ភ្នំពេញ៖ កិច្ចប្រជុំពេញគណៈរដ្ឋមន្ត្រី ក្រោមអធិបតីភាពដ៏ខ្ពង់ខ្ពស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានសម្រេចអនុម័តទាំងស្រុង លើ “សេចក្តីព្រាងច្បាប់ស្ដីពីការទូទាត់ថវិកាទូទៅ របស់រដ្ឋសម្រាប់ការគ្រប់គ្រងឆ្នាំ២០១៩”។ នេះបើតាមការបញ្ជាក់ពីលោកផៃ ស៊ីផាន អ្នកនាំពាក្យរាជរដ្ឋាភិបាល។
កិច្ចប្រជុំពេញអង្គគណៈរដ្ឋមន្ត្រី កាលពីព្រឹកថ្ងៃទី២៣ ខែតុលា ឆ្នាំ២០២០ នៅវិមានសន្តិភាព ក្រោមអធិបតីភាពដ៏ខ្ពង់ខ្ពស់ របស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានបន្តពិភាក្សាលើរបៀបវារៈស្តីពី “សេចក្តីព្រាងច្បាប់ស្ដីពីការទូទាត់ថវិកាទូទៅ របស់រដ្ឋសម្រាប់ការគ្រប់គ្រងឆ្នាំ២០១៩”
សេដ្ឋកិច្ចកម្ពុជា ត្រូវបានវាយតម្លៃថានៅបន្តរក្សាកំណើនរឹងមាំក្នុងរង្វង់ ៧,១% ក្នុងឆ្នាំ២០១៩ ដែលគាំទ្រដោយកំណើនខ្ពស់លើសពីការរំពឹងទុកនៃអនុវិស័យសំណង់ កំណើនល្អប្រសើរនៃអនុវិស័យអចលនទ្រព្យ លក់ដុំ លក់រាយ និងអនុវិស័យដឹកជញ្ជូននិងទូរគមនាគន៍ខណៈដែលអនុវិស័យកាត់ដេរ មានកំណើនថមថយ ហើយវិស័យកម្មមានកំណើនអវិជ្ជមាន(-០,៥%)។ ឈរលើមូលដ្ឋាននេះ ផ.ស.ស. ថ្លៃបច្ចប្បន្នសម្រាប់ឆ្នាំ២០១៩ សម្រេចបានចំនួន ១១០ ០១៤ ប៊ីលានរៀល ហើយ ផ.ស.ស. សម្រាប់មនុស្សម្នាក់ៗបានកើនឡើងជាបន្តបន្ទាប់ពី ១ ៥៦៣ ដុល្លារអាមេរិក ក្នុងឆ្នាំ២០១៨ ដល់ ១ ៧០០ ដុល្លារអាមេរិក ក្នុងឆ្នាំ២០១៩។ ទន្ទឹមនឹងនេះ អត្រាអតិផរណាមធ្យមប្រចាំឆ្នាំ បានថយចុះពី ២,៥% ក្នុងឆ្នាំ២០១៨ មកត្រឹម ១,៨% ក្នុងឆ្នាំ២០១៩ ស្របពេលដែលអត្រាប្ដូរប្រាក់ស្ថិតក្នុងរង្វង់ដែលអាចគ្រប់គ្រងបានក្នុងកម្រិត ៤ ០៥៥ រៀល ក្នុងមួយដុល្លារអាមេរិក។
