ភ្នំពេញ ៖ រដ្ឋបាលរាជធានីភ្នំពេញ បាននិងកំពុងផ្តល់ជូននូវអំណោយជូនប្រជាពលរដ្ឋចំនួន៥៩៣គ្រួសារ នៅខណ្ឌមានជ័យ ដែលទទួលរងគ្រោះដោយដោយទឹកជំនន់នេះ គឺពិតជាបានបង្ហាញឱ្យឃើញកាន់តែច្បាស់អំពីការយកចិត្តទុកដាក់ សម្រាលការលំបាក វប្បធម៌នៃការចែករំលែក និងជាការចូលរួមគាំពារដោះស្រាយដោយផ្ទាល់ ជួយដល់ប្រជាពលរដ្ឋក្រីក្រ រងគ្រោះដោយសារជំនន់ទឹកភ្លៀង ស្របតាមអនុសាសន៍ដឹកនាំដ៏ខ្ពង់ខ្ពស់បំផុតរបស់ សម្តេចតេជោនាយករដ្ឋមន្ត្រី ពោល គឺ “មិនត្រូវទុកឱ្យប្រជាពលរដ្ឋណាម្នាក់ស្លាប់ដោយអត់បាយឡើយ” ។
រដ្ឋបាលរាជធានីភ្នំពេញបានបន្តនាំយកអំណោយរបស់សម្តេចតេជោហ៊ុន សែន និងសម្តេចកិតិ្តព្រឹទ្ធបណ្ឌិតប៊ុន រ៉ានី ហ៊ុន សែន ចែកជូនដល់បងប្អូនប្រជាពលរដ្ឋដែលរងគ្រោះដោយទឹកជំនន់ចំនួន៥៩៣គ្រួសារ ស្ថិតនៅក្នុងខណ្ឌមានជ័យ រាជធានីភ្នំពេញនារសៀលថ្ងៃទី២៩ ខែតុលា ឆ្នាំ២០២០ ។
នៅក្នុងឱកាសនោះអភិបាលរាជធានីភ្នំពេញ បានប្រកាសឲ្យបងប្អូនប្រជាពលរដ្ឋទាំងអស់ ដែលជួបការលំបាកក្នុងជីវភាពគ្រួសារ ក៏ដូចជាប្រជាពលរដ្ឋដែលរងគ្រោះដោយជំនន់ទឹកភ្លៀង នាពេលប៉ុន្មានថ្ងៃកន្លងមកនេះ ហើយមិនទាន់បានទទួលអំណោយពីអាជ្ញាធររាជធានីភ្នំពេញ ឬបងប្អូនប្រជាពលរដ្ឋដែលខ្វះស្បៀងអាហារ អាចមកធ្វើទំនាក់ទំនងមកសង្កាត់ និងខណ្ឌ ឬស្នាក់ការគណបក្សប្រជាជនកម្ពុជានានា នៅទូទាំងរាជធានីដើម្បីឲ្យអាជ្ញាធរបានជួយជាស្បៀងអាហារទាន់ពេល។
លោក ឃួង ស្រេង បានលើកឡើងថា អំណោយដែលប្រគល់ជូនប្រជាពលរដ្ឋទាំង៥៩៣គ្រួសារនេះ គឺពិតជាបានបង្ហាញឲ្យឃើញកាន់តែច្បាស់អំពីការយកចិត្តទុកដាក់ក្នុងការសម្រាលការលំបាក វប្បធម៌នៃការចែករំលែក ជាការចូលរួមគាំពារដោះស្រាយដោយផ្ទាល់ជួយដល់ប្រជាពលរដ្ឋក្រីក្ររងគ្រោះដោយសារជំនន់ទឹកភ្លៀង តាមអនុសាសន៍ដ៏ខ្ពង់ខ្ពស់បំផុតរបស់សម្ដេចនាយករដ្ឋមន្ត្រី គឺមិនត្រូវទុកឲ្យប្រជាពលរដ្ឋណាម្នាក់ស្លាប់ដោយការអត់បានឡើយ។
