ និងជាប្រធាន គ .យ. ក .ស និងមានការចូល រួមពីថ្នាក់ដឹកនាំ ក្រសួងយុត្តិធម៌ ប្រធានសាលាដំបូង ព្រះរាជអាជ្ញានៃអយ្យការអមសាលាដំបូង និងប្រធាន លេខាធិការដ្ឋានរដ្ឋបាលសាលាដំបូង ទូទាំងប្រទេស។
ជាលទ្ធផល សាលាដំបូង និងអយ្យការអមសាលាដំបូងខេត្តសៀមរាប បានដោះស្រាយសំណុំរឿង ព្រហ្មទណ្ឌចាស់ដែលកកស្ទះដំណាក់កាលអយ្យការ ដំណាក់កាលស៊ើបសួរ និងដំណាក់កាលជំនុំជម្រះ មានចំនួនសរុប ១ ៥៥៥ សំណុំរឿង ស្មើនឹង ៩៨% នៃសំណុំរឿងព្រហ្មទណ្ឌកកស្ទះ (សំណុំរឿងដែល ត្រូវបានជំនុំជម្រះរួច មានចំនួន ៤០៥ សំណុំរឿង ស្មើនឹង ៩៧% នៃសំណុំរឿងទាំងអស់ក្នុងដំណាក់កាល ជំនុំជម្រះ)។ បន្ថែមពីនេះ សាលាដំបូង និងអយ្យការអមសាលាដំបូងខេត្តសៀមរាប ក៏បានដោះស្រាយ សំរឿងព្រហ្មទណ្ឌថ្មី មានចំនួនសរុប ២ ០៣២ សំណុំរឿង ស្មើនឹង ៨៣% នៃសំណុំរឿងព្រហ្មទណ្ឌថ្មី (សំណុំរឿងព្រហ្មទណ្ឌថ្មីដែលត្រូវបានជំនុំជម្រះរួច មានចំនួន ១ ០២៥ សំណុំរឿង ស្មើនឹង ៩៥% នៃ សំណុំរឿងថ្មីទាំងអស់ក្នុងដំណាក់កាលជំនុំជម្រះ)។ ជាមួយនឹងលទ្ធផលនេះ គ.យ .ក.ស ក៏បានប្រកាស អំពីការជោគជ័យនៃការអនុវត្តយុទ្ធនាការដល់សាលាដំបូង និងអយ្យការអមសាលាដំបូងខេត្តសៀមរាប ផងដែរ ។
ទន្ទឹមនឹងនេះដែរ សាលាដំបូង និងអយ្យការអមសាលាដំបូងខេត្តសៀមរាប សូមថ្លែងអំណរគុណ យ៉ាងជ្រាលជ្រៅបំផុតចំពោះ ក្រសួងយុត្តិធម៌ ដែលបានរៀបចំឯកសារជំនួយស្មារតីស្ដីពីយុទ្ធនាការ, សេចក្តីណែនាំស្តីពីគោលការណ៍ដែលត្រូវអនុវត្តក្នុងយុទ្ធនាការ និងបង្កើតគណៈកម្មការដឹកនាំយុទ្ធនាការដោះស្រាយ ការកកស្ទះសំណុំរឿងនៅតាមសាលាដំបូងរាជធានី ខេត្ត(គ.យ.ក.ស) និងក្រុមការងារទី៣ នៃ គ.យ.ក.ស ដែលបានចង្អុលបង្ហាញ លើកទឹកចិត្តជួយជ្រោមជ្រែង និងដោះស្រាយនូវបញ្ហាប្រឈមនានា ព្រមទាំង សូមថ្លែងអំណរគុណដល់ គណៈបញ្ជាការឯកភាពខេត្ត ចៅក្រម ព្រះរាជអាជ្ញា ក្រឡាបញ្ជី អាជ្ញាសាលា មន្ត្រី លេខាធិការដ្ឋានរដ្ឋបាល មន្ត្រីនគរបាលយុត្តិធម៌ មន្ទីរ-អង្គភាពជុំវិញខេត្ត ព្រមទាំងបណ្ដាស្ថាប័ន និងអង្គភាព ពាក់ព័ន្ធផ្សេងទៀត ដែលបានចូលរួមយ៉ាងសកម្មប្រកបដោយឆន្ទៈ និងស្មារតីទទួលខុសត្រូវខ្ពស់ ក្នុងការ ជម្រុញការអនុវត្តយុទ្ធនាការដោះស្រាយការកកស្ទះសំណុំរឿងនៅសាលាដំបូង និងអយ្យការអមសាលាដំបូង ខេត្តសៀមរាប ដើម្បីជាប្រយោជន៍ដល់ប្រជាពលរដ្ឋ វិស័យយុត្តិធម៌ ក៏ជាកិត្តិយសនៃស្ថាប័ន និងអង្គតុលាការ ទាំងមូលផងដែរ។
បន្ថែមពីនេះទៀត សាលាដំបូង និងអយ្យការអមសាលាដំបូងខេត្តសៀមរាប សូមបន្ត ប្តេជ្ញាចិត្តយ៉ាងមោះមុតថា នឹងខិតខំប្រឹងប្រែងអនុវត្ត តួនាទី ភារកិច្ច ប្រកបដោយឆន្ទៈ និងការទទួលខុស ត្រូវខ្ពស់ ដើម្បីសម្រេចបានជោគជ័យលើការងារថ្មីៗបន្ថែមទៀត ដោយប្រកាន់ខ្ជាប់នូវអភិក្រមការងារក្នុង យុទ្ធនាការ គឺ “លឿន ត្រឹមត្រូវ យុត្តិធម៌ និងមិនពុករលួយ”៕ ដោយ៖បញ្ញាស័ក្តិ
