ភ្នំពេញ៖ ប្រណាំងគោលឿនគឺជាទំនៀមទំលាប់ប្រពៃណីខ្មែរតាំងពីបុរាណកាលរបស់ប្រជាកសិករខ្មែ។ ពិធីនេះគេតែងតែធ្វើឡើងក្រោយរដូវច្រូតកាត់បង្ហើយជាមួយគ្នានិងពិធីបុណ្យដាលានភូមិផងដែរ។
ដោយឡែកនៅព្រឹកថ្ងៃអាទិត្យទី១១ ខែកុម្ភៈ ឆ្នាំ២០១៨ លោក ខាត់ សុខៃ ចៅសង្កាត់ព្រៃស និងជាប្រធានគណៈកម្មាធិការគណបក្សប្រជាជនកម្ពុជាសង្កាត់ បានរៀបចំពិធីប្រណាំងគោលឿន នៅវាលស្រែដ៏ធំមួយស្ថិតក្នុងភូមិព្រៃសកើត សង្កាត់ព្រៃស ខណ្ឌដង្កោ ។
លោក ខាត់ សុខៃ បានបញ្ជាក់ថា៖ ពីធិប្រណាំងគោនេះគឺលោកតែងតែបានរៀបចំធ្វើឡើងជារៀងរាល់ឆ្នាំ គឺចាប់តាំងពីក្រោយថ្ងៃរំដោះ៧មករា១៩៧៩មកម្លេះ រហូតដល់ពេលនេះ៣៨លើកមកហើយ។ លោកបន្ដថា៖ នេះជាលើកទី៣៩ ដែលលោកតែងតែធ្វើពិធីនេះក្នុងគោលបំណងរក្សាទំនៀមទម្លាប់ប្រពៃណីជាតិរបស់ខ្មែរយើង ដែលប្រជាកសិករចូលចិត្តលេងប្រណាំងគោក្រោយរដូវច្រូតកាត់ជាមួយនិងបុណ្យដាលានភូមិរបស់អ្នកភូមិខ្មែរ។
លោក វើក សាមឿន បានបញ្ជាក់ថា៖ ពិធិប្រណាំងគោនេះលោកក៏បានធ្លាប់ស្នើទៅគណៈកម្មាធិការអូឡាំពិកឲ្យដាក់បញ្ចូលកីឡាប្រណាំងគោលឿន ក្នុងគោលបំណងរក្សាវប្បធម៌របស់ខ្មែរកុំឲ្យបាត់បង់សត្វគោ។
លោកបន្ដថា ៖សត្វគោបាន ជួយមនុស្សយើងច្រើនណាស់ កាលពីក្នុងសម័យសង្គ្រាមគេយកគោជួយអូសទាញអាវុធធុនធំ និងដឹកគ្រាប់រំសេវ។ ក្នុងរដូវវស្សាគោបានជួយភ្ជួររាស់ស្រែរបស់ប្រជាកសិករ រហូតដល់ច្រូតបង្ហើយគឺប្រជាកសិករខ្មែរយើង តាមភូមិស្រុកតែងតែបានអួតអាងអំពីគោរបស់ខ្លួន ទើបពួកគេបង្កើតឡើងជាការប្រកួតប្រណាំងគោលឿនរហូតមកដល់បច្ចុប្បន្ននេះ។
លោក ខាត់ សុខៃ បានបញ្ជាក់ថា៖ នៅក្នុងទសវត្សរ៍ឆ្នាំ៨០ពិធីប្រណាំងគោ ក៏បានរៀបចំធ្វើឡើងនៅមុខសារមន្ទីរប្រល័យពូជសាសន៍ជើងឯក កាលណោះលោក ជា សុផារ៉ា អភិបាលក្រុងជាអធិបតីភាព។ សម្តេចតេជោ ហ៊ុន សែន បានអំពាវនាវឲ្យប្រជាកសិករទាំងអស់យកគោទៅចូលរួមប្រណាំងរហូតដល់ទៅ៨០គូរឯណោះ។
លោក ខាត់ សុខៃ បានបន្តថា ៖ ដោយឡែកនៅព្រឹកថ្ងៃអាទិត្យនេះគោដែលបានចូលរួមប្រណាំងមានចំនួន១១នឹម មកពីខេត្តកណ្តាល៧នឹម ខេត្តកំពង់ស្ពឺ៣នឹម និងរាជធានីភ្នំពេញ១នឹម។ ក្នុងការប្រណាំងសម្រាប់គោដែល បានជាប់ចំណាត់ថ្នាក់លេខ១ ទទួលបានថវិកា៤០ម៉ឺនរៀល លេខ២ទទួលបាន៣០ម៉ឺនរៀល លេខ៣ទទួលបាន ២០ម៉ឺនរៀល និងគោមិនមានចំណាត់ថ្នាក់ទទួលបាន១០ម៉ឺនរៀលផងដែរ៕ ដោយ៖បញ្ញាស័ក្តិ
