ភ្នំពេញ៖ ក្រសួងអប់រំ យុវជន និងកីឡា បានប្រកាស និងចុះពិនិត្យការបើកដំណើរការគ្រឹះស្ថានសិក្សាដំណាក់កាលទី៣ នាថ្ងៃទី០២ ខែវិច្ឆិកា ឆ្នាំ២០២០នេះ បន្ទាប់ពីទទួលបាននូវការអនុញ្ញាតដ៏ខ្ពង់ខ្ពស់ ពីប្រមុខរាជរដ្ឋាភិបាលកម្ពុជា ដោយបន្តអនុវត្តតាមស្តង់ដារអនាម័យ SOP របស់ក្រសួងសុខាភិបាល ដើម្បីបញ្ចៀសការឆ្លងរីករាលដាលជំងឺកូវីដ-១៩ ។
កម្មវិធីពិនិត្យការបើកដំណើរការគ្រឹះស្ថានសិក្សាឡើងវិញ ដំណាក់កាលទី៣នេះបានប្រព្រឹត្តទៅក្រោមអធិបតីភាពឯកឧត្ដមបណ្ឌិតសភាចារ្យ ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា។ ក្នុងឱកាសនោះឯកឧត្ដម ក៏បានប្រគល់សម្ភារៈមួយចំនួនដូចជា ម៉ាស់ អាល់កុល ដល់សាលារៀនដើម្បីប្រើប្រាស់។
ឯកឧត្ដមរដ្ឋមន្ត្រីបានសម្ដែងនូវកតញ្ញុតាធម៌យ៉ាងជ្រាលជ្រៅជូនចំពោះសម្តេច អគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដែលបានដឹកនាំប្រទេសកម្ពុជាក្នុងការប្រយុទ្ធប្រឆាំងនឹងជំងឺកូវីដ-១៩ នេះប្រកបដោយជោគជ័យ និងមានប្រសិទ្ធភាពខ្ពស់។
ឯកឧត្ដមបណ្ឌិតសភាចារ្យ ក៏បានថ្លែងអំណរគុណចំពោះលោកគ្រូ អ្នកគ្រូ មន្ទីរអប់រំ និងអាជ្ញាធររាជធានីភ្នំពេញដែលបានរួមចំណែកក្នុងការប្រយុទ្ធប្រឆាំងនឹងជំងឺកូវីដ-១៩។ ទោះបីស្ថានភាពជំងឺនេះមានភាពធូរស្រាលតែទាមទារនូវការប្រុងប្រយ័ត្ន ដើម្បីឱ្យការសិក្សាដំណើរការទៅប្រកបដោយសុវត្ថិភាព។
រដ្ឋមន្ដ្រី ហង់ជួន ណារ៉ុន បានថ្លែងយ៉ាងដូច្នេះថា «ខ្ញុំសូមអំពាវនាវឲ្យអាជ្ញាធរ ក៏ដូចជាគណៈគ្រប់គ្រងសាលារៀនទាំងអស់ ទាំងរដ្ឋ ទាំងឯកជន សូមបន្ដអនុវត្ដ ឲ្យបានម៉ឺងម៉ាត់ នូវវិធានការដែលក្រសួង បានដាក់ចេញ ដើម្បីធានានូវសុវត្ថិភាព (ការពារជំងឺកូវីដ-១៩)»។
លើសពីនោះទៀត រដ្ឋមន្ដ្រី ហង់ជួន ណារ៉ុន ក៏បានប្រាប់ឲ្យត្រូវកំណត់ចំនួនសិស្ស កុំលើសពីស្ដង់ដារ ដែលក្រសួងបានដាក់ចេញ ហើយត្រូវបង្រៀនសិស្ស ឲ្យរៀនរស់នៅ តាមបែបគន្លងថ្មី ហើយនឹងបន្ដការបង្រៀន ដើម្បីបន្ដបណ្ដុះបណ្ដាល ធនធានមនុស្សឲ្យបានល្អ និងមានគុណភាព។
បើតាមលោក ឡៅ ម៉ូលីណា នាយកវិទ្យាល័យ ជាស៊ីម សន្ធរម៉ុក បានឲ្យដឹងថា ដោយអនុវត្តតាមការណែនាំ របស់ក្រសួងអប់រំ ជាពិសេសវិធានការ ការពារជំងឺកូវីដ១៩ របស់ក្រសួងសុខាភិបាល និងដោយមានការណែនាំ ជាប្រចាំពីមន្ទីរអប់រំ រាជធានីភ្នំពេញ វិទ្យាល័យ ជាស៊ីម សន្ធរម៉ុក បានអនុវត្តរួមមាន៖ ជំរុញ និងលើកទឹកចិត្តឲ្យលោកគ្រូ អ្នកគ្រូ និងសិស្សានុសិស្សទាំងអស់ ពាក់ម៉ាសជាប្រចាំ នៅពេលមកសាលារៀន។ ចាត់តាំងឲ្យយុវជនកាយរឹទ្ធិ និងកាកបាទក្រហមបាញ់វាស់កម្ដៅ លាងជែល ឬអាល់កុលជាមុន ទើបឲ្យចូលក្នុងសាលារៀន។ ណែនាំជាប្រចាំដល់សិស្សានុសិស្ស ជៀសវាងការប្រមូលផ្តុំគ្នា នៅពេលចេញលេង។ បង្កើនកន្លែងលាងដៃ ដោយសាប៊ូ។ ប្រជុំណែនាំដល់អាជីវករ ដើម្បីចូលរួមការពារជំងឺកូវីដ១៩ ជាពិសេសរក្សាអនាម័យ ឲ្យបានល្អ។ គ្រប់អាជីវករ ត្រូវអនុវត្តតាមបទដ្ឋានសុវត្ថិភាព របស់ក្រសួងសុខាភិបាល ដោយពាក់ម៉ាស់ជាប្រចាំមានជែល ឬអាល់កុលគ្រប់គ្រាន់ សម្រាប់បាញ់សម្លាប់មេរោគ។
ក្នុងឱកាសនោះ រដ្ឋមន្ដ្រី ហង់ជួន ណារ៉ុន ក៏បានប្រគល់សម្ភារអនាម័យមួយចំនួន រួមមាន៖ ម៉ាស ចំនួន៤០ប្រអប់, អាកុល១ធុង (១០លីត្រ) និងជេលលាងសម្អាតដៃ ០១ធុង (៥លីត្រ) និងម៉ាស៊ីនវាស់កម្ដៅចំនួន៤គ្រឿង ជូនគណៈគ្រប់គ្រងវិទ្យាល័យ ជាស៊ីម សន្ធរម៉ុក សម្រាប់ទុកប្រើប្រាស់ផងដែរ៕
ដោយ : CEN