ភ្នំពេញ ៖ នៅរសៀលថ្ងៃទី២៧ ខែតុលា ឆ្នាំ២០២០នេះ ឯកឧត្តម នាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ និងឯកឧត្តម Patrick Murphy ឯកអគ្គរដ្ឋសហរដ្ឋអាមេរិកប្រចាំកម្ពុជា បានអញ្ជើញជួបសំណេះសំណាលជាមួយក្រុមការងារសម្របសម្រួលកិច្ចប្រតិបត្តិការ (TASK FORCE) នៅអគ្គស្នងការដ្ឋាននគរបាលជាតិ។
ឯកឧត្តម នាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ បានសម្តែងនូវការស្វាគមន៍ចំពោះ ឯកឧត្តម Patrick Murphy ឯកអគ្គរដ្ឋសហរដ្ឋអាមេរិកប្រចាំកម្ពុជា និងប្រតិភូអមដំណើរ ដែលវត្តមាននៅពេលនេះចាត់ទុកថា ជាការលើកទឹកចិត្តដល់មន្ត្រីអនុវត្តច្បាប់របស់កម្ពុជា។ ឯកឧត្តមអគ្គស្នងការនគរបាលជាតិ បានបញ្ជាក់ជូន ឯកឧត្តឯកអគ្គរដ្ឋសហរដ្ឋអាមេរិកប្រចាំកម្ពុជា ថា ក្រុមការងារសម្របសម្រួលកិច្ចប្រតិបត្តិការ (TASK FORCE)នេះ ជាកម្លាំងចលករយ៉ាងសំខាន់ក្នុងការការពារសន្តិសុខជូនប្រជាពលរដ្ឋ នៃប្រទេសទាំង២។ ហើយបន្ទាប់ពីបានចុះ MOU ជាមួយស្ថាប័នអនុវត្តច្បាប់ FBI កាលពីឆ្នាំមុនរួចមក ក្រុមការងារ TASK FORCE បានបំពេញការងារយ៉ាងពេញលេញ ដោយបានប្រតិបត្តិការប្រមាណ ២០ករណីផងដែរ។
ឯកឧត្តម នាយឧត្តមសេនីយ៍ សន្តិបណ្ឌិត នេត សាវឿន ក៏បានថ្លែងការកោតសរសើរចំពោះនគរបាលជាតិកម្ពុជា និងទីភ្នាក់ងារស៊ើបអង្កេតសហព័ន្ធ (FBI) កន្លងមកបានសហការគ្នាយ៉ាងល្អក្នុងការស្រាវជ្រាវបង្ក្រាបបទល្មើសឧក្រិដ្ឋកម្មឆ្លងដែន ជាពិសេសការទប់ស្កាត់បទល្មើសអានាចារ្យរំលោភផ្លូវភេទលើកុមារ។ ឯកឧត្តម បញ្ជាក់ថា ដើម្បីឲ្យកិច្ចការនេះទទួលបានលទ្ធផលល្អប្រសើរថែមទៀត សហរដ្ឋអាមេរិក នឹងបន្តជួយទាំងធនធាន និងស្មារតីដល់ក្រុមការងារនេះ ព្រមទាំងត្រៀមបង្កើតភ្នាក់ងារប្រឆាំងគ្រឿងញៀន DAE ប្រចាំនៅស្ថានទូតផងដែរនៅឆ្នាំក្រោយ ដើម្បីអាចសហការជាមួយអគ្គស្នងការដ្ឋាននគរបាលជាតិ ទប់ស្កាត់នូវបទល្មើសគ្រឿងញៀន និងបទល្មើសឧក្រិដ្ឋកម្មឆ្លងដែននានា។
ឯកឧត្តមអគ្គស្នងការនគរបាលជាតិ បានគូសបញ្ជាក់ថា បន្ទាប់ពីបើកឲ្យដំណើរការក្រុមការងារសម្របសម្រួលកិច្ចប្រតិបត្តិការ (TASK FORCE) យើងសង្ឃឹមថា កិច្ចសហប្រតិបត្តិការរវាងស្ថាប័នអនុវត្តច្បាប់ទាំង២ នឹងរឹតតែប្រសើរថែមទៀត ជាពិសេសបង្ការទប់ស្កាត់បាននូវរាល់បទល្មើសឧក្រិដ្ឋកម្មឆ្លងដែនគ្រប់ប្រភេទ។ ហើយសូមចាត់ទុកការបង្កើតក្រុមការងារនេះ គឺជាគំរូល្អមួយសម្រាប់ស្ថាប័នអនុវត្តច្បាប់សម្រាប់ប្រទេសដទៃ នៅកម្ពុជាផងដែរ។
