ភ្នំពេញ៖ បុរសម្នាក់សង្ស័យថាផឹកស្រាស្រវឹងជោកជាំ បើករថយន្តមួយគ្រឿងបោះពួយយ៉ាងលឿនមិនប្រយ័ត្ន ជ្រុលទៅបុករបាំងទ្រូងផ្លូវបាក់១កង់ រថយន្តបង្កមិនទាន់អស់ល្បឿនរេចង្កូតទៅបុកបង្គោលភ្លើង រថយន្តការខូចខាតតែសំណាងល្អមិនបង្កឲ្យមនុស្សរងរបួស។
ហេតុការណ៍គ្រោះថ្នាក់ចរាចរណ៍នេះ កើតឡើងនៅវេលាម៉ោង១១និង២០នាទីយប់ ថ្ងៃអង្គារទី២៧ ខែតុលា ឆ្នាំ២០២០ ស្ថិតតាមបណ្ដោយផ្លូវ២៨៩ កែងនឹងផ្លូវ៥៦៦ ក្នុងសង្កាត់បឹងកក់២ ខណ្ឌទួលគោក។
ម្ចាស់រថយន្តបង្កក្រោយកើតហេតុបានរត់ឡើងរថយន្តមួយគ្រឿងទៀតគេចខ្លួនបាត់។
យោងតាមសាក្សីនៅកន្លែងកើតហេតុ បានឲ្យដឹងថា មុនពេលកើតហេតុគេឃើញបុរសម្នាក់ស្រវឹងស្រាជោកបើក រថយន្តលុចស៊ីសRX300 ពណ៌សពាក់ផ្លាកលេខភ្នំពេញ 2AF 9945 ធ្វើដំណើរក្នុងទិសដៅពីលិចទៅកើតបោះពួយក្នុងល្បឿនលឿន ខណៈមកដល់ចំណុចកើតហេតុខាងលើ បានជ្រុលទៅបុករបាំងទ្រូងថ្មចែកផ្លូវពេញទំហឹង បណ្ដាលឲ្យបាក់១កង់ រថយន្តមិនទាន់អស់ល្បឿន បានរេចង្កូតមកខាងឆ្វេង ជ្រុលទៅបង្គោលភ្លើងបំភ្លឺផ្លូវរងការខូចខាត រថយន្តដាច់កង់មុខខាងឆ្វេងទៅលែងរួច។
ក្រោយកើតហេតុ សមត្ថកិច្ចមូលដ្ឋានបានចុះមកចំណុចកើតហេតុ បានទាក់ទងទៅសមត្ថកិច្ចចរាចរណ៍ មកវាស់វែងយករថយន្តបង្កទៅរក្សាទុករង់ចាំឲ្យម្ចាស់ចូលខ្លួន មកដោះស្រាយតាមផ្លូវច្បាប់ នៅការិយាល័យចរាចរណ៍ជើងគោក៕ ដោយ៖ផាន់ណា មីដា
