ភ្នំពេញ៖ អ្នកនាង គឹម លីស្សា ដែលជាតារាសម្តែងផង ពិធីការិនីផង និងបច្ចុប្បន្នកំពុងជោគជ័យខ្លាំងទៅលើមុខជំនួញផលិតផលថែរក្សាសម្រស់ Jesse ថ្មីៗនេះបានបង្ហាញអារម្មណ៍ហាក់មិនពេញចិត្តចំពោះមនុស្សមួយចំនួនដែលចង់មានបាន ប៉ុន្តែគ្មានភាពតស៊ូ ធ្វើការបន្តិចក៏រអ៊ូថាហត់ ថាធុញ និងប្រាប់ឱ្យដេកស៊ីតែម្តងទៅបានវាស្រួល។
តាមរយៈបណ្តាញសង្គមហ្វេសបុកផ្ទាល់របស់អ្នកនាង បានសរសេររៀបរាប់យ៉ាងវែងអន្លាយដូច្នេះថា
«ធ្វើការបន្តិចរអ៊ូហត់ ធ្វើការបន្តិចរអ៊ូធុញ ធ្វើការប៉ុណ្ណឹងស្រែកហត់ ដេកស៊ីវិញទៅបានវាស្រួល មើលអ្នកគេជោគជ័យគេសល់លុយសល់ផ្ទះសល់ឡានគេតស៊ូប៉ុណ្ណា អ្នកខ្លះធ្វើការឱ្យគេ ស៊ីប្រាក់ខែគេឈរមួយថ្ងៃដល់ល្ងាច គេមិនឱ្យអង្គុយកៅអីផង គេមិនឱ្យកាន់ទូរស័ព្ទផង ស៊ីបាយមិនត្រង់មាត់ផង បុណ្យទានមិនទាំងបានឈប់ផង គេធ្វើការផងគេរៀនផង គេស៊ូប៉ុណ្ណា? ផ្ញើជូនអ្នកខ្ជិលតែចង់មានទាំងអស់ ឱ្យចេះពិចារណាឡើងវិញ»។
ទាក់ទងទៅនិង Caption នេះ ទំនងជាអ្នកនាង គឹម លីស្សា កំពុងតឹងចិត្តចំពោះបុគ្គលមួយចំនួនដែលហាក់គ្មានភាពតស៊ូក្នុងជីវិត គិតតែពីរអ៊ូ តែបែរជាចង់ទទួលបានភាពជោគជ័យឱ្យចេះសង្កេតមើលមនុស្សជុំវិញខ្លួនផង ថាទម្រាំគេមានបាន គេខំតស៊ូប៉ុណ្ណា ព្រោះភាពជោគជ័យសម្រាប់បុគ្គលម្នាក់ៗមិនមែនកើតឡើងពីការខ្ជិលច្រអូសរអ៊ូរទាំនោះទេ គ្រប់យ៉ាងវាកើតពីការខិតខំតស៊ូឧស្សាព្យាយាមទើបទទួលបានជោគជ័យ៕ ដោយ៖ កូលាប ក្រហម
