ភ្នំពេញ៖ កាលពីពេលថ្មីៗនេះ ពេទ្យឆ្មេញឈ្មោះ មេត្រី បានធ្វើឲ្យអ្នកប្រើប្រាស់បណ្តាញសង្គម ផ្ទុះការភ្ញាក់ផ្អើលជាខ្លាំង ក្រោយបានពិធីទទួលអន្ទិត កក្កដា សុភ័ណ្ឌ ជាទូតសុឆន្ទៈប្រចាំគ្លីនីកខ្លួន ប៉ុន្តែ អ្វីដែលគួរឲ្យចាប់អារម្មណ៍ខ្លាំងទៀតនោះ គឺប្រើសុទ្ធតែសឺមីរូបព្រះសង្ហារ ឬ សញ្ញាជាតិ ធ្វើការផ្លាស់ប្តូរប្រគល់ឲ្យគ្នាទៅវិញទៅមក។
ជាក់ស្តែង ការបង្ហាញបែបនេះ ឃើញថាមហាជនបានធ្វើការរិះគន់ខ្លាំងៗតែម្តង ព្រោះតែមិននឹកស្មានថា បុគ្គលរូបនេះហ៊ានយកកព្រះសង្ហារ ឬសញ្ញាជាតិ ជាត្រាប្រពៃណី និងផ្លូវការសម្រាប់ព្រះចៅក្រុងកម្ពុជាធិបតី គឺព្រះមហាក្សត្រនៃព្រះរាជាណាចក្រកម្ពុជា មកប្រើប្រាស់ទាំងមិនដឹងពីអត្ថន័យ។
ក្រោយរងព្យុះរិះគន់យ៉ាងចាស់ៗដៃរួចមក នៅទីបំផុត សាម៉ីខ្លួនទាំងពីរក៏បានចេញមុខសុំទោស ក្នុងនោះជាពិសេសពេទ្យឆ្មេញ មេត្រី ជាម្ចាស់គ្លីនិក បានបង្ហោះសារសុំទោស និងលើកហេតុផលយ៉ាងដូច្នេះថា៖ «ខ្ញុំមិនបានប្រមាថទេ ខ្ញុំយកមកធ្វើជា វត្ថុមានតំលៃលើកមកបង្ហាញកិត្តិយស សម្រាប់គ្លីនិកធ្មេញ មេត្រី ! ខ្ញុំបាទជាមនុស្សម្នាក់គោររពប្រទេសជាតិ ស្រឡាញ់ គោរពព្រះមហាក្សត្រណាស់ ហើយធ្លាប់បានធ្វើអំពើល្អ ជួយអ្នកក្រច្រើនណាស់ ដូចបងប្អូនបានឃើញ! ខ្ញុំជួយអ្នកក្រមិនក្រោម ១០០ដងទេ! អធ្យាស្រ័យផង បើគិតថាខ្ញុំខ្មែរដូចគ្នាទេ! រាល់ថ្ងៃ គ្រប់គ្រងគ្លីនិកផង ឆ្លៀតពេលដើរជួយអ្នកក្រ ស៊ីនទ្រី យាយតាចាស់ជរា រាល់យប់ផង មិនសូវបានសំរាកទេ! រឿងពិតរបស់ខ្ញុំ។
ជាចុងក្រោយ ខ្ញុំបាទដុកទ័រ មេត្រី សូមសន្យាថា មុននឹងរៀបចំកម្មវិធីអ្វី ខ្ញុំបាទនឹងបានគិតហើយ ស្វែងយល់អោយច្បាស់ជាងនេះទៀត! ហើយដាច់ខាតគឺមិនយកសឺមីមានរូបព្រះសង្ហាមកប្រើទៀតទេ»។
ដោយឡែក អន្ទិត កក្កដា សុភ័ណ្ឌ វិញ ក៏បានលើកឡើងបែបនេះថា៖ «ខ្ញុំសូមទោសចំពោះការប្រើក្របព្រះសង្ហារ ក្នុងពិធីចុះហត្ថលេខាជាទូតសុច្ឆន្ទៈជាមួយគ្លីនីកមេត្រី ជាដំបូង ខ្ញុំពិតជាសោកស្តាយណាស់ ហើយខ្ញុំក៏សូមទោសជាខ្លាំងទៅកាន់បងប្អូនទាំងអស់គ្នា ចំពោះរឿងដែលបានកើតឡើងកន្លងទៅ ពាក់ព័ន្ធនឹងការប្រើប្រាស់ក្របមានរូបព្រះសង្ហារ។
ខ្ញុំពិតជាពុំបានដឹងកិច្ចការនៃការរៀបចំនេះទេ ព្រោះថាខាងពិធីការរបស់ក្រុមហ៊ុនជាអ្នករៀបចំ ហើយក្នុងនាមខ្ញុំទៅចុះហត្ថលេខានោះគឺទៅក្នុងនាម ជាទូតសុច្ឆន្ទៈរបស់គ្លីនិកនោះតែប៉ុណ្ណោះ។
ជាមួយនិងកំហុសមួយនេះ សូមបងប្អូនទាំងអស់មេត្តាអភ័យទោសដល់រូបខ្ញុំ ក៏ដូចជាខាងគ្លីនិកផង។
ខ្ញុំ និងគ្លីនីច ក៏សូមសន្យាថា នឹងខំប្រឹងធ្វើការស្វែងយល់ សិក្សាឲ្យបានច្បាស់ ដើម្បីឲ្យបានត្រឹមត្រូវ មុននិងរៀបចំកម្មវិធីណាមួយ។»។
តែយ៉ាងណា បន្ថែមពីនេះ អន្ទិត កក្កដា សុភ័ណ្ឌ ក៏រងការរិះគន់ទៀតថា បានបង្ហាញឥរិយាបទដ៏មិនសមរម្យទាល់តែសោះ នៅក្នុងពិធីមួយនេះ ព្រោះថាមិនគួរណាស្លៀកខោស្ទីបនារី គ្របអាវក្វាហ្សេបែបនេះ ហាក់ដូចខ្លួនអស្ចារ្យពេកហើយ៕ ដោយ៖ លឹម ហុង
