ខេត្តព្រះសីហនុ៖ ភ្ញៀវទេសចរ អ្នកឃ្លាំមើលការអភិវឌ្ឍសង្គម និងប្រជាពលរដ្ឋ គាំទ្រចំណាត់ការ របស់ប្រមុខដឹកនាំរាជរដ្ឋាភិបាល កម្ពុជា ដែលបានសម្រេចបង្កើត”ឧទ្យានជាតិសមុទ្រកោះរ៉ុង ” មានទំហំផ្ទៃដីជាង ៥ម៉ឺនហិចតារ នៅខេត្តព្រះសីហនុ និង កោះកុង សម្រាប់បំរើដល់វិស័យទេសចរណ៍នាថ្ងៃអនាគត។
អ្នកឃ្លាំមើលមួយចំនួននាខេត្តព្រះសីហនុមាន៖ អង្គការលីកាដូ និងសមាគមអាដហុកជាដើម បានគាំទ្រ ចំពោះការចេញអនុក្រឹត្យ របស់ រាជរដ្ឋាភិបាលកម្ពុជា សម្រេចកាត់ផ្ទៃដីមានទំហំជាង ៥ម៉ឺនហិកតា នៅខេត្តព្រះសីហនុ និងកោះកុង បង្កើតជាឧទ្យានជាតិសមុទ្រកោះរ៉ុងនាថ្ងៃអនាគត។
លោកស្រី ជាប សុធារី អ្នកសម្របសម្រួលសមាគមអាដហុក(Adhoc) ប្រចាំខេត្តព្រះសីហនុ បានស្នើដល់ថ្នាក់ដឹកនាំ នៅតាមក្រសួងស្ថាប័នពាក់ព័ន្ធ នៃរាជរដ្ឋាភិបាល មានក្រសួងមហាផ្ទៃ ក្រសួងបរិស្ថាន ក្រសួងរៀបចំដែនដី នគរូបនីយកម្ម និងសំណង់ ក្រសួងកសិកម្ម រុក្ខាប្រមាញ់ និងនេសាទ ព្រមទាំងរដ្ឋបាលខេត្តព្រះសីហនុជាដើម ត្រូវអនុវត្តអនុក្រឹត្យ របស់សម្តេចប្រមុខដឹកនាំរាជរដ្ឋាភិបាលកម្ពុជា ឲ្យមានប្រសិទ្ធភាព។
ជាងនេះទៀត លោកស្រី ក៏ស្នើឲ្យអាជ្ញាធរពាក់ព័ន្ធ ដែលចុះអនុវត្តការងារកាត់ឆ្វៀលដីដាក់ជាឧទ្យានជាតិសមុទ្រកោះរ៉ុងនេះ មិនត្រូវចុះធ្វើសកម្មភាពនាំឲ្យប៉ះពាល់ដល់ដីកម្មសិទ្ធិ របស់ប្រជាពលរដ្ឋ រស់នៅលើកោះរ៉ុងនោះទេ។
ត្រង់ចំណុចនេះ លោកស្រី ជាប សុធារី ក៏ស្នើដល់អាជ្ញាធរក្រសួងស្ថាប័នពាក់ព័ន្ធ និង រដ្ឋបាលខេត្តព្រះសីហនុជាដើម ឲ្យជួយពន្លឿនការចេញប័ណ្ណកម្មសិទ្ធិកាន់កាប់ដីធ្លី នៅលើកោះរ៉ុង និងកោះផ្សេងៗទៀត ជូនប្រជាពលរដ្ឋ បាន ប្រើប្រាស់ស្របច្បាប់ឲ្យបានឆាប់។
លោកស្រី ជាប សុធារី បន្តថា បើយើងមើលទៅតាមខ្លឹមសារអនុក្រឹត្យ គឺមន្ត្រីជំនាញពាក់ព័ន្ធ រួមជាមួយអាជ្ញាធរមូលដ្ឋាន និងប្រជាពលរដ្ឋរស់នៅតំបន់កោះរ៉ុងទាំងអស់ នឹងមានកិច្ចសហការគ្នា ដើម្បីការពារតំបន់ឧទ្យានជាតិសមុទ្រកោះរ៉ុងជាមួយគ្នាបានល្អ។ ប៉ុន្តែប្រសិនបើបែរជាខ្លឹមសារ នៃអនុក្រឹត្យ ដែលរដ្ឋាភិបាលបានចេញមកនេះ វាមានតែនៅលើក្រដាស ហើយការចាត់ចែងអនុវត្តជាក់ស្តែង គឺមិនបានអនុវត្ត ឬធ្វើទៅតាមគោលបំណង ខ្លឹមសារនៃអនុក្រឹត្យនេះ។ ដូច្នេះដីនៅតំបន់ឧទ្យានជាតិសមុទ្រកោះរ៉ុង នឹងអាចប្រឈមការបាត់បង់នៅថ្ងៃណាមួយនាថ្ងៃអនាគត។ លោកស្រីសំណូមពរដល់មន្ត្រីស្ថាប័នពាក់ព័ន្ធឲ្យមានការរិតបន្តឹងផងដែរ ចំពោះបុគ្គល ដែលបានធ្វើសកម្មភាពខុសច្បាប់ និងសំណូមពរដល់អាជ្ញាធរជួយដាក់ផ្ទាំងប៉ាណូធំៗ នៅតាមតំបន់ ដែលត្រូវអភិរក្សការពារទាំងអស់នៅឧទ្យានជាតិសមុទ្រកោះរ៉ុង។
