កណ្ដាល៖ ជនរងគ្រោះអង្គុយផឹកស្រាបៀរជាមួយប្រពន្ធជនសង្ស័យ និងបងប្អូននៅលើគ្រែក្រោយផ្ទះម្ដាយរបស់ជនដៃដល់ ដោយជនសង្ស័យបានប្រច័ណ្ឌប្រពន្ធជាមួយនឹងជនរងគ្រោះ ក៏ដើរទៅដេញជនរងគ្រោះចេញ មិនឲ្យផឹកស្រាបៀរ តែជនរងគ្រោះមិនព្រមចេញ ទើបជនសង្ស័យយកកាំបិតប៉័ងតោ ទុកលើគ្រែនោះ កាប់ទៅលើជនរងគ្រោះចំនួនពីរកាំបិតតែម្ដងបណ្ដាលឲ្យជនរងគ្រោះរងរបួសក្បាល។ ករណីនេះ បានកើតឡើងកាលពីថ្ងៃទី១ ខែវិច្ឆិកា ឆ្នាំ២០២០ វេលាម៉ោង១០នឹង៣០នាទី ចំណុចភូមិរំលេច ឃុំទួលព្រេជ ស្រុកអង្គស្នួល ខេត្តកណ្តាល ។
មន្ត្រីនគរបាលស្រុកអង្គស្នួលបានឲ្យដឹងថា ជនដៃដល់ឈ្មោះ បែន ពិសី ភេទប្រុស អាយុ៣០ឆ្នាំ ជនជាតិខ្មែរ មុខរបរកម្មករសំណង់។ ចំណែកជនរងគ្រោះឈ្មោះ ហ៊ឺ សុខលី ភេទប្រុស អាយុ២៥ឆ្នាំ ជនជាតិខ្មែរ មុខរបរកសិករ។ ជនដៃដល់និងជនរងគ្រោះមានទីលំនៅភូមិរំលេច ឃុំទួលព្រេជ ស្រុកអង្គស្នួល ខេត្តកណ្តាល។ ដោយឡែកវត្ថុតាងចាប់យក៖ កាំបិតប៉័ងតោដងដែកចំនួនមួយ។
ប្រភពដដែលបន្តថា នៅមុនពេលកើតហេតុ ជនសង្ស័យបានទៅផ្ទះម្ដាយខ្លួន ដើម្បីទៅមើលម្ដាយឈឺ។ លុះដល់ម៉ោងកើតហេតុជនសង្ស័យបានឃើញជនរងគ្រោះអង្គុយផឹកស្រាលបៀជាមួយប្រពន្ធខ្លួន និងបងប្អូននៅលើគ្រែក្រោយផ្ទះម្ដាយជនដៃដល់ ដោយជនសង្ស័យបានប្រច័ណ្ឌប្រពន្ធជាមួយនឹងជនរងគ្រោះ ក៏ដើរទៅដេញជនរងគ្រោះចេញមិនឲ្យផឹកស្រាបៀកន្លែងនោះទេ តែជនរងគ្រោះមិនព្រមចេញ ទើបជនសង្ស័យយកកាំបិតប៉័ងតោទុកលើគ្រែនោះ កាប់ទៅលើជនរងគ្រោះចំនួនពីរកាំបិតតែម្ដង បណ្ដាលឲ្យជនរងគ្រោះរងរបួសក្បាលយ៉ាងដំណំ ។
ក្រោយពីមានហេតុការណ៍កើតឡើង កម្លាំងនគរបាលជំនាញស្រុកអង្គស្នួល បានឃាត់ខ្លួនជនដៃដល់ រួចយកមកអធិការដ្ឋាននគរបាលស្រុក ដើម្បីកសាងសំណុំរឿងចាត់ការតាមច្បាប់។ ចំណែកជនរងគ្រោះ ត្រូវបានសាច់ញាតិយកទៅសង្គ្រោះនៅមន្ទីរពេទ្យរាជធានីភ្នំពេញ៕
ដោយ៖បញ្ញាស័ក្តិ
