ខេត្តមណ្ឌលគិរី៖ មន្ទីរបរិស្ថានខេត្តមណ្ឌលគិរី បានចេញសេចក្តីប្រកាសព័ត៌មាន ស្តីពីការអនុវត្តនីតិវិធីទប់ស្កាត់ និងបង្ក្រាបបទល្មើសធនធានធម្មជាតិរបស់មន្ត្រីឧទ្យានុរក្សដែនជម្រកសត្វព្រៃស្រែពក ខេត្តមណ្ឌលគិរី។ បច្ចុប្បន្នផ្អែកទៅលើអង្គហេតុ និងអង្គច្បាប់ មន្ត្រីឧទ្យានុរក្សដែនជម្រកសត្វព្រៃស្រែពក បាននិងកំពុងរៀបចំ កសាងសំណុំរឿងបទល្មើសធនធានធម្មជាតិ ចោទប្រកាន់ឈ្មួញរកស៊ីឈើទាំង២នាក់ខាងលើទៅកាន់សាលាដំបូង ខេត្តមណ្ឌលគិរី ដើម្បីចាត់ការបន្តតាមនីតិវិធី។
បើតាមសេចក្តីប្រកាសព័ត៌មានរបស់ មន្ទីរបរិស្ថានខេត្តមណ្ឌលគិរីនៅ ថ្ងៃទី២១ ខែតុលា ឆ្នាំ២០២០ ស្តីពី
ការអនុវត្តនីតិវិធីទប់ស្កាត់ និងបង្ក្រាបបទល្មើសធនធានធម្មជាតិ របស់មន្ត្រីឧទ្យានុរក្សដែនជម្រកសត្វព្រៃស្រែពក។
នៅល្ងាចថ្ងៃពុធ ទី២១ ខែតុលា ឆ្នាំ២០២០ មន្ទីរបរិស្ថានខេត្តមណ្ឌលគិរី បានឃើញការផ្សព្វផ្សាយព័ត៌មាននៅលើបណ្តាញព័ត៌មានគេហទំព័រមួយចំនួន និងការបន្តផ្សាយរូបភាព និងចែករំលែកនូវព័ត៌មាននៅលើបណ្តាញព័ត៌មានសង្គមហ្វេសប៊ុក (Facebook) ដែលមានចំណងជើងថា “មន្ត្រីឧទ្យានុរក្សពីររូបនៅស្រុកពេជ្រាដារងការចោទថាវាយពលរដ្ឋរងរបួសធ្ងន់”។
ករណីខាងលើនេះ មន្ទីរបរិស្ថានខេត្តមណ្ឌលគីរី សូមជម្រាបជូនសាធារណជនឲ្យបានជ្រាបថា ៖ ១.នៅវេលាម៉ោង៣និង១៥នាទីទៀបភ្លឺឈានចូលថ្ងៃទី២១ ខែតុលា ឆ្នាំ២០២០ មន្ត្រីឧទ្យានុរក្សដែនជ្រកសត្វព្រៃស្រែពក នៃមន្ទីរបរិស្ថានខេត្តមណ្ឌលគិរី បានចុះប្រតិបត្តិការទប់ស្កាត់ និងបង្ក្រាបករណីដឹកជញ្ជូនផល អនុផល ធនធានធម្មជាតិ ហើយបានចាប់ឃាត់រថយន្តចំនួន១គ្រឿង ម៉ាកសាំយ៉ុង ពណ៌ទឹកប្រាក់ ពាក់ផ្លាកលេខ រតនគិរី 2A-0218 ផ្ទុកឈើអារប្រភេទលេខ១(សុក្រម)ចំនួន១៥សន្លឹក និងឈើលេខ១(សុក្រម)ជាប្រភេទទ្វារចំនួន១២សន្លឹក នៅចំណុចផ្លូវជាតិលេខ៧៦ ស្ថិតក្នុងភូមិពូជ្រៃចុងជាង ឃុំពូជ្រៃ ស្រុកពេជ្រាដា ខេត្តមណ្ឌលគីរី ក្នុងដែនជម្រកសត្វ ព្រៃស្រែពក ។
អ្នកបើកបររថយន្តត្រូវបានស្គាល់ឈ្មោះ ភាន់ សុភ័ស ភេទប្រុស អាយុ២១ឆ្នាំ ជនជាតិខ្មែរ មានទីលំនៅ បច្ចុប្បន្នភូមិមានជ័យ ឃុំស្រែសង្គម ស្រុកកោះញែក និងអ្នករួមដំណើរឈ្មោះ សាយ ស្រីដាវ ភេទស្រី អាយុ២៨ឆ្នាំ ជនជាតិខ្មែរ ព្រមទាំងមានកូនក្មេងតូចម្នាក់ មានទីលំនៅបច្ចុប្បន្នភូមិរង្សី ឃុំស្រែសង្គម ស្រុកកោះញែក ។ ក្រោយការចាប់ឃាត់រថយន្តខាងលើនេះ អ្នកបើកបររថយន្តបានព្យាយាមចង្អូតក្នុងបំណងបើកគេច ក៏បានកៀរម៉ូតូ១គ្រឿង និងបម្រុងបុករថយន្តរបស់មន្ត្រីឧទ្យានុរក្ស។ បន្ទាប់មកអ្នកបើកបររថយន្តបានចុះពីលើរថយន្តទាញវត្ថុតាង (ឈើ) ទម្លាក់ចុះពីលើរថយន្ត ប៉ុន្តែត្រូវបានមន្ត្រីឧទ្យានុរក្សបញ្ជាឲ្យបញ្ឈប់សកម្មភាព និងបញ្ជាឲ្យបើករថយន្តនោះទៅកាន់ស្នាក់ការដែនជម្រកសត្វព្រៃ ដើម្បីកសាងសំណុំរឿងតាមនីតិវិធី។ ខណៈនោះ អ្នករួមដំណើរឈ្មោះ សាយ ស្រីដាវ និងអ្នកបើកបរក៏ចាប់ផ្តើមបញ្ចេញសកម្មភាពច្រងេងច្រងាង រើបម្រាស់ក្នុងបំណងរត់គេចខ្លួន ថែមទាំងបានយកកាមេរ៉ា ទូរស័ព្ទមកចុចថតសកម្មភាពរបស់មន្ត្រីឧទ្យានុរក្ស រួចចាប់ផ្តើមជេរប្រមាថមកលើមន្ត្រីឧទ្យានុរក្ស ព្រមទាំងគំរាមដុត រថយន្តនិងវត្ថុតាងចោល ដែលជាទង្វើរារាំងការអនុវត្តភារកិច្ចរបស់មន្ត្រីឧទ្យានុរក្ស។ បន្ទាប់មកស្ត្រីឈ្មោះ សាយ ស្រីដាវ ដែលបានកាន់ទូរស័ព្ទចុចថតសកម្មភាពក៏បានរត់ទៅបុកនឹងបង្គោលភ្លើងបណ្តាលឲ្យរងរបួសហូរឈាម។ ដោយមើលឃើញពីចរិតលក្ខណៈបង្កហិង្សារបស់ជនសង្ស័យទាំង២នាក់នេះរួចមក មន្ត្រីឧទ្យានុរក្សបានស្នើសុំកិច្ចសហការ បន្ថែមពីកម្លាំងប៉ុស្តិ៍នគរបាលរដ្ឋបាលឃុំពូជ្រៃ មកជួយអន្តរាគមន៍។
នគរបាលប៉ុស្តិ៍ពូជ្រៃ បានមកដល់និងបានពិនិត្យស្នាមរបួសនៅលើថ្ងាសរបស់ស្ត្រីឈ្មោះ សាយ ស្រីដាវ និងពិនិត្យទីតាំងបង្គោលភ្លើងឃើញថា គឺជាការរត់ទៅបុកបង្គោលភ្លើងដោយខ្លួនឯងបណ្ដាលឲ្យមានរបួសហូរឈាមប្រាកដមែន។ ករណីនេះ បែរជាស្ត្រីឈ្មោះ សាយ ស្រីដាវ ផ្ដល់កិច្ចសម្ភាសន៍ទៅកាន់បណ្តាញព័ត៌មានតាមគេហទំព័រ និងបណ្តាញព័ត៌មានសង្គមហ្វេសប៊ុក បង្កើតនូវព្រឹត្តិការណ៍ភូតកុហកសាធារណជន បង្កជាការភាន់ច្រឡំមកលើការអនុវត្តនីតិវិធីរបស់មន្ត្រីឧទ្យានុរក្ស និងប្រាសចាកពីអង្គហេតុថា ក្រុមមន្ត្រីឧទ្យានុរក្សដែលមានឈ្មោះ ឆាយ ផាន់ណា និងឈ្មោះ លីន ជាអ្នកបង្កហិង្សាវាយដំទៅវិញ។
ឈរលើគោលការណ៍ច្បាប់ជាធរមាន និងយោងទៅលើការអង្កេតតាមដានរបស់មន្ត្រីឧទ្យានុរក្សបង្ហាញថា ស្ត្រីខាងលើ និងអ្នកបើកបរ គឺជាឈ្មួញរកស៊ីឈើ និងជាអ្នកដឹកឈើដ៏សកម្មដោយប្រើប្រាស់រថយន្តប្រភេទសាំយ៉ុង ខាងលើ ។ បច្ចុប្បន្នផ្អែកទៅលើអង្គហេតុ និងអង្គច្បាប់ មន្ត្រីឧទ្យានុរក្សដែនជម្រកសត្វព្រៃស្រែពក បាននិងកំពុងរៀបចំ កសាងសំណុំរឿងបទល្មើសធនធានធម្មជាតិ ចោទប្រកាន់ឈ្មួញរកស៊ីឈើទាំង២នាក់ខាងលើទៅកាន់សាលាដំបូងខេត្តមណ្ឌលគិរី ដើម្បីចាត់ការបន្តតាមនីតិវិធី។
មន្ទីរបរិស្ថានខេត្តមណ្ឌលគីរី មានការសោកស្តាយចំពោះបណ្តាអង្គភាពព័ត៌មានអេឡិចត្រូនិក និងអ្នកយកព័ត៌មានផ្សាយនៅលើគេហទំព័រ ដែលផ្អែកតែទៅលើប្រភពព័ត៌មានតែម្ខាង ហើយផ្សាយរិះគន់បន្ទុះបង្អាប់មកលើការ អនុវត្តនីតិវិធីរបស់មន្ត្រីឧទ្យានុរក្ស ដោយគ្មានវិជ្ជាជីវៈ និងខ្វះក្រមសីលធម៌ជាអ្នកសារព័ត៌មាន៕ដោយ៖បញ្ញាស័ក្តិ
