ភ្នំពេញ៖ ឯកឧត្តម សាយ សំអាល់ រដ្ឋមន្ត្រីក្រសួងបរិស្ថាន បានអញ្ជើញក្នុងកិច្ចប្រជុំស្តីពី «ពិនិត្យលទ្ធភាពដាំដើមអាកាស្យា នៅក្នុងព្រៃរេចរឹលសហគមន៍តំបន់ការពារធម្មជាតិ» ព្រមទាំងវត្តមានតំណាង ក្រសួង ស្ថាប័នរាជរដ្ឋា ភិបាល អគ្គមេបញ្ជាការកងខេមរៈភូមិន្ទ វិស័យ ឯកជន គ្រឹះស្ថាន អប់រំសិក្សា អង្គការដៃគូ មន្ទីរបរិស្ថាន សហគមន៍តំបន់ការពារធម្មជាតិ ជាច្រើនរូបចូលរួមថ្ងៃទី២៨ ខែតុលា ឆ្នាំ២០២០ នៅទីស្តីការក្រសួងបរិស្ថាន។
មានប្រសាសន៍ក្នុងកិច្ចប្រជុំនោះឯកឧត្តម សាយ សំអាល់ រដ្ឋមន្ត្រីក្រសួងបរិស្ថានបានលើកឡើងថា៖ដើម្បីឲ្យមាន ប្រសិទ្ធភាពក្នុងការគ្រប់គ្រង ធនធានធម្មជាតិ ការអភិរក្សជីវៈចម្រុះ និងការលើកកម្ពស់ជីវភាពរស់នៅរបស់សហគមន៍មូលដ្ឋាន នៅមិនទាន់មានភាពល្អប្រសើរនៅឡើយ។ រាជរដ្ឋាភិបាលអាណត្តិទី៦ ក្រោមការដឹកនាំដ៏ឈ្លាសវៃ និងប្រកបដោយគតិបណ្ឌិតរបស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី ដែលមានក្រសួងបរិស្ថានជាសេនាធិការ បានកំណត់យកយន្តការជាអាទិភាព ដើម្បីការដោះស្រាយលើបញ្ហាប្រឈមនានាខាងលើ ដែលដំណោះស្រាយជាបន្ទាន់គឺការការពារធនធានធម្មជាតិ ការអភិរក្សជីវៈចម្រុះ និងការលើកកម្ពស់ជីវភាពរស់នៅរបស់សហគមន៍មូលដ្ឋាន ។
ឯកឧត្តមរដ្ឋមន្ត្រីក្រសួងបរិស្ថានបានបន្តទៀតថា៖ដើម្បីពង្រឹងប្រសិទ្ធិភាពការគ្រប់គ្រងសហគមន៍តំបន់ការពារ ធម្មជាតិ និងការលើកកម្ពស់ជីវភាពសហគមន៍ ហើយក្រសួងបរិស្ថានបានរៀបចំយុទ្ធសាស្ត្រពង្រីក និងពង្រឹងកិច្ចសហការជាមួយអង្គការដៃគូ និងវិស័យឯកជន ក្នុងការដាំប្រភេទឈើនៅក្នុងស្រុក ក្នុងផ្ទៃដីព្រៃរេចរឹលរបស់សហគមន៍តំបន់ការពារធម្មជាតិ ដើម្បីការពារការរុកទន្ទ្រានយកដីព្រៃធ្វើជាកម្មសិទ្ធិ និងបង្កើនប្រាក់ចំណូលរបស់ប្រជាសហគមន៍។ ក្នុងនោះក្រសួងបរិស្ថាន នឹងផ្តល់កូនពូជឈើ អាកាស្យាជូន ក្រសួងការពារជាតិ ក្រសួងមហាផ្ទៃ សហគមន៍តំបន់ការពារធម្នជាតិ ។
កិច្ចប្រជុំនេះក្នុងគោលបំណង ដើម្បី បង្កើនកិច្ចសហប្រតិបត្តិការរវាងអ្នកពាក់ព័ន្ធទាំងអស់នៅក្នុងច្រវ៉ាក់តម្លៃផលិតកម្មឈើដាំ និងពិភាក្សាអំពីយន្តការ សង្វាក់ផលិតកម្ម និងផល ប្រយោជន៍ នៃការដាំដើមអាកាស្យា ក្នុងការ ស្វែងយល់ពីទំហំ និងតម្រូវការទីផ្សារដើមអាកាស្យាហើយចែករំលែកមេរៀននិងបទពិសោធន៍នៃការផលិតកូនឈើ និងការដាំដើមឈើលូតលាស់លឿន ដើម្បីកំណត់អ្នកពាក់ព័ន្ធ និង ទិសដៅនៃការដាំដើមឈើស្រាលនៅក្នុងដីព្រៃរេចរឹល របស់សហគមន៍តំបន់ការពារធម្មជាតិ និងដីនៅតំបន់ផ្សេងៗទៀត៕ ដោយ៖បញ្ញាស័ក្តិ
