រាជធានីភ្នំពេញ ៖ គិតពីខែវិចិ្ឆកា ឆ្នាំ២០១៩ ដល់ខែកញ្ញា ឆ្នាំ២០២០ មានគ្រោះថ្នាក់ចរាចរណ៍ផ្លូវទឹកកើតឡើងចំនួន ២១លើក បណ្តាលឲ្យមនុស្សស្លាប់ចំនួន១២នាក់ របួសស្រាលចំនួន៧នាក់ និងរបួសធ្ងន់ចំនួន១នាក់។ ឯកឧត្តម នាយឧត្តមសេនីយ៍ ហឹម យ៉ាន អគ្គស្នងការរងនគរបាលជាតិ បានលើកឡើងថា នគរបាលចរាចរណ៍ផ្លូវទឹក ត្រូវតែមានជំនាញ បច្ចេកទេស និងច្បាប់ ដើម្បីជាមូលដ្ឋានចូលរួមទប់ស្កាត់កាត់បន្ថយគ្រោះថ្នាក់ចរាចរណ៍ផ្លូវទឹក ក្នុងភូមិសាស្ត្ររាជធានី ឬខេត្តរបស់ខ្លួន ។
ការលើកឡើងរបស់ ឯកឧត្តម នាយឧត្តមសេនីយ៍ អគ្គស្នងការរងនគរបាលជាតិបែបនេះ ក្នុងពិធីបើកវគ្គបំប៉នជំនាញនគរបាលចរាចរណ៍ផ្លូវទឹក ស្តីពីការបើកបរនាវា និងលិខិតបទដ្ឋានពាក់ព័ន្ធ នៅព្រឹកថ្ងៃទី២ ខែវិចិ្ឆកា ឆ្នាំ២០២០នេះ នៅអគ្គស្នងការដ្ឋាននគរបាលជាតិ ។
ឯកឧត្តម នាយឧត្តមសេនីយ៍ អគ្គស្នងការរងនគរបាលជាតិ បានមានប្រសាសន៍ថា វគ្គសិក្សារយៈពេល៥ថ្ងៃនេះ ផ្តោតលើប្រធានបទសំខាន់ៗចំនួន៨ គឺ ១-សុវត្ថិភាពនាវាចរណ៍ គ្រោះថ្នាក់នាវាចរណ៍ ២-វិធានអន្តរជាតិ ស្តីពីការបង្ការប៉ះបង្គិចនៅសមុទ្រ ៣-ការប្រើទង់សញ្ញាអន្តរជាតិ ឬទង់ជាតិ ៤-ការធ្វើនាវាចរណ៍ ៥-ការឆ្លើយតបនឹងគ្រោះអាសន្ននៅលើនាវា ៦-បច្ចេកទេសបើកបរនាវា ៧-ភូមិសាស្ត្រផ្លូវទឹកក្នុងព្រះរាជាណាចក្រកម្ពុជា ៨-សញ្ញាជំនួយនាវា ។
ឯកឧត្តមអគ្គស្នងការរង បានផ្តាំផ្ញើដល់សិក្សាកាមទាំងអស់ ត្រូវយកចិត្តទុកដាក់ក្នុងការសិក្សា និងត្រូវយកចំណេះដឹងទាំងនេះ ទៅបណ្តុះបណ្តាលបន្តដល់មន្ត្រីផ្សេងទៀត ក្នុងអង្គភាពជំនាញ ដើម្បីជាមូលដ្ឋានចូលរួមទប់ស្កាត់កាត់បន្ថយគ្រោះថ្នាក់ចរាចរណ៍ផ្លូវទឹក ក្នុងភូមិសាស្ត្ររាជធានី ឬខេត្តរបស់ខ្លួន ។
បើតាមរបាយការណ៍ ឯកឧត្តម ឧត្តមសេនីយ៍ឯក ហេង ចាន់ធារី ប្រធាននាយកដ្ឋាននគរបាលចរាចរណ៍ និងសណ្តាប់ធ្នាប់សាធារណៈ បានឲ្យដឹងថា ក្នុងឆ្នាំ២០២០ គិតពីខែវិចិ្ឆកា ឆ្នាំ២០១៩ ដល់ខែកញ្ញា ឆ្នាំ២០២០ មានគ្រោះថ្នាក់ចរាចរណ៍ផ្លូវទឹកកើតឡើងចំនួន ២១លើក បណ្តាលឲ្យមនុស្សស្លាប់ចំនួន១២នាក់ (ស្រី១នាក់) របួសស្រាលចំនួន៧នាក់ (ស្រី៣នាក់) និងរបួសធ្ងន់ចំនួន១នាក់(ប្រុស)។ ប្រៀបធៀបឆ្នាំ២០១៩ គ្រោះថ្នាក់កើនឡើងចំនួន ៣លើក បង្កដោយការបើកបរក្នុងល្បឿនលឿន គ្មានភ្លើងបំភ្លឺពេលយប់ កត្តាសុខភាព និងកត្តាអាកាសធាតុ ៕ដោយ៖បញ្ញាស័ក្តិ