សៀមរាប៖ សមត្ថកិច្ចមូលដ្ឋានបានឲ្យដឹងថា នៅវេលាម៉ោង ២និង៥០នាទីថ្ងៃទី២២ តុលា ២០២០ មានករណីផ្ទុះអាវុធ នៅផ្លូវជាតិលេខ ចំណុចមុខសាលាបឋមសិក្សាសាមគ្គី ឃុំស្រណាល ស្រុកក្រឡាញ់ ខេត្តសៀមរាប។ សមត្ថកិច្ចកំពុងដុតដៃដុតជើងស្រាវជ្រាវចាប់ជនបង្កបានហើយ ដើម្បីចាត់ការតាមផ្លូវច្បាប់ ក្នុងករណីនេះ ជនបង្កគឺជាប្តីមិនទាន់រៀបការ ដោយសារទំនាស់ពាក្យសម្តីភ្លើងប្រច័ណ្ឌ។
ជនបង្កឈ្មោះ ចាន់ ផល ហៅពៅ ភេទប្រុស អាយុប្រហែល៥០ឆ្នាំ ទីលំនៅភូមិស្វាយធំ ខេត្តសៀមរាប ជិះរថយន្តពណ៌ខ្មៅមិនស្គាល់ម៉ាកស្លាកលេខ៨៧៨៧ អាវុធម៉ាកK៥៤លេខ៣៧៦៣។ ក្នុងហេតុការណ៍បាញ់នោះ បណ្តាលឲ្យជនរងគ្រោះឈ្មោះ សំអុល សុខដានី ភេទស្រី អាយុ២៧ឆ្នាំ ទីលំនៅភូមិសាមគ្គី សង្កាត់ឫស្សីកែវ ភ្នំពេញ រងរបួសធ្ងន់ចំដើមទ្រូងខាងឆ្វេង១គ្រាប់(បៀមគ្រាប់)។ ក្រោយមានការផ្ទុះអាវុធជនបង្ក បានឡើងរថយន្តគេចខ្លួនបាត់ ចំណែកជនរងគ្រោះ ត្រូវបានសមត្ថកិច្ចដឹកបញ្ជូនមកសង្គ្រោះនៅមន្ទីរពេទ្យបង្អែកខេត្តសៀមរាប។
តាមការរៀបរាប់ របស់ជនរងគ្រោះ បានឲ្យដឹងថា នៅវេលាកើតហេតុ រូបនាងត្រូវបាន ប្តី បាញ់សម្លាប់ក្នុងរថយន្ត ត្រូវចំណុចលើ សុដន់ ផ្នែកខាងឆ្វេង បៀមគ្រាប់ជាប់ក្នុងសាច់ តែសំណាងល្អ រូបគាត់មិនស្លាប់ ហើយបានបើកទ្វារថយន្ត រត់ចេញក្រៅ ស្រែកឲ្យគេជួយ។ ខណៈនោះកម្លាំងនគរបាល និង កម្លាំងប្រជាការពារ ដែលការពារ សន្តិសុខ សុវត្ថិភាព ដែលឈរជើងនៅទីនោះ ជួយសង្គ្រោះទាន់ពេលវេលា និង បានបញ្ជូនមកកាន់មន្ទីរពេទ្យបង្អែកខេត្តសៀមរាប៕ ដោយ៖បញ្ញាស័ក្តិ