ថវិកាឆ្នាំ២០១៩ គឺជាថវិកាដែលត្រូវបានរៀបចំឡើងតាមគោលនយោបាយពង្រឹងការគ្រប់គ្រងថវិកា ក្នុងគោលដៅដោះស្រាយឱ្យបានជាសារវ័ន្ដនូវសេចក្តីត្រូវការក្នុងការឆ្លើយតបទៅនឹងអាទិភាពគោលនយោបាយធំៗ របស់រាជរដ្ឋាភិបាល និងត្រូវការចាំបាច់ជាមូលដា្ឋនរបស់ក្រសួង ស្ថាប័ននានា ដើម្បីបម្រើ និងផ្ដល់នូវការឆ្លើយតបប្រកបដោយប្រសិទ្ធភាពទៅនឹងការទន្ទឹងរង់ចាំ និងបំណងប្រាថ្នារបស់ប្រជាជនដែលជាម្ចាស់ឆ្នោតនៅក្នុងឆ្នាំ២០១៩ ដែលជាឆ្នាំទី១ នៃរាជរដ្ឋាភិបាលនីតិកាសទី៦ នៃរដ្ឋសភា ជាពិសេសការអនុវត្តឱ្យចេញជាលទ្ធផលជាក់ស្ដែងប្រកបដោយប្រសិទ្ធភាពនូវ កម្មវិធីនយោបាយ និងយុទ្ធសាស្ដ្រចតុកោណដំណាក់កាលទី៤ របស់រាជរដ្ឋាភិបាល។
លទ្ធផលនៃការអនុវត្តថវិកាឆ្នាំ២០១៩ បានបង្ហាញឱ្យឃើញថា រាជរដ្ឋាភិបាលកម្ពុជាសម្រេចបាននូវសូចនាករសំខាន់ៗនៃម៉ាក្រូសេដ្ឋកិច្ច និងក្របខ័ណ្ឌហិរញ្ញវត្ថុសាធារណៈជាអាទិ៍កំណើនសេដ្ឋកិច្ចសម្រេចបាន ៧,១% ដូចការគ្រោងទុក។ ផ.ស.ស. សម្រាប់មនុស្សម្នាក់ៗសម្រេចបាន ១ ៧០០ ដុល្លារអាមេរិក អតិផរណាជាមធ្យមប្រចាំឆ្នាំ២០១៩ មាន១,៨% ធៀបនឹងការគ្រោងទុក គឺក្នុងរង្វង់ ៣,១% អត្រាប្ដូរប្រាក់ជាមធ្យម ៤ ០៥៥ រៀលក្នុង១ដុល្លារអាមេរិកធៀបនឹងការគ្រោង ៤ ០៣៧រៀល។ ចំពោះក្របខ័ណ្ឌហិរញ្ញវត្ថុសាធារណៈ កំណើនចំណូលចរន្ដសរុបសម្រេចបាន ៣,០១ពិន្ទុភាគរយ នៃ ផ.ស.ស. ធៀបនឹងគោលដៅ ០,៥៧ពិន្ធុភាគរយ នៃ ផ.ស.ស.។ ដោយសារលទ្ធផលនៃការប្រមូលចំណូលខ្ពស់ និងការអនុវត្តចំណាយថវិកាប្រកបដោយប្រសិទ្ធភាព រាជរដ្ឋាភិបាលមិនត្រឹមតែពុំបានប្រើប្រាស់ប្រាក់សន្សំក្នុងបញ្ជើ រាជរដ្ឋាភិបាលដែលត្រូវបានគ្រោងក្នុងច្បាប់ស្ដីពីហិរញ្ញវត្ថុសម្រាប់ការគ្រប់គ្រងឆ្នាំ២០១៩ ចំនួន ៤០៥ ០០០ លានរៀលប៉ុណ្ណោះទេ តែថែមទាំងសម្រេចបាននូវអនុវត្តថវិកាក្នុងឆ្នាំ សម្រាប់ការគ្រប់គ្រងឆ្នាំ២០១៩ ចំនួន ៣ ៧៣៥ ២៦៧,៤ លានរៀលទៀត ដែលត្រូវបានដាក់បង្កើនជាប្រាក់សន្សំបន្ថែមសម្រាប់រួមចំណែកគាំទ្រដល់ការអនុវត្តអាទិភាពគោលនយោបាយផ្សេងៗទៀតរបស់រាជរដ្ឋាភិបាល៕ដោយ៖បញ្ញាស័ក្តិ
