ព្រះសីហនុ៖ បុរសម្នាក់បានបង្ហោះនៅលើបណ្តាញសង្គមហ្វេសប៊ុកអំពាវនាវឱ្យអភិបាលខេត្ត និងប្រធានសាលាដំបូងខេត្តព្រះសហនុ ជួយរកយុត្តិធម៌ ក្រោយពីរថយន្តរបស់ខ្លួនត្រូវទូកុងតឺន័រ រលំសង្កត់លើខូចខាតស្ទើរទាំងស្រុង អស់រយៈពេល១៨ខែមកហើយ តែមិនទទួលបានសំណងពីក្រុមហ៊ុន។
តាមរយៈគណនីហ្វេសប៊ុកបុរសខាងលើដែលមានឈ្មោះថា Hea Mab បានបង្ហោះរៀបរាប់យ៉ាងដូចច្នេះថា សូមឯកឧត្ដមអភិបាលខេត្តនិងលោកប្រធានសាលាដំបូងខេត្តព្រះសីហនុ មេត្តាជួយរកយុត្តិធម៌ឱ្យខ្ញុំបាទជាជនរងគ្រោះផង ដប់ប្រាំបីខែមកហើយគ្មានបានសំណងអ្វីមកវិញទេ សូមអស់លោកជួយពន្លឿនការដោះស្រាយឱ្យបានលឿនបន្តិចមក នេះឡានខ្ញុំត្រូវទាំងស្រុងផងចុះទម្រាំខ្ញុំខុសដែរ តើត្រូវសាកសួរវែកញែករកខុសត្រូវឃើញមិនដឹងត្រូវប្រើពេលអស់ប៉ុន្មានខែឆ្នាំទេ
សូមផ្ដាំបងប្អូនទាំងអស់គ្នាថា បើមានគ្រោះថ្នាក់ ប៉ះពៀរជាមួយបងៗខាងកុងទីន័រ បើអាចបានសំណងតិចតួចយកទៅ ឬសុំម៉ារួចខ្លួនកាន់តែល្អ កុំឱ្យដូចខ្ញុំ…។»
គួរបញ្ជាក់ផងដែរថា កាលពីវេលាម៉ោងប្រមាណ៨យប់ ថ្ងៃទី២៧ ខែមេសា ឆ្នាំ២០១៩កន្លងទៅ មានករណីគ្រោះថ្នាក់ចរាចរណ៍មួយ បានកើតឡើងបង្កដោយរថយន្តកុងតឺន័រមួយគ្រឿង បើកចុះចំណោទម្តុំអូរ២ ក្រុងព្រះសីហនុ រួចដាច់ហ្វ្រាំងបណ្តាលឱ្យធ្លាក់ទូសង្កត់លើរថយន្តធុនតូចចំនួន៣គ្រឿង និងម៉ូតូ២គ្រឿង ខូចខាតយ៉ាងដំណំ៕ ដោយ៖ កូលាប ក្រហម