ភ្នំពេញ៖លោកឃួង ស្រេង អភិបាលរាជធានីភ្នំពេញ និងលោកស្រី កាលព្រឹកថ្ងៃទី ២៨ខែតុលានេះ គឺក្រោយពីអមដំណើរថ្នាក់ដឹកនាំកាកបាទក្រហមកម្ពុជា ចែកអំណោយជូនប្រជាពលរដ្ឋរងគ្រោះដោយជំនន់ទឹកភ្លៀងចំនួន១០៤០គ្រួសារនៅខណ្ឌព្រែកព្នៅ និងខណ្ឌសែនសុខ រួចមក លោកនិងលោកស្រីបានបន្តដំណើរ ដោយនាំយកអំណោយរបស់សម្ដេចតេជោហ៊ុន សែននិងសម្ដេចកិត្តិព្រឹទ្ធបណ្ឌិតប៊ុនរ៉ានីហ៊ុនសែន ប្រធានកាកបាទក្រហមកម្ពុជាចំនួន៨០០០ដុលា្លរប្រគល់ជូនដល់ជនរងគ្រោះដែលបានទទួលរងដោយភ្លើងឆេះផ្ទះអស់១ខ្នងនិង៣លានរៀលក្នុងអំឡុងពេល ដែលទឹកកំពុងជន់លិចភូមិនារយៈពេល១០ថ្ងៃកន្លងមកនេះ ដើម្បីសាងសង់ផ្ទះឡើងវិញ។
អំណោយសម្ដេចតេជោហ៊ុន សែន និងសម្ដេចកិតិព្រឹទ្ធបណ្ឌិតប្រគល់ជូនជនរងគ្រោះដោយអគ្គីភ័យតាមរយៈលោកឃួង ស្រេងនិងលោកស្រីនេះមានចំនួន៨ពាន់ដុល្លារសហរដ្ឋអាមេរិក ដើម្បីជួយរំលែកដល់ការលំបាកខ្វះខាតដោយហេតុថា ពួកគាត់ជាប្រជាពលរដ្ឋក្រីក្រ ហើយជាប់ទាំងបំណុលធនាគារថែមទៀត និងម្យ៉ាងទៀតដើម្បីឱ្យពួកគាត់មានលទ្ធភាពអាចសាងសង់ផ្ទះបានស្នាក់នៅឡើងវិញ។
ប្រជាពលរដ្ឋដែលត្រូវភ្លើងឆេះលំនៅដ្ឋានខាងលើនេះមាន ឈ្មោះព្រិល ស៊ីដេត អាយុ ៣៧ឆ្នាំត្រូវជាប្ដីនិងប្រពន្ធឈ្មោះ ផា សោភា អាយុ ៣៤ឆ្នាំពួកគាត់មានមុខរបរជាអ្នកលក់នំប៉័ងប៉ាតេ ស្នាក់នៅភូមិវាលថ្លាន់សង្កាត់គងនយ ខណ្ឌដង្កោ ។ បន្ថែមពីលើនេះទៀត លោកឃួង ស្រេងនិងលោកស្រី នូវបានប្រគល់នូវថវិការបស់សម្ដេចតេជោនិងសម្ដេចកិតិព្រឹទ្ធបណ្ឌិតនូវទឹកប្រាក់ចំនួន ៣លានរៀលថែមទៀត សម្រាប់ប្រជាពលរដ្ឋរងគ្រោះមួយរូបទៀត ឈ្មោះព្រិល សីហា ភេទប្រុសអាយុ២៨ឆ្នាំដែលត្រូវភ្លើងឆេះចិញ្ជាំងផ្ទះ ក្នុងហេតុការណ៍នេះផងដែរ៕ ដោយ៖បញ្ញាស័ក្តិ
