ភ្នំពេញ៖ ក្រោយពីទើបបានបង្កើតគណនីហ្វេសបុកផ្លូវការកាលពីប៉ុន្មានថ្ងៃមុននេះ អ្នកឧកញ៉ា គិត ម៉េង បានបង្ហោះសារយ៉ាងមានអត្ថន័យបង្ហាញពីអារម្មណ៍ពិតរបស់លោកលើបណ្តាញសង្គម បង្កការចាប់អារម្មណ៍យ៉ាងខ្លាំងពីអ្នកលេងបណ្តាញសង្គម និងអ្នកជំនួញជាច្រើន ដែលកន្លងមកលោកកម្រនិងបង្ហាញពីជីវិតឯកជនផ្ទាល់ខ្លួនណាស់។
តាមរយៈផេកហ្វេសប៊ុកដែលទើបតែបង្កើតថ្មីអ្នកឧកញ៉ា គិត ម៉េង បានបង្ហោះសារយ៉ាងមានអត្ថន័យទៅកាន់ក្រុមគ្រួសារនាថ្ងៃទី២៤ ខែតុលា ឆ្នាំ២០២០នេះថា «សូមថ្លែងអំណរគុណចំពោះក្រុមគ្រួសារដែលជាប្រភពកម្លាំង និងកម្លាំងចិត្តដ៏មុតមាំរបស់ខ្ញុំ»។ ដូចដែលយើងធ្លាប់ដឹងស្រាប់ហើយថា អ្នកឧកញ៉ា គិត ម៉េង គឺជាសេដ្ឋីជំនួញជើងចាស់មួយរូប ដែលកម្រនិងបង្ហាញអារម្មណ៍ ឬពាក្យពេចន៍ បង្ហោះលើបណ្ដាញសង្គមណាស់ ដែលជានិច្ចកាលលោកតែងប្រើប្រាស់ជីវិតឯកជនក្នុងភាពស្ងៀមស្ងាត់ ស្រាប់តែសុខៗលោកបង្ហោះសារបង្ហាញអារម្មណ៍បែបនេះ បានបង្កឲ្យអ្នកលេងបណ្តាញសង្គមជាច្រើនចាប់អារម្មណ៍ចូលខំមិនលោកភ្លាមៗ ជាពិសេសអ្នកដែលតែងតែតាមដានព័ត៌មានរបស់លោកនិងចង់ដឹងពីគន្លឹះជោគជ័យកន្លងមក។
អ្វីដែលគួរឲ្យចាប់អារម្មណ៍ជាងនេះទៅទៀតនោះ គឺសារដែលលោកបានបង្ហោះវាហាក់បង្ហាញពីចម្លើយដែលអ្នករាល់គ្នាចង់ដឹងកន្លងមកថាតើ ធ្វើដូចម្តេចទើបលោកឧកញ៉ាជោគជ័យ? ចម្លើយគឺលោកមានឧត្តមភរិយាដ៏ល្អថ្លៃថ្លា ឬកពារថ្លៃថ្នូរ កូនៗដែលជាប្រភពកម្លាំងចិត្តដ៏មុតមាំ ជំរុញឲ្យលោកជំនះរាល់ឧបសគ្គ រហូតជោគជ័យទាំងជីវិតគូរនិងការធ្វើជំនួញ។
គួរបញ្ជាក់ថា បច្ចុប្បន្នអ្នកឧកញ៉ា គិត ម៉េង មានអាជីវកម្មជំនួញនៅក្នុងដៃជាច្រើនដូចជា សណ្ឋាគារ រីស៊ត ជំនួញអចលទ្រព្យ ហិរញ្ញវត្ថុ វិស័យព័ត៌មាន និងការកម្សាន្ត ពាណិជ្ជកម្ម វិស័យទូរគមនាគមន៍ និងព័ត៌មានវិទ្យា និងវិស័យដឹកជញ្ជូនជាដើម៕ ដោយ៖ កូលាបក្រហម
