សៀមរាប ៖ អគ្គស្នងការដ្ឋាននគរបាលជាតិ បានឲ្យដឹងថា កម្លាំងផែនការងារនគរបាលផ្នែកព្រហ្មទណ្ឌ នៃស្នងការដ្ឋាននគបាលខេត្តសៀមរាប បានស្រាវជ្រាវឃាត់ខ្លួនជនសង្ស័យចំនួន ២នាក់ ឈ្មោះ ចាន់ ពៅ ហៅ ចាន់ ផល ភេទប្រុស អាយុ៥៧ឆ្នាំ មុខរបរ លក់ភេសជ្ជៈ រស់នៅភូមិ៥ សង្កាត់ផ្សារថ្មី២ ខណ្ឌដូនពេញ រាជធានីភ្នំពេញ ពីបទ ឃាតកម្មគិតទុកជាមុន(បាញ់និងអាវុធK59 គោលបំណងឲ្យស្លាប់ តែជនរងគ្រោះមិនស្លាប់) និងឈ្មោះ ឃ្លោក គុយបា ហៅគោបា ភេទប្រុស អាយុ៣៦ឆ្នាំ មុខរបរធ្វើស្រែ រស់ភូមិច្រេស ឃុំកណ្តែក ស្រុកប្រាសាទប្រាគង ខេត្តសៀមរាប ពីបទផ្តល់មធ្យោបាយប្រព្រឹត្តិបទល្មើស (អាវុធខ្លីK59) ។
តាមរបាយការណ៍របស់សមត្ថកិច្ចបានឲ្យដឹងថា កាលពីវេលាម៉ោង ០២និង៥០នាទី ទៀបភ្លឺថ្ងៃទី២២ ខែតុលា ឆ្នាំ២០២០ មានករណីផ្ទុះអាវុធ នៅលើកំណាត់ផ្លូវជាតិលេខ៦ ស្ថិតនៅភូមិគោកចាស់ ឃុំស្រណាល ស្រុកក្រឡាញ់ ខេត្តសៀមរាប បណ្តាលជនរងគ្រោះឈ្មោះ សំអុល សុខដានី ភេទស្រី អាយុ២៧ឆ្នាំ ត្រូវត្រង់ដើមដោះខាងឆ្វេងមួយគ្រាប់បណ្តាលឲ្យរងរបួស បន្ទាប់មកកម្លាំងសមត្ថកិច្ច បញ្ជូនទៅសង្គ្រោះនៅមន្ទីរពេទ្យបង្អែកស្រុកក្រឡាញ់ ប៉ុន្តែដោយសារគ្រាប់បៀមជាប់ និងមានឈាមហូរច្រើន ទើបបញ្ជូនបន្តទៅសង្គ្រោះនៅមន្ទីរពេទ្យបង្អែកខេត្តសៀមរាប ។
តាមការបញ្ជាក់ពីជនរងគ្រោះឈ្មោះ សំអុល សុខដានី ភេទស្រី អាយុ ២៧ឆ្នាំ មុខរបរលក់ដូរ រស់នៅភូមិសាមគ្គី សង្កាត់ឬស្សីកែវ ខណ្ឌឬស្សីកែវ រាជធានីភ្នំពេញ បានឲ្យដឹងថា ខ្លួននិងឈ្មោះ ចាន់ ពៅ ហៅ ចាន់ ផល មានទំនាក់ទំនងស្នេហាជាមួយគ្នាតាំងពីអំឡុងឆ្នាំ២០១៧ រហូតដល់បច្ចុប្បន្ន មានកូនស្រីម្នាក់ អាយុ៩ខែ ដោយដឹងថាឈ្មោះ ចាន់ ពៅ ហៅ ចាន់ ផល មិនទាន់លែងលះប្រពន្ធដើមខ្លួនក៏សុំបែកគ្នាជាច្រើនលើក ។
