ភ្នំពេញ៖ តុលាការដោះលែង អតីតឧកញ៉ា ហូ ចំរើន ឲ្យមានសេរីភាពឡើងវិញហើយ កាលពីព្រលប់ថ្ងៃទី២៨ ខែតុលា ឆ្នាំ២០២០បន្ទាប់ពី តុលាការប្រកាសផ្តន្ទាទោសដាក់ពន្ធនាគារ ២ឆ្នាំ៦ខែ ។
អតីតឧកញ៉ា ហូ ចំរើន ត្រូវ តុលាការ ចោទប្រកាន់ពីបទល្មើសឆបោកប្រាក់ក្រុមហ៊ុនចិន រាប់លានដុល្លារអាមេរិក ហើយត្រូវតុលាការប្រកាសផ្តន្ទាទោសដាក់ពន្ធនាគារ ២ឆ្នាំ៦ខែ និងសងលុយទៅដើមបណ្តឹងជិត ១០០លានដុល្លារ។
លោកហូ ចំរើន អាយុ៣៨ឆ្នាំ ជាមន្ត្រីយោធាក្រសួងការពារជាតិថ្នាក់ឧត្តមសេនីយ៍ឯក ត្រូវបានព្រះមហាក្សត្រតែងតាំងជាឧកញ៉ា នៅថ្ងៃទី១២ ខែមេសា ឆ្នាំ២០១៨ និងមានមុខងារជាទីប្រឹក្សាថ្នាក់ដឹកនាំកំពូល។
ប៉ុន្តែក្រោយពេល ជាប់ឃុំនៅពន្ធនាគារព្រះមហាក្សត្របានចេញព្រះរាជក្រឹត្យ បញ្ចប់មុខតំណែងទាំងអស់រាប់ទាំងមុខងារជាឧកញ៉ាផងដែរ។
គួររំលឹកថា អ្នកវិនិយោគជនជាតិចិនចំនួន២នាក់ និង ជនជាតិ កូរ៉េម្នាក់ បានដាក់ពាក្យបណ្តឹងដាច់ដោយឡែកៗពីគ្នា ទៅ តុលាការ ដែលមានកម្មវត្ថុប្តឹងអតីត ឧកញ៉ា ហូ ចំរើន ពីបទ ស៊ីដាច់លុយ ជាង២០០ លានដុល្លារ អាមេរិក តាមរូបភាពអភិវឌ្ឍន៍មន្ទីរពេទ្យទំនើប នៅ ទីក្រុង តាខ្មៅ និង គម្រោងអភិវឌ្ឍន៍ មួយចំនួនទៀត៕ ដោយ៖បញ្ញាស័ក្តិ
