ភ្នំពេញ៖ ប្រសិនបើគ្មានការប្រែប្រួល នៅព្រឹកថ្ងៃទី២៦ ខែតុលា ឆ្នាំ២០២០ខាងមុខនេះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃកម្ពុជា នឹងអញ្ជើញជាអធិបតីបើកការដ្ឋានសាងសង់ស្ពានបេតុងពីផ្លូវជាតិលេខ១ ទៅកាន់តំបន់អភិវឌ្ឍកោះនរា និងស្ពានបេតុងខ្សែកាបពីតំបន់អភិវឌ្ឍកោះនរា ទៅកាន់ទីក្រុងកោះពេជ្រ ស្ថិតនៅសង្កាត់និរោធ ខណ្ឌច្បារអំពៅ រាជធានីភ្នំពេញ។
បើតាមលិខិតអញ្ជើញរបស់រដ្ឋបាលរាជធានីភ្នំពេញ នារសៀលថ្ងៃទី២៥ ខែតុលា ឆ្នាំ២០២០នេះ លោកឃួង ស្រេង អភិបាល នៃគណៈអភិបាលរាជធានីភ្នំពេញ និងលោកស្រី នឹងអញ្ជើញជាអធិបតីភាពធ្វើពិធីក្រុងពាលីបើកការដ្ឋានសាងសង់ស្ពានទាំងពីរនេះ។
ស្ពានបេតុងខ្សែកាប១ខ្សែ ដែលឆ្លងកាត់ទន្លេបាសាក់ គឺតភ្ជាប់ពីកោះពេជ្រ ទៅគម្រោងអភិវឌ្ឍន៍កោះនរា មានគម្រោងថវិកាសាងសង់តម្លៃ ៣៨លានដុល្លារអាមេរិក។
បើយោងតាមរបាយការណ៍របស់ក្រុមហ៊ុន OCIC បានបង្ហាញអំពីលក្ខណៈបច្ចេកទេសនៃគម្រោងស្ថាបនាស្ពានបេតុងខ្សែកាប ឆ្លងកាត់ទន្លេបាសាក់ តភ្ជាប់ពីកោះពេជ្រ ទៅគម្រោងអភិវឌ្ឍន៍កោះនរា គឺតួស្ពានបេតុងខ្សែកាប និងផ្លូវតភ្ជាប់ក្បាលស្ពាន មានប្រវែងសរុប ៨២៤ម៉ែត្រ។
សម្តេចតេជោនាយករដ្ឋមន្ត្រី កាលពីថ្ងៃទី៧ ខែតុលា ឆ្នាំ២០២០ ក្នុងឱកាសអញ្ជើញសម្ពោធមជ្ឈមណ្ឌលកម្សាន្តខ្នាតយក្សនៅកម្ពុជា «ព្រីនស៍ ម៉ាណ័រ» ស្ថិតនៅតាមបណ្តោយផ្លូវជាតិលេខ១ គីឡូម៉ែត្រលេខ២៤ ភូមិដីឥដ្ឋកោះផុស២ ឃុំដីឥដ្ឋ ស្រុកកៀនស្វាយ ខេត្តកណ្តាលមានប្រសាសន៍បញ្ជាក់យ៉ាងដូច្នេះថា៖ «ថ្ងៃទី២៦នេះខ្ញុំទៅបើកការដ្ឋានទៀត។ បើកការដ្ឋានកសាងស្ពាន តភ្ជាប់កោះពេជ្រជាមួយកោះនរា»។
តាមរយៈសមិទ្ធផលជាបន្តបន្ទាប់នេះ ប្រមុខដឹកនាំកំពូលរាជរដ្ឋាភិបាលកម្ពុជា អះអាងជាថ្មីថា ឧបសគ្គទាំងឡាយមិនអាចបង្អាក់ការអភិវឌ្ឍកម្ពុជាបានទេ។ សម្តេចតេជោ បានបន្ថែមថា ទន្ទឹមនឹងការរីកចម្រើនទៅមុខជាលំដាប់របស់កម្ពុជានៅពេលនេះ ធ្វើឲ្យក្រុមអ្នកប្រឆាំងមិនដែលពេញចិត្ត និងកោតសរសើរឡើយ ប៉ុន្តែសម្តេចសង្កត់ធ្ងន់ថា សម្តីអ្នកទាំងនោះ គឺជាសម្តីអត់ប្រយោជន៍ ប្រៀបបាននឹងសំឡេងសត្វសុនកព្រុសអញ្ចឹង។
