ភ្នំពេញ៖ សមត្ថកិច្ចបានរកឃើញគ្រឿងសំអាងជាង ២០តោន ដែលខូចគុណភាព និងហួសដឺឡេ ហើយត្រូវបានរឹបអូស ដើម្បីទុកបំផ្លាញ ចោលនៅទីតាំងស្ដុក និងចែកចាយគ្រឿងសម្អាងពីរទីតាំង នៅផ្ទះលេខ G54 យីហោ ជៀន លីយ៉ា សង្កាត់ទំនប់ទឹក ខណ្ឌបឹងកេងកង និងសង្កាត់បឹងទំពុនទី១ ខណ្ឌមានជ័យ។ ទីតាំងគ្រឿងសំអាងត្រូវបានឃ្លុំបេរួមជាមួយនឹងវត្ថុតាងនៅខាងក្នុងទាំងអស់។ ប្រតិបត្តិការបង្ក្រាបគ្រឿងសំអាង ដែលខូចគុណភាព និងហួសដឺឡេនេះ បានធ្វើឡើងកាលពីថ្ងៃទី២២ ខែតុលា ឆ្នាំ២០២០។
គណៈកម្មាធិការប្រយុទ្ធប្រឆាំងផលិតផលក្លែងក្លាយ នៃក្រសួងមហាផ្ទៃ បានឲ្យដឹងថា នៅថ្ងៃទី២៣ ខែតុលា ឆ្នាំ២០២០នេះ ក្រោយធ្វើការត្រួតពិនិត្យរួច សមត្ថកិច្ចបានរកឃើញគ្រឿងសំអាងជាង ២០តោន ដែលខូចគុណភាព និងហួសដឺឡេ ហើយត្រូវបានរឹបអូស ដើម្បីទុកបំផ្លាញ ចោល។ សមត្ថកិច្ចក៏បានឃ្លុំបេបិទទីតាំងជាបណ្តោះអាសន្ន។ ប្រតិបត្តិការចុះបង្ក្រាបទីតាំងស្តុកគ្រឿងសំអាងនេះដឹកនាំដោយលោកឧត្តមសេនីយ៍ឯក តាន់ សុខវិជ្ជា ប្រធានលេខាធិការដ្ឋាន នៃគណៈកម្មាធិការប្រយុទ្ធប្រឆាំងផលិតផលក្លែងក្លាយ ក្រោមការសម្របសម្រួលពី លោក សឿ ឡុងឌី ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ។
គណៈកម្មាការចម្រុះបានពិនិត្យឃើញ ផលិតផលគ្រឿងសម្អាងមានប្រវេទន៍ពីក្រសួងសុខាភិបាល មានចំនួន៤មុខ និងផលិតផលគ្រឿងសម្អាងផ្សេងទៀត គ្មានលេខប្រវេទន៍ពីក្រសួងសុខាភិបាល ទីតាំងស្ដុកផលិតផលគ្រឿងសម្អាង ខុសទីតាំងអនុញ្ញាតពីក្រសួងសុខាភិបាល ផលិតផលគ្រឿងសម្អាង ហួសកាលបរិច្ឆេទប្រើប្រាស់ លាយឡំជាមួយផលិតផលមានសុពលភាពប្រើប្រាស់ និងពុំមានលេខប្រវេទន៍ពីក្រសួងសុខាភិបាល៕
ដោយ៖បញ្ញាស័ក្តិ