ឆ្លៀតក្នុងឱកាសនេះ លោកអភិបាលរាជធានីភ្នំពេញ បាននាំនូវការផ្តាំផ្ញើសាកសួរសុខទុក្ខ និងសេចក្តីនឹករលឹកពីសំណាក់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និង សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ជូនចំពោះប្រជាពលរដ្ឋក្នុងមូលដ្ឋានខណ្ឌមានជ័យ ជាពិសេសបងប្អូនប្រជាពលរដ្ឋក្រីក្ររងគ្រោះទាំងអស់ ដែលជានិច្ចកាល សម្តេចទាំងទ្វេ តែងតែគិតគូរអំពីសុខទុក្ខ និងការលំបាករបស់បងប្អូនប្រជាពលរដ្ឋ ត្រប់ពេលវេលា គ្រប់ទីកន្លែង និង មិនប្រកាន់និន្នាការនយោបាយណាមួយឡើង ពោលគឺ “ទីណាមានទុក្ខលំបាក ទីនោះមានវត្តមាន សម្តេចតេជោ នាយករដ្ឋមន្ត្រី និង សម្តេចកិត្តិព្រឹទ្ធបណ្ឌិត” ។
លោកបានថ្លែងបន្តថា ដូចអ្វីដែលយើងទាំងអស់គ្នា បានជាប់រួចហើយថា ក្នុងរយៈពេល ១០ ខែ កន្លងទៅនេះ៖ ស្ថិតក្នុងដំណាក់កាល រីករាលដាលជាសកលនៃជំងឺកូវីដ-១៩ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានផ្តោតការយកចិត្តទុកដាក់ជាពិសេសចំពោះទុក្ខលំបាករបស់ប្រជាពលរដ្ឋ ដែលទទួលរងផលប៉ះពាល់ ដោយសារជំងឺកូវីដ-១៩ តាមរយៈការប្រកាសដាក់ឱ្យអនុវត្តជាផ្លូវការនូវកម្មវិធីឧបត្ថម្ភសាច់ប្រាក់ជូនគ្រួសារក្រីក្រ និងងាយរងគ្រោះ ក្នុងអំឡុងពេលប្រយុទ្ធនឹងជំងឺកូវីដ-១៩។ ចាប់តាំងពីថ្ងៃទី២៤ ខែមិថុនា ឆ្នាំ២០២០ និងបានប្រកាសបន្ត រយៈពេល ៣ ខែ បន្ថែមទៀត គឺរហូតដល់ថ្ងៃទី២៤ ខែធ្នូ បំណាច់ឆ្នាំ២០២០នេះ។
កម្មវិធីឧបត្ថម្ភសាច់ប្រាក់ របស់រាជរដ្ឋាភិបាល គឺជារបត់ថ្មីមួយ មិនធ្លាប់មានឡើយនៅក្នុងសង្គមកម្ពុជា និង ជា ផ្នែកមួយនៃគោលនយោបាយលើកកម្ពស់ជីវភាព ដើម្បីជួយសម្រាលការលំបាករបស់ប្រជាពលរដ្ឋក្រីក្រ និងងាយរងគ្រោះ ដែលបានរួមចំណែកជំរុញឱ្យមានការកែសម្រួលកាន់តែប្រសើរឡើង នូវការកំណត់អត្តសញ្ញាណគ្រួសារក្រីក្រពិតប្រាកដ ទៅក្នុងចំណាត់ថ្នាក់ ក្រ-១” និង ក្រ -២” ដូចអ្វីដែលសម្តេចតេជោនាយករដ្ឋមន្ត្រី ធ្លាប់បានលើកឡើងហើយថា “ដរាបណាប្រទេសជាតិយើងមានសន្តិភាព នោះបញ្ហារបស់បងប្អូនប្រជាពលរដ្ឋក្នុងសហគមន៍ក្រីក្រក៏ត្រូវបានគាំពារ លើកកម្ពស់ និងមិនត្រូវបានបំភ្លេចចោលឡើយ ទោះបីប្រទេសជាតិស្ថិតក្នុងកាលៈទេសៈណាក៏ដោយ” ។ ដោយឡែក ក្នុងអំឡុងខែតុលានេះ បន្ថែមលើវិបត្តិដែលបង្កឡើងដោយជំងឺកូវីដ-១៩ អាស្រ័យដោយកត្តាការប្រែប្រួលអាកាសធាតុ ដែលជាបញ្ហាប្រឈមជាសកល ប្រទេសកម្ពុជាយើង ក៏ដូចជាបណ្តាប្រទេសក្នុងតំបន់អាស៊ីអាគ្នេយ៍មួយចំនួនទៀត បានទទួលរងផលប៉ះពាល់ដោយសារប្រព័ន្ធសម្ពាធទាប និងវិសម្ពាធ ដែលបានអូសកាត់លើផ្ទៃប្រទេស បង្កឱ្យក្លាយទៅជាក្បួនបោកបក់ នាំយកមកជាមួយនូវទឹកភ្លៀងធ្លាក់ជោកជាំ បង្កើតបានជាជំនន់ទឹកភ្លៀងស្ទើរគ្រប់ទីកន្លែង ហើយបណ្តាខណ្ឌជាយរាជធានីភ្នំពេញ បានទទួលរងការគំរាមកំហែងដោយសារជំនន់ទឹកភ្លៀង។
ស្ថិតក្នុងស្ថានភាពមហន្តរាយ ក្រោមការចង្អុលបង្ហាញជាប់ជាប្រចាំពី សម្តេចតេជោនាយករដ្ឋមន្ត្រី កងកម្លាំងចម្រុះ និងអាជ្ញាធរមូលដ្ឋានគ្រប់លំដាប់ថ្នាក់ មានភាពម្ចាស់ការខ្ពស់ បានសហការរួមគ្នាផ្តល់ការសង្គ្រោះបានទាន់ពេលវេលា ដោយជម្លៀសបងប្អូនប្រជាពលរដ្ឋចេញពីតំបន់រងគ្រោះ ទៅកាន់ទីទួលសុវត្ថិភាព និងបានផ្គត់ផ្គង់ម្ហូបអាហារ ទឹកសុទ្ធ បង្គន់អនាម័យ និងទឹកស្អាត កន្លែងស្នាក់នៅបណ្តោះអាសន្នសមរម្យ។ ដោយឡែក ចំពោះប្រជាពលរដ្ឋក្រីក្រ និងងាយរងគ្រោះ រដ្ឋបាលរាជធានីភ្នំពេញ ក៏ដូចជាអាជ្ញាធរមូលដ្ឋានគ្រប់លំដាប់ថ្នាក់បានបង្កើនការយកចិត្តទុកដាក់ ផ្តល់នូវអំណោយមនុស្សធម៌របស់ សម្តេចតេជោនាយករដ្ឋមន្ត្រី និង សម្តេចកិត្តិព្រឹទ្ធបណ្ឌិត ជូនដល់ពួកគាត់ជាបន្តបន្ទាប់ផងដែរ។
ជាក់ស្ដែង ថ្ងៃនេះ បន្ថែមលើសកម្មភាពចុះជួបសំណេះសំណាលដោយផ្ទាល់ជាមួយបងប្អូនប្រជាពលរដ្ឋក្រីក្ររងគ្រោះ សម្តេចតេជោនាយករដ្ឋមន្ត្រី និង សម្តេចកិត្តិព្រឹទ្ធបណ្ឌិត បានបន្តផ្តល់អំណោយមនុស្សធម៌ ប្រគល់មករដ្ឋបាល រាជធានីភ្នំពេញ សម្រាប់ចែកជូនបងប្អូនប្រជាពលរដ្ឋក្រីក្ររងគ្រោះដោយសារជំនន់ទឹកភ្លៀង ស្ថិតនៅក្នុងខណ្ឌមានជ័យរាជធានីភ្នំពេញ ចំនួន ៥៩៣ គ្រួសារ បន្ថែមទៀត។ ថ្វីត្បិតតែអំណោយ ដែលត្រូវចែកជូន នាពេលនេះ មិនអាចសម្រាលទុក្ខវេទនារបស់បងប្អូនប្រជាពលរដ្ឋក្រីក្រ រងគ្រោះ ឱ្យរួចផុតពីទុក្ខលំបាកបានទាំងស្រុង ប៉ុន្តែអ្វីដែលរាជរដ្ឋាភិបាល និយាយជារួម និងនិយាយដោយឡែក រដ្ឋបាលរាជធានីភ្នំពេញ បាននិងកំពុងផ្តល់ជូននេះ គឺពិតជាបានបង្ហាញឱ្យឃើញកាន់តែច្បាស់អំពីការយកចិត្តទុកដាក់ សម្រាលការលំបាក វប្បធម៌នៃការចែករំលែក និងជាការចូលរួមគាំពារដោះស្រាយដោយផ្ទាល់ ជួយដល់ប្រជាពលរដ្ឋក្រីក្រ រងគ្រោះដោយសារជំនន់ទឹកភ្លៀង ស្របតាមអនុសាសន៍ដឹកនាំដ៏ខ្ពង់ខ្ពស់បំផុតរបស់ សម្តេចតេជោនាយករដ្ឋមន្ត្រី ពោល គឺ “មិនត្រូវទុកឱ្យប្រជាពលរដ្ឋណាម្នាក់ស្លាប់ដោយអត់បាយឡើយ” ។
លោកអភិបាលរាជធានីភ្នំពេញ សូមអំពាវនាវដល់ប្រជាពលរដ្ឋគ្រប់មជ្ឈដ្ឋាន ជាពិសេសបងប្អូនប្រជាពលរដ្ឋក្រីក្ររងគ្រោះទាំងអស់ សូមបន្ត និងបង្កើនការប្រុងប្រយ័ត្នចំពោះបញ្ហាសុខភាព ដោយត្រូវអនុវត្តនូវរាល់វិធានការទាំងឡាយ តាមការណែនាំរបស់ក្រសួងសុខាភិបាល ដើម្បីប្រឆាំងជំងឺកូវីដ-១៩ និងសូមផ្តល់ការថែទាំឱ្យបានដិតដល់ចំពោះកូនចៅ កុមារា-កុមារី និងមនុស្សចាស់ ចៀសវាងការកើតមានបញ្ហាសុខភាព ដូចជា ជំងឺរាករូស ជំងឺគ្រុនឈាម គ្រុនឈីក ឬ ជំងឺឆ្លងផ្សេងទៀត ដោយត្រូវប្រកាន់ខ្ជាប់នូវក្បួនអនាម័យស្អាត ៣ ប្រការ គឺ “ហូបស្អាត ផឹកស្អាត និងរស់នៅស្អាត” ។
លោក ពេជ្រ កែវមុនី អភិបាលខណ្ឌមានជ័យ បានបញ្ជាក់ថា នៅខណ្ឌមានជ័យ ប្រជាពលរដ្ឋដែលទទួលរងការលិចលង់ដោយជំនន់ទឹកភ្លៀងចំនួន១៦៨៩គ្រួសារ ស្មើនឹង៥សង្កាត់ ក្នុងនោះរួមមាន៖ សង្កាត់ចាក់អង្រែលើ សង្កាត់ចាក់អង្រែក្រោម សង្កាត់បឹងទំពុនទី១ សង្កាត់បឹងទំពុនទី២ និងសង្កាត់ស្ទឹងមានជ័យ។ មកដល់ពេលនេះ អាជ្ញាធរខណ្ឌ និងសប្បុរសជនបានចែកជូនបងប្អូន ប្រជាពលរដ្ឋដែលរងគ្រោះទាំងនេះបានចំនួន៩លើកហើយ ស្មើនឹង១០៩៦គ្រួសារ ហើយនេះជាលើកទី១០ ដែលលោក ឃួង ស្រេង និងលោកស្រី បានប្រគល់ជូននាពេលនេះ៕ដោយ៖បញ្ញាស័ក្តិ