ក្នុងឱកាសនោះដែរ ឯកឧត្តម Patrick Murphy ឯកអគ្គរដ្ឋសហរដ្ឋអាមេរិកប្រចាំកម្ពុជា បានវាយតម្លៃខ្ពស់ចំពោះកិច្ចសហប្រតិបត្តិការល្អរវាងស្ថាប័នអនុវត្តច្បាប់ទាំង២ ដែលបានរួមសហការគ្នាបង្ការទប់ស្កាត់នូវរាល់បទល្មើសឧក្រិដ្ឋកម្មឆ្លងដែនគ្រប់ប្រភេទ នាពេលកន្លងមក។ ឯកឧត្តម ក៏បានបង្ហាញអំពីជំហរក្នុងការបន្តពង្រឹងកិច្ចសហប្រតិបត្តិការល្អបន្ថែមទៀត ជាមួយនគរបាលជាតិកម្ពុជាផងដែរ។
ចុងក្រោយ ឯកឧត្តម នាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ និងឯកឧត្តម Patrick Murphy ឯកអគ្គរដ្ឋសហរដ្ឋអាមេរិកប្រចាំកម្ពុជា បានផ្តាំផ្ញើឲ្យក្រុមការងារសម្របសម្រួលកិច្ចប្រតិបត្តិការ (TASK FORCE) បន្តខិតខំបំពេញភារកិច្ចដោយការទទួលខុសត្រូវខ្ពស់ ដើម្បីរួមគ្នាបង្ការទប់ស្កាត់បទល្មើសឧក្រិដ្ឋកម្មឆ្លងដែន ជាពិសេសទប់ស្កាត់បទល្មើសអានាចារ្យរំលោភផ្លូវភេទលើកុមារ។
សូមបញ្ជាក់ថា ក្រុមការងារ «Task Force» ត្រូវបានបង្កើតឡើងក្រោមអនុស្សារណៈ នៃការយោគយល់គ្នារវាងកម្ពុជា-អាមេរិក ស្តីពី កិច្ចសហប្រតិបត្តិការក្នុងការពង្រឹងប្រតិបត្តិការប្រឆាំងនឹងឧក្រិដ្ឋកម្មឆ្លងដែន កាលពីថ្ងៃទី០៥ ខែមេសា ឆ្នាំ២០១៩ អំឡុងពេល ឯកឧត្តម នាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការដ្ឋាននគរបាលជាតិ ដឹកនាំគណៈប្រតិភូទៅបំពេញទស្សនកិច្ចនៅសហរដ្ឋអាមេរិក។ MOU នេះត្រូវបានចុះហត្ថលេខាដោយ លោក Christopher Wray នាយកការិយាល័យ FBI ឯកឧត្តម នាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិកម្ពុជា និងឯកឧត្តម នាយឧត្តមសេនីយ៍ គៀត ច័ន្ទថារិទ្ធ អគ្គនាយកអន្តោប្រវេសន៍ នៃក្រសួងមហាផ្ទៃ នៅរដ្ឋធានី វ៉ាស៊ីនតោន តាមការផ្តួចផ្តើមរបស់សហរដ្ឋអាមេរិក។ Task Force នេះ មានសមាសភាពតំណាងមកពី FBI តំណាងអគ្គស្នងការដ្ឋាននគរបាលជាតិ និងតំណាងអគ្គនាយកដ្ឋានអន្តោប្រវេសន៍ផងដែរ ដែលមានគោលដៅប្រយុទ្ធប្រឆាំងបទល្មើសឧក្រិដ្ឋឆ្លងដែន៕ ដោយ៖បញ្ញាស័ក្តិ