កាលពីថ្ងៃទី៨ ខែកុម្ភៈ ឆ្នាំ២០១៨ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានចេញអនុក្រឹត្យ សម្រេចបង្កើតឲ្យមានជាឧទ្យានជាតិសមុទ្រកោះរ៉ុង ដោយបានដាក់ទីតាំង ឬតំបន់មួយចំនួន នាខេត្តព្រះសីហនុ និងកោះកុង រួមមាន៖ កោះរ៉ុង កោះរ៉ុងសន្លឹម កោះកូន កោះតូច កោះតាទៀម កោះម្នាស់ក្រៅ កោះម្នាស់ក្នុង និងសមុទ្រជុំវិញតំបន់ទាំងនេះ មានផ្ទៃដីសរុប ជាង ៥ម៉ឺន ២ពាន់ ហិកតា (៥២.៤៤៨) អោយក្លាយទៅជាឧទ្យានជាតិសមុទ្រកោះរ៉ុង។ ក្នុងនោះមានផ្ទៃដីលើគោកមានទំហំជាង ៥ពាន់ហិកតា (៥.៣១១) និងផ្ទៃទឹកសមុទ្រមានទំហំជាង ៤ម៉ឺន ៧ពាន់ហិកតា (៤៧.១៣៧)។
ខ្លឹមសារនៅក្នុងអនុក្រឹត្យនេះ គឺមានគោលដៅ ធានាថែរក្សា និងការពារសោភណ្ឌភាព ព្រៃឈើធម្មជាតិ វប្បធម៌ ប្រព័ន្ធអេកូឡូស៊ី និងជីវៈចម្រុះលើកោះ និងបរិវេណសមុទ្រជុំវិញ។ ផ្តល់ផលិតផល និងសេវាកម្មធម្មជាតិ សម្រាប់ការប្រើប្រាស់ប្រកបដោយនិរន្តរភាព។ រក្សាលំនឹងបរិស្ថាន ការពារ និងអភិរក្សធនធានធម្មជាតិ និងរួមចំណែកកាត់បន្ថយការប្រែប្រួលអាកាសធាតុ និងហានិភ័យគ្រោះមហន្តរាយធម្មជាតិ។ លើកកម្ពស់ការចូលរួម របស់សហគមន៍មូលដ្ឋានក៏ដូចជាសាធារណជន ក្នុងការរួមចំណែកដល់ការគ្រប់គ្រង ការការពារ និងការអភិរក្សជីវៈចម្រុះ និងធនធានធម្មជាតិក្នុងតំបន់។
អនុក្រឹត្យដដែល បង្ហាញថា ការកំណត់ផ្ទៃដីជាង ៥ម៉ឺនហិកតា ជាឧទ្យានជាតិសមុទ្រកោះរ៉ុងនាឱកាសនេះ គឺមិនរាប់បញ្ចូលដីកម្មសិទ្ធិឯកជន និងដីប្រើប្រាស់ជាប្រយោជន៍សាធារណៈនោះទេ។
អនុក្រឹត្យមានចុះហត្ថលេខា និងបោះត្រា ដោយសម្តេចនាយករដ្ឋមន្ត្រី ហ៊ុន សែន បានណែនាំដល់ថ្នាក់ដឹកនាំក្រសួងបរិស្ថាន ដែលមានសមត្ថកិច្ចរៀបចំ និងគ្រប់គ្រងឧទ្យានជាតិសមុទ្រកោះរ៉ុង ត្រូវសហការជាមួយក្រសួង ស្ថាប័ន ពាក់ព័ន្ធ និងរដ្ឋបាលដែនដីខេត្តព្រះសីហនុ និងខេត្តកោះកុង ដើម្បីធានាកិច្ចគាំពារ បរិស្ថាន ការអភិរក្សជីវៈចម្រុះ និងការប្រើប្រាស់ធនធានធម្មជាតិប្រកបដោយនិរន្តរភាព។
ជាងនេះទៀត ក្រសួងបរិស្ថាន ក៏ត្រូវកំណត់ និងបែងចែកកាត់ឆ្វៀលផ្ទៃដីវិនិយោគ ដីលំនៅដ្ឋាន ដីស្រែចម្ការ និងដីអាស្រ័យផលជាក់ស្តែង របស់ប្រជាពលរដ្ឋ នៅលើកោះនានា នៃឧទ្យានជាតិសមុទ្រកោះរ៉ុង ដោយអនុលោមតាមច្បាប់ស្តីពីតំបន់ការពារធម្មជាតិ។
អនុក្រឹត្យនេះ ក៏បានចាត់ ឲ្យរដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី រដ្ឋមន្ត្រីក្រសួងមហាផ្ទៃ រដ្ឋមន្ត្រីក្រសួងរៀបចំដែនដី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ រដ្ឋមន្ត្រីក្រសួងបរិស្ថាន រដ្ឋមន្តក្រសួងកសិកម្ម រុក្ខាប្រមាញ់ និងនេសាទ និងរដ្ឋមន្ត្រីគ្រប់ក្រសួង ប្រធានគ្រប់ស្ថាប័នពាក់ព័ន្ធ ត្រូវអនុវត្តអនុក្រឹត្យនេះ ឲ្យមានប្រសិទ្ធភាព ចាប់ពីថ្ងៃចុះហត្ថលេខា ថ្ងៃទី៨ ខែកុម្ភៈ ឆ្នាំ២០១៨តទៅ៕ ដែន សីមា