ភ្នំពេញ៖ ឯកឧត្ដម ឧត្តមសេនីយ៍ឯក នាក់ យុទ្ធា អគ្គលេខាធិការស្តីទីអាជ្ញាធរជាតិប្រយុទ្ធប្រឆាំងគ្រឿងញៀនមានប្រសាសន៍បែបនេះក្នុងពិធីបិទកិច្ចប្រជុំពិនិត្យបញ្ចប់គោលការណ៍ណែនាំនៃការព្យាបាល វិបត្តិបណ្តាលមកពីការប្រើប្រាស់អាភៀនលើសកម្រិតនៅថ្ងៃទី២១ ខែតុលា ឆ្នាំ២០២០ នេះនៅខេត្តសៀមរាប ក្រោយបានដំណើរការតាំងពីថ្ងៃ១៩ ខែតុលា ឆ្នាំ២០២០មក។
កិច្ចប្រជុំមានការអញ្ជើញចូលរួមពីអគ្គលេខាធិការដ្ឋានអាជ្ញាធរជាតិប្រយុទ្ធប្រឆាំងគ្រឿងញៀន ក្រសួងសុខាភិបាល និងតំណាងពីមន្ទីរប្រឆាំងគ្រឿងញៀន ស្នងការនគរបាលខេត្តសៀមរាប មន្ទីរសុខាភិបាលរាជធានីភ្នំពេញ ខេត្តសៀមរាប ព្រះសីហនុ និងខេត្តបន្ទាយមានជ័យ និងក្រុមគោលដៅនិងអង្គការកសាង។
លោកវេជ្ជបណ្ឌិត ស៊ិន អ៊ាប តំណាងឱ្យក្រសួងសុខាភិបាល បានធ្វើរបាយការណ៍ជូនថា ក្រោយពីដំណើរការបានបីថ្ងៃកន្លងមក កិច្ចប្រជុំបានធ្វើកិច្ចពិភាក្សាគ្នាយ៉ាងផុលផុស ដោយប្រមូលបាននូវមតិយោបល់ដែលជាធាតុចូលបន្ថែមពីគ្រប់ផ្នែកពាក់ព័ន្ធទាំងអស់ ។
ក្នុងឱកាសនោះ ឯកឧត្តម ឧត្តមសេនីយ៍ឯក នាក់ យុទ្ធា អគ្គលេខាធិការស្តីទី ការកើនឡើងនៃចំនួនអ្នកចូលរួមគ្រប់សមាសភាពពាក់ព័ន្ធរាជរដ្ឋាភិបាល អង្គការដៃគូ វិស័យឯកជន បានធ្វើឱ្យយុទ្ធនាការប្រឆាំងគ្រឿងញៀនទទួលបានជោគជ័យ ការងារផ្សព្វផ្សាយអប់រំធ្វើឱ្យប្រជាពលរដ្ឋយល់ដឹងពីគ្រឿងញៀន និងការងារព្យាបាលអ្នកញៀនគ្រឿងញៀនគឺនៅតែចាំបាច់ដែលត្រូវតែរួមគ្នាដោះស្រាយ និងសូមអំពាវនាវឱ្យមានកិច្ចសហការថែមទៀតរវាងវិស័យអនុវត្តច្បាប់ វិស័យសុខាភិបាល និងអង្គការមិនមែនរដ្ឋាភិបាល ដើម្បីអនុវត្តផែនការសកម្មភាពនៃយុទ្ធនាការប្រយុទ្ធប្រឆាំងគ្រឿងញៀន និងគោលនយោបាយភូមិ ឃុំ/សង្កាត់មានសុវត្ថិភាព ឱ្យកាន់តែមានប្រសិទ្ធភាព ហើយការងារប្រយុទ្ធប្រឆាំងគ្រឿងញៀននឹងមិនទទួលបានជោគជ័យទេ ប្រសិនបើមិនមានកិច្ចសហការពហុវិស័យបែបនេះទេ ។
ជាមួយគ្នានេះ ឯកឧត្តម ឧត្តមសេនីយ៍ឯក នាក់ យុទ្ធា បានថ្លែងដោយសង្ឃឹមមុតមាំថា គោលការណ៍ណែនាំនៃការព្យាបាល វិបត្តិបណ្តាលមកពីការប្រើប្រាស់អាភៀនលើសកម្រិតនឹងក្លាយជាឧបករណ៍ស្តង់ដារសម្រាប់ផ្តល់សេវាសង្គ្រោះបន្ទាន់ដល់អ្នកប្រើប្រាស់អាភៀនលើសកម្រិត ដែលអាចអនុវត្តបានទាំងអស់គ្នា ស្របតាមតម្រូវការ និងបរិបទជាក់ស្តែងនៃប្រទេសកម្ពុជាយើង ។
បើយោងតាមរបាយការណ៍របស់ការិយាល័យអង្គការសហប្រជាជាតិស្តីពីគ្រឿងញៀន និងឧក្រិដ្ឋកម្ម (UNODC) បានបង្ហាញថា នៅឆ្នាំ២០២០ នេះ លើសកលលោកមានអ្នកប្រើប្រាស់គ្រឿងញៀនប្រមាណ ២៦៩ លាននាក់ ដែលក្នុងនោះប្រមាណ ៣៥,៦ លាននាក់ ជាអ្នកញៀនគ្រឿងញៀន ហើយអ្នកប្រើប្រាស់អាភៀនមានប្រមាណ ៥៨ លាននាក់ ស្ថិតក្នុងលំដាប់ទី២ បន្ទាប់ពីអ្នកប្រើប្រាស់កញ្ឆាដែលមានប្រមាណ ១៩២ លាននាក់ ៕ដោយ៖បញ្ញាស័ក្តិ