ជនរងគ្រោះបន្តថា នៅថ្ងៃទី២១ ខែតុលា ឆ្នាំ២០២០ វេលាម៉ោង១០និង០០នាទី ឈ្មោះ ចាន់ ពៅ ហៅ ចាន់ ផល បានបើករថយន្តមួយគ្រឿង NISSAN Frontier ទៅដឹករូបខ្លួននិងកូនត្រង់ចំណុចម្តុំស្ពានជ្រោយចង្វា រាជធានីភ្នំពេញ ដោយប្រាប់ថាទៅខេត្តពោធិ៍សាត់ ។ លុះបើកដល់ចំណុចស្ពានព្រែកក្តាម ស្រាប់តែឈ្មោះ ចាន់ ពៅ ហៅ ចាន់ ផល បើកឡើងតាមផ្លូវជាតិលេខ៦ មកខេត្តសៀមរាប លុះដល់ចំណុចម្តុំត្រាំនាគ ស្ថិតក្នុងភូមិសាស្ត្រសង្កាត់ស្លក្រាម ក្រុងសៀមរាប ខេត្តសៀមរាប ពួកខ្លួនបានចូលទៅសម្រាកនៅផ្ទះសំណាក់មួយមិនចាំយីហោ ហើយឈ្មោះ ចាន់ ពៅ ហៅ ចាន់ ផល បានបើកឡានចេញក្រៅប្រហែល ៣០នាទីទើបត្រឡប់មកវិញ ។ លុះដល់វេលាម៉ោង២០និង៣០នាទី ថ្ងៃខែឆ្នាំ ដដែល ពួកខ្លួនក៏នាំគ្នាបន្តដំណើរពីខេត្តសៀមរាបទៅខេត្តបាត់ដំបង ដោយមុនពេលចេញទៅឈ្មោះ ចាន់ ពៅ ហៅ ចាន់ ផល បានឲ្យរូបខ្លួនលេបថ្នាំផ្តាសាយចំនួន៣គ្រាប់ ហើយអង្គុយនៅកៅអីក្រោយ ។ ពេលធ្វើដំណើរតាមផ្លូវឈ្មោះ ចាន់ ពៅ ហៅ ចាន់ ផល បាននិយាយប្លែកៗថា ថ្ងៃក្រោយខ្លួននឹងយកកូនស្រីមកចិញ្ចឹម និងមើលថែឲ្យបានល្អដេកលើទ្រូងម្តាយសិនចុះ ។ លុះបើកដល់ចំណុចរង្វង់មូលគួរស្រូវ ខេត្តបន្ទាយមានជ័យ ដោយសារកូនយំខ្លាំងពេក ក៏បើកឡានត្រឡប់ក្រោយទិសដៅមកខេត្តសៀមរាបវិញ នៅតាមផ្លូវខ្លួនក៏បានដេកលក់នៅកៅអីក្រោយ លុះដល់ចំណុចកើតហេតុខាងលើ ក៏បានឮសំឡេងផ្ទុះអាវុធ ស្រាប់តែខ្លួនមានការឈឺចុកត្រង់ដើមទ្រូងខាងស្តាំ ពេលខ្លួនបើកភ្លើងទូរស័ព្ទបំភ្លឺក៏បានឃើញឈ្មោះ ចាន់ ពៅ ហៅ ចាន់ ផល កាន់កាំភ្លើងខ្លីនៅក្នុងដៃ ។ ពេលនោះខ្លួនបានប្រវាយប្រតប់បើកទ្វាររថយន្ត លោតចុះទៅលើថ្នល់កៅស៊ូ ខណៈពេលរថយន្តកំពុងតែមានចលនាទៅមុខ ជនសង្ស័យឃើញដូចនោះ ក៏បានថយរថយន្ត ក្នុងគោលបំណងកិនទៅលើរូបខ្លួន តែខ្លួនបានលោតចុះទៅក្នុងទឹកប្រឡាយ ហើយជនសង្ស័យបានបើកទ្វាររថយន្តចុះ ហើយរត់ទៅធ្វើសកម្មភាព ប្រវាយប្រតប់និងច្របាច់កនាង ។ ភ្លាមនោះរូបនាងក៏បានស្រែកឱ្យគេឯងជួយ ពេលនោះក៏មានប្រជាការពារ នៅជិតនោះបានចូលទៅជួយនាង ហើយជនសង្ស័យ ក៏បានរត់ឡើងរថយន្ត ហើយបើកគេចខ្លួន ដោយមានកូនស្រីខ្លួននៅជាមួយដែរ ។
