បន្ទាយមានជ័យ៖ សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានប្រកាសថា សម្ដេចមិនត្រូវការចរចានយោបាយ ជាមួយអ្នកណាទាំងអស់ ហើយអ្នកដែលធ្វើខុសច្បាប់ត្រូវស្ថិតនៅតុលាការ អ្នកដែលកាត់ទោសហើយត្រូវមកជាប់គុកនៅកម្ពុជា បន្ទាប់ពីជាប់គុកហើយចាំនិយាយគ្នាៗ អ្នកឯងរួចផុតពីគុក ហើយមកបង្កើតបក្សនយោបាយជាសិទ្ធិរបស់អ្នកឯង។
ការប្រកាសរបស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីកម្ពុជា បានធ្វើឡើងក្នុងឱកាសដែល បន្តដំណើរចុះសួរសុខទុក្ខ និងចែកអំណោយជាស្បៀងអាហារ និងសម្ភារប្រើប្រាស់ ជូនប្រជាពលរដ្ឋរងគ្រោះដោយជំនន់ទឹកភ្លៀង នៅក្នុងស្រុកម៉ាឡៃ ខេត្តបន្ទាយមានជ័យ នាព្រឹកថ្ងៃទី២៤ ខែតុលា ឆ្នាំ២០២០នេះ។
សម្ដេចតេជោ ហ៊ុន សែន បានប្រកាសបែបនេះ ដើម្បីបញ្ចប់នូវពាក្យចរចាមរាមរបស់អ្នកមួយចំនួនបាននិយាយថា នឹងមានដំណោះស្រាយជាមួយសម្ដេច ហើយសម្ដេចតេជោថ្លែងថា មានតែមកដោះស្រាយជាមួយច្បាប់តែប៉ុណ្ណឹង រឿងចរចានយោបាយគឺគ្មានឡើយ។
សម្ដេចតេជោ ហ៊ុន សែន បានឲ្យដឹងទៀតថា អ្នកខ្លះនិយាយថា នឹងមានដំណោះស្រាយ ខ្ញុំអត់ត្រូវការធ្វើដំណោះស្រាយនយោបាយជាមួយអ្នកណាទាំងអស់ ព្រោះអ្នកទាំងឡាយ ត្រូវដោះស្រាយតែជាមួយច្បាប់តែប៉ុណ្ណឹង អត់មានមកត្រូវការចរចានយោបាយទេ។ ខ្ញុំសូមប្រកាសឲ្យជនរួមជាតិបានដឹង ខ្ញុំមិនត្រូវការចរចាជាមួយអ្នកណាទាំងអស់ អ្នកដែលធ្វើខុសច្បាប់ គឺមានតែតុលាការមួយគត់ ហើយអ្នកដែលបានតុលាការកាត់ទោសហើយត្រូវមកជាប់គុកសិន បន្ទាប់ពីជាប់គុកហើយចាំនិយាយគ្នាៗ អ្នកឯងរួចផុតពីគុក ហើយមកបង្កើតបក្សនយោបាយជាសិទ្ធិរបស់អ្នកឯង អ៊ីចឹងមនុស្សមួយចំនួនដែលរង់ដំណោះស្រាយនយោបាយ ខ្ញុំប្រកាសថា អត់មាន ។
សម្ដេចតេជោ អះអាងថា «ស៊ីសង អាហ៊ុន សែន មិននិយាយរក ចប់ រឿងមានតែប៉ុណ្ណឹង ។ ព្រោះពាក្យអាសែននេះ ខ្ញុំហៅខ្លួនឯង ប៉ុន្តែមានស្រីម្នាក់នោះ ខ្ញុំមិនដឹងថា ស្រីម្នាក់ជាប្រភេទអ្វី វាហ៊ានហៅឯង អាសែន ។ អើមីនាងអើយមីនាង ឲ្យវាចេះខ្មាសអៀនខ្លះមើល ប៉ុន្តែវាងាប់ ខ្ញុំមិនដាក់ប្រទេចបណ្តាសានោះទេ ប៉ុន្តែប្រាប់ឲ្យហើយ ហ៊ុន សែន មិននិយាយរឿងដំណោះស្រាយនយោបាយទេ »៕ដោយ៖បញ្ញាស័ក្តិ