ក្រចេះ៖ រដ្ឋបាលខេត្តក្រចេះ បានចេញផ្សាយព័ត៌មានថា ឯកឧត្តម គង់ គឹមនី អញ្ជើញចុះពិនិត្យមើលទីតាំងដីក្រុមហ៊ុនCHPB ដែលកំពុងរងការកាប់ទន្ទ្រានពីសំណាក់ក្រុមអនាធិបតេយ្យ ។
ឯកឧត្តម គង់ គឹមនី អភិបាលរងខេត្តក្រចេះកាលពីព្រឹកថ្ងៃទី២២ ខែតុលា ឆ្នាំ២០២០នេះ បានដឹកនាំមន្ត្រីជំនាញនៃមន្ទីរពាក់ព័ន្ធ និងអាជ្ញាធរស្រុកសំបូរចុះធ្វើការត្រួតពិនិត្យជាក់ស្ដែងនៅទីតាំងដីក្រុមហ៊ុនសម្បទានសេដ្ឋកិច្ច(CHPB) development ដែលស្ថិតនៅក្នុងឃុំកំពងចាម ស្រុកសំបូរ ខេត្តក្រចេះ គណៈក្រុមហ៊ុនមួយនេះត្រូវបានក្រុមជនអនាធិបតេយ្យធ្វើសកម្មភាពកាប់ទន្ទ្រាននឹងសាងសង់ផ្ទះនៅលើដីរបស់ក្រុមហ៊ុនមួយនេះ។
ការចុះពិនិត្យមើលទីតាំងដីសម្បទានសេដ្ឋកិច្ចរបស់ក្រុមហ៊ុន(CHPB) developmentខាងលើគឺធ្វើឡើងបន្ទាប់ពី ខាងភាគីក្រុមហ៊ុនបានស្នើដល់អាជ្ញាធរខេត្តក្រចេះនិងក្រសួង មន្ទីរពាក់ព័ន្ធជួយទប់ស្កាត់ការកាប់រានដីព្រៃរបស់ក្រុមហ៊ុនធ្វើជាកម្មសិទ្ឋិ ពីសំណាក់ពលរដ្ឋចំណាកស្រុកជាច្រើនគ្រួសារ ដែលកំពុងនាំគ្នាកាប់រានដីព្រៃក្រុមហ៊ុនធ្វើជាកម្មសិទ្ឋិផ្ទាល់ខ្លួនកាលពីពេលថ្មីៗកន្លងទៅនេះ។
ឯកឧត្តម គង់ គឹមនី អភិបាលរងខេត្តក្រចេះ បន្ទាប់ពីបានដឹកនាំមន្ត្រីជំនាញមន្ទីរពាក់ព័ន្ធរួមនិងអាជ្ញាធរមូលដ្ឋានចុះពិនិត្យជាក់ស្ដែង ក៏បានបើកកិច្ចប្រជុំពិភាក្សា ជាមួយមន្ត្រីជំនាញ រួមនិងអាជ្ញាធរ ឃុំ ស្រុក និងតំណាងក្រុមហ៊ុនដើម្បី រកដំណោះ ស្រាយជាក់លាក់មួយ លោកក៏បានផ្ដាំផ្ញើឲ្យអាជ្ញាធរឃុំ ស្រុក ចុះស្រាវជ្រាវវែករកមុខមេខ្យាល់ដែលកៀរគរ ឲ្យប្រជាពលរដ្ឋចូលទៅកាប់ទន្ទ្រានដី ក្រុមហ៊ុន ឲ្យបញ្ឈប់ជាបន្ទាន់។
ក្នុងនាមអាជ្ញាធរខេត្ត ឯកឧត្តមអំពាវនាវដល់បងប្អូនប្រជាពលរដ្ឋ ឲ្យចេះគោរពច្បាប់កុំធ្វើអ្វីកុំបំពានច្បាប់ បើសិនជាបងប្អូនខ្វះដីពិតប្រាកដ សុំឲ្យបងប្អូនដាក់ពាក្យស្នើសុំដីសម្បទានសង្គមកិច្ច នៅនឹងមូលដ្ឋានបងប្អូនផ្ទាល់ មកអាជ្ញាធរខេត្ត៕
ដោយ៖បញ្ញាស័ក្តិ