គម្រោងស្ថាបនាស្ពានបេតុងខ្សែកាប តភ្ជាប់កោះពេជ្រ ទៅកោះនរា ទំនងជានឹងចាប់ផ្តើមប្រតិបត្តិការក្នុងពេលដ៏ឆាប់ខាងមុខនេះ ដោយសារសម្ភារៈ និងគ្រឿងចក្រមួយចំនួន សម្រាប់សាងសង់ ត្រូវបានក្រុមហ៊ុនវិនិយោគទុនអាណិកជនកម្ពុជា ( OCIC ) បានស្នើសុំគោលការណ៍នាំចូល ពីក្រសួងសេដ្ឋកិច្ចរួចហើយ។
យោងតាមលិខិតមួយច្បាប់របស់ឯកឧត្តម ឃួង ស្រេង អភិបាល នៃគណៈអភិបាលរាជធានីភ្នំពេញ ផ្ញើជូន លោក អូន ព័ន្ធមុនីរ័ត្ន ឧបនាយករដ្ឋមន្ត្រី និងជារដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ សម្ភារៈ និងគ្រឿងចក្រសម្រាប់ស្ថាបនាស្ពាន ដែលក្រុមហ៊ុន OCIC ស្នើសុំនាំចូលនេះ មានតម្លៃ សរុប ៤០.៨៨៨.៥៨០ ដុល្លារអាមេរិក ដោយពន្ធ និងអាការផ្សេងៗ ជាបន្ទុករបស់រដ្ឋ ដោយសាងសង់រយៈពេល៣៨ខែ។
សូមបញ្ជាក់ថា ក្រុមហ៊ុន OCIC បានទទួលគោលការណ៍អនុញ្ញាតពីរាជរដ្ឋាភិបាល ក្នុងការអភិវឌ្ឍកោះនរា នេះ ដែលមានទីតាំងស្ថិតក្នុងខណ្ឌច្បារអំពៅ រាធានីភ្នំពេញ នេះបើយោងតាមរយៈលិខិតលេខ ១០៨៥ សជណ.កស ចុះថ្ងៃទី ២៨ ខែតុលា ឆ្នាំ ២០១៨ របស់ទីស្តីការគណៈរដ្ឋមន្ត្រី។ ជាផ្នែកមួយនៃគម្រោងអភិវឌ្ឍន៍កោះនរារបស់ខ្លួន ក្នុងលិខិតដដែលនោះ មានបញ្ជាក់ថា ក្រុមហ៊ុន OCIC នឹងស្ថាបនាស្ពានបេតុងខ្សែកាបចំនួន ១ ខ្សែ ដើម្បីតភ្ជាប់ទីក្រុងកោះពេជ្រ ទៅគម្រោងអភិវឌ្ឍកោះនរា។
ក្រោយពីសាងសង់រួច ស្ពាននេះ នឹងជួយកាត់បន្ថយការកកស្ទះចរាចរណ៍របស់ប្រជាពលរដ្ឋនៅស្ពានមុនីវង្ស បានមួយកម្រិតធំ ពេលស្ថាបនារួច។ ជាពិសេសជាងនេះទៅទៀត នឹងជួយតភ្ជាប់គមនាគមន៍ និងសកម្មភាពសេដ្ឋកិច្ចពីតំបន់ជ្រោយចង្វារ តំបន់កោះពេជ្រ ទៅតំបន់បឹងស្នោះ និងច្បារអំពៅថែមទៀតផង។
បើតាមក្រុមហ៊ុននេះ គម្រោងទីក្រុងរណបថ្មី កោះនរា គ្រោងចំណាយវិនិយោគប្រមាណជិត២ពាន់លានដុល្លារ។
យោងតាមរបាយការណ៍របស់ក្រុមហ៊ុន OCIC បានបង្ហាញអំពីលក្ខណៈបច្ចេកទេសនៃគម្រោងស្ថាបនាស្ពានបេតុងខ្សែកាប ឆ្លងកាត់ទន្លេបាសាក់ តភ្ជាប់ពីកោះពេជ្រ ទៅគម្រោងអភិវឌ្ឍន៍កោះនរា គឺតួស្ពានបេតុងខ្សែកាប និងផ្លូវតភ្ជាប់ក្បាលស្ពាន មានប្រវែងសរុប ៨២៤ម៉ែត្រ ក្នុងនោះ ទទឹងស្ពាន មានទំហំ ២៤,៥ម៉ែត្រ។ បណ្តោយស្ពានបេតុង មានប្រវែង ៤៨៣ម៉ែត្រ (សសរស្ពានមានគម្លាត ២០ម៉ែត្រ+២១ម៉ែត្រ +១០៨ម៉ែត្រ +១០៨ម៉ែត្រ +១០៨ម៉ែត្រ +២៣ម៉ែត្រ +២៣ម៉ែត្រ)។ ផ្លូវតភ្ជាប់ក្បាលស្ពានត្រើយខាងទីក្រុងកោះពេជ្រ មានប្រវែង ២៤៩ម៉ែត្រ។ ផ្លូវតភ្ជាប់ក្បាលស្ពានត្រើយខាងគម្រោងកោះនរា មានប្រវែង ៩២ម៉ែត្រ។ ទទឹងតភ្ជាប់ក្បាលស្ពានសរុបទាំងផ្លូវស្របក្បាលតួស្ពាន មានទំហំ ២១,៥០ម៉ែត្រ។ ទទឹងតភ្ជាប់ក្បាលស្ពាន សម្រាប់តែស្ពានមេ មានទំហំ ២៤,៥០ម៉ែត្រ។ គន្លងផ្លូវសម្រាប់រថយន្ត មានទំហំ ៣,២៥ម៉ែត្រ មាន ២គន្លងទៅ និង ២គន្លងមក។ គន្លងផ្លូវសម្រាប់ទោចក្រយានយន្ត មានទំហំ ២,៥០ម៉ែត្រ មាន ១គន្លងទៅ និង ១គន្លងមក។ គន្លងចិញ្ចើមផ្លូវសម្រាប់អ្នកថ្មើរជើង មានទំហំ ១,២៥ម៉ែត្រ សងខាង។ ល្បឿនសុវត្ថិភាព ៤០គីឡូម៉ែត្រក្នុងមួយម៉ោង។ ជម្រាលទទឹងស្ពាន ២ភាគរយ។ សសរសម្រាប់ព្យួរខ្សែកាប មានកម្ពស់ ៦០ម៉ែត្រ គិតចាប់ពីផ្ទៃតួស្ពានទៅលើអាកាស។ សសរស្ពានសម្រាប់ព្យួរខ្សែកាបសរុបចំនួន ២ ក្នុងនោះសសរស្ពាននីមួយៗប្រើប្រាស់គ្រិះខួងចំនួន ១៨ដើម អង្កត់ផ្ចិតទំហំ ២ម៉ែត្រ។ ប្រវែងគ្រឹះខួង មានអង្កត់ផ្ចិតទំហំ ២ម៉ែត្រ សសរស្ពានទី១ មានជម្រៅ ៥៩,៤០ម៉ែត្រ និងសសរស្ពានទី២ មានជម្រៅ ៧៣,៤០ម៉ែត្រ។
ផ្នែកខាងកោះពេជ្រ មានសសរស្ពាន ៣៖ សសរក្បាលស្ពានទី១ មានគ្រឹះខួង អង្កត់ផ្ចិត ១,២០ម៉ែត្រ គុណនឹង ៨ដើម ប្រវែង ៣០,៩០ម៉ែត្រ។ សសរក្បាលស្ពានទី២ មានគ្រឹះខួង អង្កត់ផ្ចិត ១,២០ម៉ែត្រ គុណនឹង ៨ដើម ប្រវែង ៣១,៤០ម៉ែត្រ។ សសរក្បាលស្ពានទី៣ មានគ្រឹះខួង អង្កត់ផ្ចិត ១,៥០ម៉ែត្រ គុណនឹង ១០ដើម ប្រវែង ៤៣,៥០ម៉ែត្រ។
ផ្នែកខាងគម្រោងកោះនរា មានសសរស្ពាន ៣៖ សសរក្បាលស្ពានទី១ មានគ្រឹះខួង អង្កត់ផ្ចិត ១,២០ម៉ែត្រ គុណនឹង ៨ដើម ប្រវែង ៤១,១០ម៉ែត្រ។ សសរក្បាលស្ពានទី២ មានគ្រឹះខួង អង្កត់ផ្ចិត ១,២០ម៉ែត្រ គុណនឹង ៨ដើម ប្រវែង ៤៧,០០ម៉ែត្រ។ សសរក្បាលស្ពានទី៣ មានគ្រឹះខួង អង្កត់ផ្ចិត ១,៥០ម៉ែត្រ គុណនឹង ១០ដើម ប្រវែង ៤៧,២០ម៉ែត្រ។
ជើងតាងស្ពាន មានទំហំអតិបរិមា ២៤,៣ គុណនឹង ១៧,៧ម៉ែត្រ កម្រាស់ ៤,៥០ម៉ែត្រ។ កម្ពស់អតិបរិមានាវាឆ្លងកាត់ក្រោមស្ពាន មានកម្ពស់ ៨ម៉ែត្រ (កម្រិតទឹកនៅរដូវវស្សាខ្ពស់បំផុត)។ កម្ពស់អតិបរិមានាវាឆ្លងកាត់ក្រោមស្ពាន មានកម្ពស់ ១៨ម៉ែត្រ (កម្រិតទឹកនៅរដូវប្រាំងទាបបំផុត)។ គម្លាតពីសសរស្ពានខ្សែកាប មានប្រវែង ១៨០ម៉ែត្រ។ សសរស្ពានខ្សែកាបនីមួយៗ មានខ្សែកាបចំនួនមួយជួរ ១៦ដើមសងខាង ដោយក្នុង១ដើម មានភ្ជាប់ខ្សែកាបតូចៗ ពី ២៧ ទៅ ៣១ដើម ដែលមានអង្កត់ផ្ចិត ១៥,២មិលី្លម៉ែត្រ។ សសរស្ពានខ្សែកាបទាំង ២ដើម មានឆ្លាក់ចម្លាក់ក្បាច់ខ្មែរជាពិសេស។ មានបំពាក់បង្គោលភ្លើងបំភ្លឺផ្លូវ។ រៀបចំបណ្តាយលូអមសងខាងផ្លូវក្បាលស្ពាន។ ដាក់ស្លាកសញ្ញាចរាចរ និងលាបគំនូសចរាចរ។
សូមជម្រាបថា ក្រៅពីកសាងស្ពានភ្ជាប់ពីកោះពេជ្រទៅកោះនរា ក្រុមហ៊ុន OCIC ក៏បានបង្ហាញគម្រោង ស្ពានបេតុងភ្ជាប់ពីគម្រោងកោះនរា ទៅកាន់ផ្លូវជាតិលេខ១ផងដែរ ដែលគម្រោងនេះ រួមមាន៖ ទីតាំងស្ពានស្ថិតនៅសង្កាត់និរោធ ខណ្ឌច្បារអំពៅ រាជធានីភ្នំពេញ ថវិកាសាងសង់ចំនួន១.៦០៦.៣៥៣ដុល្លាអាមេរិក ក្រុមហ៊ុនសាងសង់ ក្រុមហ៊ុនវិនិយោគទុនអណិកជនកម្ពុជា (OCIC) បណ្តោយស្ពាន៖ ៦០ម៉ែត្រ ទទឹងស្ពាន ២១ម៉ែត្រ បណ្តោយស្ពានបេតុង ៤៥ម៉ែត្រ
ផ្លូវគល់ស្ពានសងខាង ១៥ម៉ែត្រ (បេតុងអារមេ) រយៈពេលសាងសង់ ១២ខែ៕
ដោយ : បញ្ញាស័ក្តិ