សមត្ថកិច្ចបានឲ្យដឹងថា តាមការពិនិត្យវិភាគកន្លែងកើតហេតុ សមត្ថកិច្ចបានធ្វើការចាប់យកវត្ថុតាងមាន៖ អាវុធខ្លី ១ដើម ម៉ាក K59 បង់១, គ្រាប់ ១គ្រាប់, សម្បកគ្រាប់១, ស្រោមកាំភ្លើងពណ៌ខ្មៅ១, អាយឺតដៃខ្លី២ (ពណ៌ស១ និងពណ៌ខ្មៅ១) ។ បន្ទាប់មក កម្លាំងបានបន្តកិច្ចប្រតិបត្តិការ ដោយមានការសហការពីសមត្ថកិច្ចនគរបាលអធិការស្រុកបវេល នៃស្នងការដ្ឋានខេត្តបាត់ដំបង ក៏បានឃាត់ជនសង្ស័យឈ្មោះ ចាន់ ពៅ ហៅ ចាន់ ផល បាននៅវេលាម៉ោង១០និង១៤នាទី ថ្ងៃទី២២ ខែតុលា ឆ្នាំ២០២០ នៅចំណុចភូមិអូរដូនពៅ ឃុំឃ្លាំងមាស ស្រុកបវេល ខេត្តបាត់ដំបង។
តាមសាកសួរជនសង្ស័យឈ្មោះ ចាន់ ពៅ ហៅ ចាន់ ផល ភេទប្រុស អាយុ ៥៧ឆ្នាំ បានឆ្លើយសារភាពថា ៖ ខ្លួនពិតជាបានធ្វើសកម្មភាពដូចជនរងគ្រោះរៀបរាប់ខាងលើពិតប្រាកដមែន ដោយសារខ្លួនខឹងជនរងគ្រោះចេះតែទារប្រាក់ពីរូបខ្លួនជាបន្តបន្ទាប់ បើមិនឲ្យប្រាក់ទៅនាងទេនោះ នាងនឹងយកកូនស្រីទៅជួបប្រពន្ធដើមខ្លួន ដែលអាចទៅជាទំនាស់ឈានដល់ការលែងលះ ។ ក្នុងនោះគេបានសារភាពបន្ថែមថា កាំភ្លើងខ្លីខាងលើគឺរូបខ្លួនបានមកពីឈ្មោះ ឃ្លោក គុយបា ហៅគោបា ភេទប្រុស អាយុ ៣៦ឆ្នាំ រស់នៅភូមិច្រេស ឃុំកណ្តែក ស្រុកប្រាសាទប្រាគង ខេត្តសៀមរាប ។
ផ្អែកតាមចម្លើយសារភាពរបស់ជនសង្ស័យឈ្មោះ ចាន់ ពៅ ហៅ ចាន់ ផល ភេទប្រុស អាយុ ៥៧ឆ្នាំ នៅវេលាម៉ោង៩និង៣០នាទី ថ្ងៃទី២៣ ខែតុលា ឆ្នាំ២០២០ កម្លាំងបានបន្តនាំខ្លួនឈ្មោះ ឃ្លោក គុយបា ហៅគោបា ភេទប្រុស អាយុ ៣៦ឆ្នាំ មកធ្វើការសាកសួរ ។ ឈ្មោះ ឃ្លោក គុយបា គេបានឲ្យដឹងថា គេពិតជាស្គាល់ និងរាប់អានជាមួយជនសង្ស័យពិតមែន ដោយសារជនសង្ស័យមានផ្ទះ និងស្រះចិញ្ចឹមត្រីក្បែរផ្ទះរបស់ខ្លួន ប៉ុន្តែខ្លួនពុំបានលក់ ឬផ្តល់អាវុធខ្លីខាងលើឲ្យទៅជនសង្ស័យនោះទេ។
យ៉ាងណាក្តី សមត្ថកិច្ចបាននាំខ្លួនជនដៃដល់ឈ្មោះ ចាន់ ពៅ ហៅ ចាន់ ផល មកតទល់មុខនឹងឈ្មោះ ឃ្លោក គុយបា ហៅគោបា គេនៅតែរក្សាចម្លើយថា អាវុធខ្លីនោះគឺឈ្មោះ ឃ្លោក គុយបា ឲ្យរូបគេទុកប្រើប្រាស់ដើម្បីការពារខ្លួន និងការពារទ្រព្យសម្បត្តិ ពេលនៅផ្ទះលំហែនៅភូមិច្រេស ឃុំកណ្តែក ស្រុកប្រាសាទប្រាគង ខេត្តសៀមរាប តែម្នាក់ឯង។
ករណីនេះការស៊ើបអង្កេតបានបញ្ចប់សព្វគ្រប់ហើយយើងកំពុងកសាងសំណុំរឿងបញ្ជូនទៅសាលាដំបូងខេត្តសៀមរាប អនុវត្តបន្តតាមនីតិវិធី ៕ ដោយ៖បញ្ញាស័ក្តិ