ខេត្តព្រះសីហនុ ៖ នារសៀលថ្ងៃទី ២៩ ខែតុលា ឆ្នាំ២០២០នេះ ក្រោយពីឃើញការបន្តបង្ហោះ និងផ្សាយចែកចាយនូវព័ត៌មានជនជាតិចិន វាយកាប់គ្នារវាងជនជាតិចិនដូចគ្នា ស្ថិតក្នុងសង្កាត់លេខ៤ ម្តុំតោពីរ ឥតឈប់ឈរ ភ្លាមៗនោះ លោកឧត្តមសេនីយ៍ទោ ជួន ណារិន្ទ ស្នងការនគរបាលខេត្តព្រះសីហនុ បានធ្វើការទទូចស្នើសុំដល់បងប្អូនប្រជាពលរដ្ឋទាំងអស់ទាំងក្នុង និងក្រៅបណ្តាញសង្គម ប្រព័ន្ធផ្សព្វផ្សាយផ្សេងៗ ជាពិសេសប្រជាពលរដ្ឋក្នុងខេត្តព្រះសីហនុ សូមកុំមានការភ្ញាក់ផ្អើលលើករណីខាងលើ ដោយហេតុថា ករណីនេះបានកើតឡើងនៅវេលាម៉ោង ១១និង៣០នាទីយប់ថ្ងៃទី២៧ ខែតុលា ឆ្នាំ២០២០។
លោកឧត្តមសេនីយ៍ស្នងការ បានបញ្ជាក់បន្ថែមទៀតថា គណៈបញ្ជារការឯកភាពខេត្តព្រះសីហនុ បានដឹកនាំកងកម្លាំងសមត្ថកិច្ចនគរបាលខេត្ត សហការជាមួយកងរាជអាវុធហត្ថខេត្ត ចុះបង្ក្រាបភ្លាមនិងឃាត់ខ្លួនបានចំនួន៣នាក់ ខណៈនោះដែរ ខាងកម្លាំងកងរាជអាវុធហត្ថខេត្ត បានធ្វើការតាមនីតិវិធីច្បាប់រួចរាល់ តាំងពីយប់ថ្ងៃទី២៧នោះមកម្លេះ៕ដោយ៖បញ្ញាស័ក្តិ