បាត់ដំបង ៖ ពលរដ្ឋរងគ្រោះទឹកជំនន់ និងក្រីក្រចំនួន ៥០០គ្រួសារ បានទទួលពូជបន្លែយកទៅដាំដុះពេលទឹកស្រក ដើម្បីស្ដារជីវភាពឡើងវិញ។ អាជ្ញាធរស្រុកមោងឫស្សី បានអំពាវនាវដល់ប្រជាពលរដ្ឋ ដែលបានជួបគ្រោះទឹកជំនន់កន្លងមកទៅទទួលយកពូជបន្លែ ពីតាមសាលាឃុំ យកទៅដាំដុះ។
ការលើកឡើងនេះ ក្នុងពេលចែកអំណោយដល់ពលរដ្ឋរងគ្រោះទឹកជំនន់និងក្រីក្រចំនួន ៥០០គ្រួសារ ដែលជាអំណោយសម្ដេចក្រឡាហោម ស ខេង ឧបនាយករដ្ឋមន្ត្រីរដ្ឋមន្ត្រីក្រសួងមហាផ្ទៃ ។
លោក ទេព ហន អភិបាលស្រុកមោងឫស្សី បានមានប្រសាសន៍ថានៅឆ្នាំ ២០២០នេះស្រុកមោងរឫស្សី បានជួបគ្រោះមហន្តរាយចំនួន៣លើក មានបញ្ហាខ្យល់កន្ត្រាក់ បញ្ហាជំងឺកូវីដ ១៩ ដែលជាបញ្ហាសកលនិងចុងក្រោយនេះបញ្ហាគ្រោះទឹកជំនន់ ដែលប៉ះពាល់ដំណាំស្រូវរហូតដល់ជាង ១៧០០០ហិកតានិងខូចខាតទាំងស្រុងជាង ៤០០០ហិកតា។ ផលប៉ះពាល់ដំណាំស្រូវរបស់ពលរដ្ឋក្នុងស្រុកនេះ អាជ្ញាធរស្រុកនឹងធ្វើរបាយការណ៍ទៅរដ្ឋបាលខេត្តបាត់ដំបង ដើម្បីស្នើសុំស្រូវពូជចែកជូនពលរដ្ឋរងគ្រោះឲ្យពួកគាត់ ស្ដារការដាំដុះ។ សម្រាប់តំបន់ខ្លះ ដែលមិនទាន់អាចធ្វើដំណាំស្រូវបាន ក៏ស្នើសុំឲ្យមានការចែកពូជបន្លែ ឬកូនត្រី ដើម្បីឲ្យពួកគាត់ធ្វើការដាំដុះនិងចិញ្ចឹមត្រី។នៅចំពោះមុខនេះ អាជ្ញាធរស្រុកក៏មានការចែកពូជបន្លែដល់ពលរដ្ឋរងគ្រោះ ដោយទឹកជំនន់ ហើយសូមឲ្យពួកគាត់ទៅតាមសាលាឃុំ ដើម្បីស្នើសុំយកទៅដាំនិងអាចស្ដារជីវភាពបានមួយកម្រិត ខណៈកន្លងមកក៏ធ្លាប់ចែកប្រជាពលរដ្ឋជួបបញ្ហាជីវភាព ព្រោះវិបត្តិកូវីដ១៩ផងដែរ។
ប្រជាពលរដ្ឋរងគ្រោះដោយទឹកជំនន់នៅក្នុងស្រុកមោងឫស្សី បានប្រាប់ថាក្រោយពីជំនន់ស្រកទៅ ធ្វើឲ្យខូចខាតហេដ្ឋារចនាសម្ព័ន្ធផ្លូវជាច្រើនខ្សែនៅក្នុងតំបន់ពួកគាត់ ដែលធ្វើឲ្យពិបាកក្នុងការធ្វើដំណើរ ហើយទឹកជំនន់ក៏បានលិចលងដំណាំកសិកម្មផ្សេងៗ។បញ្ហានេះ ស្នើសុំដល់រាជរដ្ឋាភិបាល សូមឆាប់ជួយចែកពូជស្រូវដល់ពលរដ្ឋ ដើម្បីឆាប់បានបង្កបង្កើនស្រូវឡើងវិញ ។
គួរបញ្ជាក់ថា អំណោយរបស់សម្ដេចក្រឡាហោម ស ខេង ដែលចែកជូនពលរដ្ឋនៅស្រុកមោងឫស្សី ៥០០គ្រួសារ មានអង្ករ ភេសជ្ជៈ ថ្នាំពេទ្យ មី និងថវិកាមួយចំនួនផងដែរ៕ ដោយ ៖ អ៊ុងសារុំ
