ស្ទឹងត្រែង៖សមត្ថកិច្ចឃាត់គ្រឿងចក្រមួយគ្រឿងពាក់ព័ន្ធករណីកាយប្រឡាយព្រំដើម្បីយកដីព្រៃរដ្ឋអត់ប្លង់កម្មសិទ្ធិចេញដោយសុរិយោដីខេត្តមានទំហំជាង ៥០ ហិកតាក្នុងឃុំថាឡាបរិវ៉ាត់ស្រុកថាឡាបរិវ៉ាត់ ខេត្តស្ទឹងត្រែង។
កម្លាំងនគរបាលឃាត់គ្រឿងចក្រមួយគ្រឿងនិងបានប្រគល់ឲ្យជំនាញរដ្ឋបាលព្រៃឈើ ស្រុកកសាងសំណុំរឿងបន្តកាលពីថ្ងៃទី 18 ខែតុលា។រហូតមកដល់ថ្ងៃទី២២ ខែតុលា ឆ្នាំ២០២០នេះ ជំនាញរដ្ឋបាលព្រៃឈើផ្នែកស្រុកថាឡាបរិវ៉ាត់ មិនទាន់បានធ្វើការដឹកជញ្ជូនគ្រឿងចក្រមករក្សាទុកនៅឡើយទេ។
លោកវ៉ា សុខា នាយផ្នែករដ្ឋបាលព្រៃឈើ ស្រុកថាឡាបរិវ៉ាត់ បានបញ្ជាក់ថា គ្រឿងចក្រដែលខាងកម្លាំងនគរបាលឃាត់នោះ ពុំទាន់បានយកចេញមកទេដោយសារគ្រឿងចក្រ បើកចេញពីកន្លែងទីតាំងចម្ងាយជាង ៥០០ ម៉ែត្របានខូច។ ម្យ៉ាងទៀតដោយសារស្ថានភាពផ្លូវក្នុងរដូវធ្លាក់ភ្លៀងលំបាកខ្លាំង។
ប្រភពព័ត៌មានបានឲ្យដឹងថា គ្រឿងចក្រពីរគ្រឿងគ្រោងសម្អាតព្រៃយកដីពីរកន្លែងផ្សេងគ្នា មានទំហំប្រមាណជា ៨០ហិកតា នៅភូមិសាស្ត្រឃុំថាឡាបរិវ៉ាត់ ស្រុកថាឡាបរិវ៉ាត់។ នៅក្នុងនោះគ្រឿងចក្រមួយគ្រឿង កំពុងតែឈូសផ្លូវចូលនិងមួយគ្រឿងទៀត បានកាយប្រឡាយព្រំលើផ្ទៃដីជាង ៥០ហិកតារួចរាល់ហើយ។
ដីជាង៥០ ហិចតា ដែលគ្រឿងចក្រមួយគ្រឿងកាយព្រំ ដើម្បីឈូសឆាយសម្អាតព្រៃនោះ ទំនងមិនទាន់មានប្លង់កាន់កាប់ចេញដោយសុរិយោដីខេត្តនៅឡើយទេ ពីព្រោះថាដីនៅព្រៃពុំទាន់មានដំណាំសោះ។ រីឯម្ចាស់ដីគឺជាអ្នកភ្នំពេញជិះរថយន្តទំនើបមួយគ្រឿង ចេញចូលមើលការខុសត្រូវ។ តែពេលឃើញសមត្ថកិច្ចក៏បើករថយន្តគេចបាត់។
ដំបូងមេការម្នាក់ឈ្មោះឌី បានយកគ្រឿងចក្រចំនួន២គ្រឿង ទៅសម្អាតព្រៃពីរកន្លែងនៅចំណុចខាងលើ។ ប៉ុន្តែសកម្មភាពជាក់ស្តែងគ្រឿងចក្រមួយគ្រឿង ទើបបានកាយព្រំលើផ្ទៃដីទំហំជាង៥០ហិកតាហើយ។ ហេតុនេះហើយកម្លាំងសមត្ថកិច្ចដកហូតយកគ្រឿងចក្រតែមួយគ្រឿងទេ ពីព្រោះថាបានធ្វើសកម្មភាពបទល្មើសជាក់ស្តែង និងប្រគល់ឲ្យជំនាញរដ្ឋបាលព្រៃឈើពិនិត្យបន្ត។ ដោយឡែកមួយគ្រឿងទៀត មិនទាន់ធ្វើសកម្មភាពនៅឡើយទេ។ តែគេបានឃើញធ្វើផ្លូវចូលទៅកាន់ដីទំហំជាង ៥០ ហិកតា។ មេការគ្រឿងចក្រឈ្មោះឌី បានអួតខ្លួនថាគ្រឿងចក្រដែលកំពុងតែកាយនោះ គឺធ្វើផ្លូវសម្រាប់ប្រជាពលរដ្ឋធ្វើដំណើរឆ្លងកាត់តែប៉ុណ្ណោះ ហើយក៏បានសុំអនុញ្ញាតពីសមត្ថកិច្ចពាក់ព័ន្ធ នៅក្នុងមូលដ្ឋានរួចហើយដែរ។ ថែមទាំងអួតថាម្ចាស់ដីមានខ្នងធំណាស់ នៅក្រុងភ្នំពេញ៕ ដោយ៖សុខុម
